Isaías 65

ବିଚାରା ଅ଼ଡ଼େ ଗେଲ୍‌ପିନାୟି

1 ଆମ୍ବାଆରି ନା଼ କାତା ୱେଞ୍ଜାଆତେରି, ଏ଼ୱାରି ନାଙ୍ଗେ ପାରାମାଞ୍ଜାନେରି; ଆମ୍ବାଆରି ନାଙ୍ଗେ ପାରି ମାଞ୍ଜାଆତେରି, ଏ଼ୱାରି ନାଙ୍ଗେ ବେଟାଆ଼ହା ମାଞ୍ଜାନେରି; ଏମିନି ଦେ଼ସାତି ଲ଼କୁ ନା଼ ଦ଼ରୁତି ୱେ଼ଞ୍ଜାହିଲାଆତେରି, ଏ଼ୱାରାଇଁ ନା଼ନୁ "ନାଙ୍ଗେ ମେସ୍ତାଦୁ, ନାଙ୍ଗେ ମେସ୍ତାଦୁ" ଇଚେଏଁ। 2 ଆମିନିଗାଟାରି ଜାହାରା ଅଣ୍‌ପୁ ତଲେ ଲାଗେଏତି ଜିରୁତା ତା଼କିନେରି, ଇଲେତି ମୁଣ୍ତିଗାଟି ଲ଼କୁ ତାକି ନା଼ନୁ ୱେ଼ଡ଼ାଡୁମ୍ବେ ନା଼ କେୟୁ ଦା଼ସାମାଇଁ; 3 ଇଲେତି ଲ଼କୁ ନା଼ ନ଼କିତା ବା଼ଡ଼ାତା ପୂଜା କିହିଁ ଅ଼ଡ଼େ ଈଟା ଲାକ ଦୁପ୍‌ଣି ହୂଡି ହୂଡିହିଁ କା଼ଲେଏ ନାଙ୍ଗେ କାର୍‌ବି କିୟାନେରି; 4 ଏ଼ୱାରି ମାହ୍‌ଣି ମାଣ୍ତାତା କୁଗିନେରି ଅ଼ଡ଼େ ମେହ୍‌ଆ ଟା଼ୟୁତା ଡ଼ୟିନେରି; ଏ଼ୱାରି ପାଜି ଊଙ୍ଗା ତିନେରି ଅ଼ଡ଼େ ଏ଼ୱାରି ସିପାତା ଅ଼ପାଆଗାଟି ଊଙ୍ଗାତି ଜ଼ଡ଼ା ଡ଼ୟିନେ; 5 ଏ଼ୱାରି ଏଲେଇନେରି, "ଜାହାରା ଟା଼ୟୁତା ନିଦୁ, ନା଼ ଦାରିତା ୱା଼ଆଦୁ, ଇଚିହିଁ ନା଼ନୁ ମୀ କିହାଁ ସୁଦୁଗାଟାତେଏଁ;" ଈୱାରି ନା଼ ମୁଙ୍ଗେଲିତା ବ଼ୟିଁ ଆ଼ହିମାନି ହିଚୁ ସମାନା, ଆମ୍ବାଆରି ୱେ଼ଡ଼ାଡୁମ୍ବେ ଡ଼ୀଞ୍ଜିହିଁ ଡ଼ୟିନେରି।

6 ମେହ୍‌ଦୁ ନା଼ ନ଼କିତା ଈ କାତା ରା଼ସ୍‌କି ଆ଼ହାମାନେ; "ନା଼ନୁ ପାଲେଏ ଡ଼ୟଅଁ, ସାମା ଏ଼ୱାରି ବାଦୁଲି ହୀଇଁ, ମୀ ତା଼ଣାଟି ଅ଼ଡ଼େ ମୀ ଆକୁୟାଁତି ଲାଗେଏତି କାମାତି ବାଦୁଲି ମୀ ମୀର୍‌କାକି ହୀଇଁ।" 7 ପ୍ରବୁ ଏଲେଇଞ୍ଜି ମାନେସି, "ହ଼ର୍‌କା ଲାକ ଦୁପ୍‌ଣି ହୂଡାମାଞ୍ଜେରି ଅ଼ଡ଼େ କୁପ୍‌ଲିୟାଁ ଲାକ ନାଙ୍ଗେ ନିନ୍ଦା କିହାମାଞ୍ଜାଦେରି ମୀରୁ, ମୀ ଦ଼ହ ଅ଼ଡ଼େ ମୀ ଆକୁ ଆ଼ବାୟାଁତି କାମାତି ପା଼ଡ଼େୟି ନା଼ନୁ ଏକାବେ଼ଡ଼େଏ ହିୟାଇଁ; ଈଦାଆଁତାକି ନା଼ନୁ ମୂଲୁଏ ଏ଼ୱାରି କାମାତି ବାଦୁଲି ଏ଼ୱାରି ମୀର୍‌କାକି ହୀଇଁ।"

8 ପ୍ରବୁ ଈ କାତା ଏଲେଇଞ୍ଜି ମାନେସି, "ଅଙ୍ଗୁରି ଗେଲାତା ଏ଼ନିକିଁ ପୁଃନି ଅଙ୍ଗୁରି ରାସା ମେ଼ଡ଼ାଆ଼ନେ ଅ଼ଡ଼େ ଲ଼କୁ ଏଲେଇନେରି, ଈଦାଣି ନସ୍ତ କିଆଦୁ, ଇଚିହିଁ ଇମ୍ବାଆଁ ମାହାପୂରୁତି ବ଼ର ମାନେ; ଏଲେକିହିଁ ନା଼ନୁ ନା଼ ହ଼ଲିୟାଙ୍ଗା ତାକି କିଇଁ, ନା଼ନୁ ବାରେତି ନା଼ସା କିଅଁ। 9 ଇଞ୍ଜାଁ ନା଼ନୁ ଜାକୁବ ତା଼ଣାଟି ର଼ କୂଲୁ ଅ଼ଡ଼େ ଜୀହୁଦା ତା଼ଣାଟି ନା଼ ହ଼ର୍‌କାତି ର଼ ହାକୁଗାଟାଣାଇଁ ଜାର୍ନି କିଇଁ ଅ଼ଡ଼େ ନା଼ ଆ଼ଚିତି ଲ଼କୁ ଏ଼ଦାଆଁ ଅଦିକାରା କିନେରି ଅ଼ଡ଼େ ନା଼ ହ଼ଲିୟାଙ୍ଗା ଏମ୍ବାଆଁ ବାସା କିନେରି। 10 ଅ଼ଡ଼େ ଏମିନି ନା଼ ଲ଼କୁ ନାଙ୍ଗେ ପାରାମାଞ୍ଜାନେରି ଏ଼ୱାରି ତାକି ସାରଣ ର଼ ମେ଼ଣ୍ତାୟାଁ ହାଃଲା ଅ଼ଡ଼େ ଆକର୍‍ ଜଲା କ଼ଡିୟାଁ ଡୂରିନି ଟା଼ୟୁ ଆ଼ନେ।

11 ସାମା ମୀରୁ ପ୍ରବୁଇଁ ପିସାମାଞ୍ଜେରି ଅ଼ଡ଼େ ସୁଦୁ ହ଼ରୁତି ବା଼ଣା ଆ଼ହିମାଞ୍ଜେରି, ଗାଦ୍‌*65:11 ଗାଦ୍‌ ଏବ୍ରି ହା଼ଡା ତଲେ ଲେକାତି ପେ଼ନୁ ତାକି ତିନି କା଼ଦି ହେର୍‌ପିମାଞ୍ଜେରି ଅ଼ଡ଼େ ମୀରୁ ମେନି*65:11 ବାବିଲନିୟ ଲ଼କୁତି ପେ଼ନୁ ପେ଼ନୁ ତାକି ଆଣ୍ତିତି ଅଙ୍ଗୁରି ରାସା ହେର୍‌ପିମାଞ୍ଜେରି, 12 ମିଙ୍ଗେ ନା଼ନୁ କାଣ୍ତାତାକି ତିୟାରା କିୟାଇଁ ଅ଼ଡ଼େ ମୀରୁ ବାରେ ପା଼ୟ୍‌ୱି ଆୟାଲି ହେର୍‌ପି ଆ଼ଦେରି; ଇଚିହିଁ ନା଼ନୁ ହା଼ଟାତି ବେ଼ଲା ମୀରୁ ଆ଼ସ୍ତାଆତେରି; ନା଼ନୁ ଜ଼ଲାତି ବେ଼ଲା ମୀରୁ ୱେନାଆତେରି; ସାମା ନା଼ ନ଼କିତା ଏ଼ନାୟି ଲାଗେଏତାୟି ଏ଼ଦାଆଁ ମୀରୁ କିତେରି ଅ଼ଡ଼େ ଏ଼ନୱା ନା଼ ରା଼ହାଁ ହିଲେଏ ଏ଼ଦାଆଁ ମୀରୁ ଆବାକଡିତେରି।" 13 ଈଦାଆଁତାକି ପ୍ରବୁ ଈ କାତା ଏଲେଇଞ୍ଜି ମାନେସି, "ମେହ୍‌ଦୁ ନା଼ ହ଼ଲିୟାଙ୍ଗା ତିନେରି, ସାମା ମୀରୁ ହାକି ଆ଼ଦେରି; ମେହ୍‌ଦୁ ନା଼ ହ଼ଲିୟାଙ୍ଗା ଗହ୍‌ନେରି ସାମା ମୀରୁ ଏ଼ସ୍‌କି ଆ଼ଦେରି; ମେହ୍‌ଦୁ ନା଼ ହ଼ଲିୟାଙ୍ଗା ରା଼ହାଁ କିନେରି, ସାମା ମୀରୁ ଲାଜା ଆ଼ଦେରି; 14 ମେହ୍‌ଦୁ ନା଼ ହ଼ଲିୟାଙ୍ଗା ହିୟାଁତି ସୁକୁ ତାକି ପା଼ଚିନେରି, ସାମା ମୀରୁ ହିୟାଁତି ଦୁକୁ ତାକି ଡ଼ୀଦେରି ଅ଼ଡ଼େ ଜୀୱୁତି ଦୁକୁ ତାକି ଡ଼ୀଦେରି। 15 ଇଞ୍ଜାଁ, ମୀରୁ ନା଼ ଆ଼ଚାମାନି ଲ଼କୁ ତା଼ଣା ମୀ ଦ଼ରୁ ବା଼କା ଲେହେଁ ଇଟା ହାଜେରି ଅ଼ଡ଼େ ପ୍ରବୁ, ମାହାପୂରୁ ମିଙ୍ଗେ ନା଼ସା କିୟାନେସି; ଅ଼ଡ଼େ ଏ଼ୱାସି ତାନି ହ଼ଲିୟାଙ୍ଗାଇଁ ଏଟ୍‌କା ଦ଼ରୁଟି ୱେ଼ଙ୍ଗି କିନେସି; 16 ଏଚେଟିଏ ଏମିନି ଲ଼କୁ ଦାର୍‌ତିତା ଜାହାରାଇଁ ବ଼ର ଗାଟାତେଏଁ ଇନେସି, ଏ଼ୱାସି ସାତା ମାହାପୂରୁ ତା଼ଣାଟି ଜାହାରାଇଁ ବ଼ର ଗାଟାତେଏଁ ଇନେସି ଅ଼ଡ଼େ ଆମିନି ଲ଼କୁ ଦାର୍‌ତିତା ପାର୍‌ମାଣା କିନେସି, ଏ଼ୱାସି ସାତା ମାହାପୂରୁ ତା଼ଣାଟି ପାର୍‌ମାଣା କିନେସି; ଇଚିହିଁ ତଲି କା଼ଲାତି କସ୍ତ ବାରେ ହେକ ଆ଼ହାମାନେ ଅ଼ଡ଼େ ଏ଼ ବାରେ ନା଼ କାନୁଟି ଡ଼ୁଗାମାନେ।

ପୁଃନି ଗା଼ଡ଼ି କିନାୟି

17 ଇଚିହିଁ ମେହ୍‌ମୁ, ନା଼ନୁ ପୁଃନି ହା଼ଗୁପା଼କା ଅ଼ଡ଼େ ପୁଃନି ଦାର୍‌ତି ଗା଼ଡ଼ି କିଇଁ ଅ଼ଡ଼େ ତଲି କା଼ଲାତି କାତା ବାରେ ଅଣ୍‌ପିୱି ଆ଼ଏ, କି ମ଼ନତା ୱା଼ଏ। 18 ସାମା ଏ଼ନାଆଁ ନା଼ନୁ ଗା଼ଡ଼ି କିଇଁ, ମୀରୁ କା଼ଲେଏ ଏମ୍ବାଆଁ ରା଼ହାଁ ଆ଼ଦୁ; ଇଚିହିଁ ମେହ୍‌ମୁ, ନା଼ନୁ ଜିରୁସାଲମତି ରା଼ହାଁ ଲେହେଁ ଅ଼ଡ଼େ ଏମ୍ବାତି ଲ଼କୁଣି ରା଼ହାଁତି ଲ଼କୁ କିହାଁ ଗା଼ଡ଼ି କିଇଁ। 19 ଇଞ୍ଜାଁ, ନା଼ନୁ ଜିରୁସାଲମତା ରା଼ହାଁ କିଇଁ ଅ଼ଡ଼େ ମା଼ ଲ଼କୁ ତା଼ଣା ରା଼ହାଁ କିଇଁ; ଇଞ୍ଜାଁ, ଏମ୍ବାଆଁ ଡ଼ୀକିତି ହା଼ଡା, କି କିର୍‌ଡ଼ିନି ହା଼ଡା ୱେଣ୍‌ମ୍ବିଆ଼ଏ। 20 ଏ଼ ବେ଼ଲାଟିଏ ଏ଼ ଟା଼ୟୁତା ଊଣା କକାରି କି ଦୂତି ବୁଡ଼୍‌ହା ଲ଼କୁ ଡ଼ୟଅସି; ଇଚିହିଁ କକାସି ଦାଂଗ୍‌ଣା ବେ଼ଲାତା ହା଼ନାସି ର଼ ୱାଞ୍ଜା ବାର୍ସା ବେ଼ଲାତା ହା଼ନେସି ଅ଼ଡ଼େ ପା଼ପୁଗାଟାସି ର଼ ୱାଞ୍ଜା ବାର୍ସା ବେ଼ଲାତା ବା଼କା ବେଟାଆ଼ନେସି। 21 ଇଞ୍ଜାଁ, ଲ଼କୁ ଇଲୁ କେ଼ପାହାଁ ଏମ୍ବାଆଁ ବାସା କିନେରି ଅ଼ଡ଼େ ଏ଼ୱାରି ଅଙ୍ଗୁରି ବା଼ଡ଼ା କିହାଁ ଏମ୍ବାତି ପା଼ଡ଼େୟି ତିନେରି। 22 ଏ଼ୱାରି କେ଼ପିସାରେ, ଏଟ୍‌କାତାସି ଆମ୍ବାଆସି ଏମ୍ବାଆଁ ବାସା କିଅସି; ଏ଼ୱାରି ଉହିସାରେ, ଏଟ୍‌କାତାସି ଆମ୍ବାଆସି ପା଼ଡ଼େୟି ତିନଅସି; ଇଚିହିଁ ନା଼ ଲ଼କୁତି ବାର୍ସା ମା଼ର୍‌ନୁତି ବାର୍ସା ଲେହେଁ ଆ଼ନେ ଅ଼ଡ଼େ ନା଼ ଆ଼ଚିତି ଲ଼କୁ ହା଼ରେକା କା଼ଲା ପାତେକା ଜାହାରା କେୟୁତଲେ କିତି କାମାତି ପା଼ଡ଼େୟି ତିନେରି। 23 ଏ଼ୱାରି ଉଜେଏ କସ୍ତ କିଅରି, କି ବା଼ଦା ତାକି ଜାର୍ନି କିଅରି; ଇଚିହିଁ ଏ଼ୱାରି ଅ଼ଡ଼େ ଏ଼ୱାରି ତଲେ ତାମି ମୀର୍‌କା, ପ୍ରବୁତି ବ଼ର ବେଟାଆ଼ନି କୂଲୁ। 24 ଇଞ୍ଜାଁ, ଈଦି ଗଟୱି ଆ଼ନେ, ଏ଼ୱାରି ହା଼ଟିନି ନ଼କେଏ ନା଼ନୁ ଏ଼ୱାରାଇଁ ଜ଼ଲିଇଁ ଅ଼ଡ଼େ ଏ଼ୱାରି କାତା ୱେସ୍‌ପନିଏ ନା଼ନୁ ୱେଇଁ। 25 ଗଦ କ୍ଡାଃନି ଅ଼ଡ଼େ ମେ଼ଣ୍ତା ଡା଼ଲ୍‌କା ରହେଁଏ ମେୟିଁନୁ ଅ଼ଡ଼େ ସିହଁ, କ଼ଡି ସମାନା ହାରା ମେୟିଁନେ; ଇଞ୍ଜାଁ ଦୂଡ଼ି ରା଼ଚୁତି କା଼ଦି ଆ଼ନେ। ଏ଼ୱାରି ନା଼ ସୁଦୁ ହ଼ରୁତି ଏମିନି ଟା଼ୟୁତା ଡା଼ହାରା କି ନା଼ସା କିଉ।" ପ୍ରବୁ ଈ କାତା ୱେସିମାନେସି।