Isaías 66

ମାହାପୂରୁ ଦାର୍‌ତିତି ବିଚାରା କିନେସି

1 ପ୍ରବୁ ଈ କାତା ଏଲେଇଞ୍ଜି ମାନେସି, "ଲାକପୂରୁ ନା଼ ସିଂଗାସାଣି ଅ଼ଡ଼େ ଦାର୍‌ତି ନା଼ ପା଼ୱୁଲି ଇଟିନି ଟା଼ୟୁ; ମୀରୁ ନା଼ ତାକି ଏ଼ନିଲେହେଁତି ଇଲୁ ତିୟାରା କିଦେରି ? ଅ଼ଡ଼େ ଏମିନି ଟା଼ୟୁ ନା଼ ଜ଼ମିନି ଟା଼ୟୁ ଆ଼ନେ ? 2 ଇଚିହିଁ ନା଼ କେୟୁ ଈ ବାରେ ରାଚି କିହାମାନେ, ଅ଼ଡ଼େ ଏ଼ଦାଆଁତାକି ଈ ବାରେ ଆ଼ହାମାନେ," ପ୍ରବୁ ଈ କାତା ଏଲେଇଞ୍ଜି ମାନେସି; "ସାମା ଈ ଲ଼କୁ ତାକି, ଇଚିହିଁ, ଏମିନି ଲ଼କୁ ଦୁକୁଗାଟାସି, ଊଣା ମ଼ନ ଅ଼ଡ଼େ ଆମ୍ବାଆସି ନା଼ ବ଼ଲୁତା ତୀର୍‌ଗିନେସି, ଏ଼ୱାଣାଇଁ ନା଼ନୁ ସିନିକିଇଁ।

3 ଆମ୍ବାଆସି କ଼ଡି ପା଼ୟିନେସି, ଏ଼ୱାସି ମାଣ୍‌ସି ପା଼ୟିନାସି ସମାନା ଆ଼ନେସି; ଆମ୍ବାଆସି ମେ଼ଣ୍ତା ଡା଼ଲୁ ପୂଜା କିନେସି, ଏ଼ୱାସି ନେଃଉଡ଼ି ହେର୍‌କି ଦା଼ଃଆନି ଲ଼କୁ ସମାନା ଆ଼ନେସି; ଆମ୍ବାଆସି ତିନି କା଼ଦି ହେର୍‌ପିନେସି, ଏ଼ୱାସି ପାଜିତି ନେତେରି ହେର୍‌ପିନି ଲ଼କୁ ସମାନା ଆ଼ନେସି; ଆମ୍ବାଆସି ଦୁପ୍‌ଣି ହୂଡିନେସି, ଏ଼ୱାସି ପେ଼ନୁତି ଜହରା କିନି ଲ଼କୁ ସମାନା ଆ଼ନେସି; ହାଅ, ଏ଼ୱାରି ତାମି ଜିରୁ ଆ଼ଚାମାନେରି ଅ଼ଡ଼େ ଏ଼ୱାରି ଜୀୱୁ ନା଼ ଅ଼ପାଆଗାଟାଣି ରା଼ହାଁ ଆ଼ନେ; 4 ନା଼ନୁ ଜିକେଏ ଏ଼ୱାରି ଦୁକୁତି କାତା ଆ଼ଚିଇଁ ଅ଼ଡ଼େ ଏ଼ୱାରି ଆଜିତି କାତା ଏ଼ୱାରି ତାକି କିଇଁ; ଇଚିହିଁ ନା଼ନୁ ହା଼ଟିତି ବେ଼ଲା ଆମ୍ବାଆରି କାତା ଆୟାଆତେରି; ନା଼ନୁ ଜ଼ଲିତି ବେ଼ଲା ଏ଼ୱାରି ୱେନାଆତେରି; ସାମା ଏ଼ନାୟି ନା଼ ନ଼କିତା ଲାଗେଏତାୟି, ଏ଼ଦାଆଁ ଏ଼ୱାରି କିତେରି ଅ଼ଡ଼େ ଏମ୍ବିୟା ନା଼ ରା଼ହାଁ ହିଲେଏ, ଏ଼ଦାଆଁ ଏ଼ୱାରି ଆ଼ଚିତେରି।"

5 ପ୍ରବୁତି ବ଼ଲୁତା ତୀର୍‌ଗି ମାଞ୍ଜେରି ମୀରୁ, ମୀରୁ ତାନି ବ଼ଲୁ ୱେଞ୍ଜୁ; ମୀ ଏମିନି ତାୟିୟାଁ ମିଙ୍ଗେ ଅ଼ପଅରି, ନା଼ ଦ଼ରୁ ତାକି ମିଙ୍ଗେ ହେକ କିୟାନେରି, ଏ଼ୱାରି ଏଲେଇଞ୍ଜା ମାନେରି, ମା଼ମ୍ବୁ ଏ଼ନିକିଁ ମୀ ରା଼ହାଁ ମେସାଲି ଆ଼ଡିନମି, ଏ଼ଦାଆଁତାକି ପ୍ରବୁ ସାମ୍ବ୍ରମି ଆ଼ପେସି; ସାମା ଏ଼ୱାରି ଲାଜା ଆ଼ନେରି। 6 ୱେଞ୍ଜୁ, ଗା଼ଡ଼ାଟି ଗଡ଼୍‌ହା ହା଼ଡା, ମାହାପୂରୁ ଇଲୁଟି ର଼ ହା଼ଡା, ଆମ୍ବାଆସି ଜାହାରା ସାତ୍ରୁୟାଁଣି ତାମି କାମାତି ପା଼ଡ଼େୟି ହୀନେସି, ଏ଼ ପ୍ରବୁତି ହା଼ଡା।

ଜିରୁସାଲମ ତଲେ ରା଼ହାଁ

7 "ଜାର୍ନି କିନି ବୀସା ଲୁଞ୍ଜିନି ନ଼କେଏ ଏ଼ଦି ଜାର୍ନି କିତେ; ଜାର୍ନି କିନି ବୀସା ଆ଼ନି ନ଼କେଏ କକାସି ଜାର୍ନା ଆ଼ତେସି। 8 ଇଲେତି କାତା ଆମ୍ବାଆସି ୱେଞ୍ଜାମାନେସି ? ଇଲେତି କାତା ଆମ୍ବାଆସି ମେସାମାନେସି ? ରଣ୍ତିଏ ଦିନା କି ଏ଼ନି ଦେ଼ସା ଜାର୍ନା ଆ଼ନେ ? ଏ଼ନି କୂଡ଼ାତି ଲ଼କୁ କି ରଣ୍ତିଏ ଦେବା ଜାର୍ନା ଆ଼ନେରି ? ସିୟନ ଜାର୍ନିକିନି ବୀସା ଆ଼ତି ରେ଼ଟୁଏ, ଏ଼ଦି ତାନି ମୀର୍‌କାଣି ଜାର୍ନିକିତେ।" 9 ପ୍ରବୁ ଏଲେଇଞ୍ଜି ମାନେସି, "ନା଼ନୁ ଜାର୍ନି କିନି କା଼ଲା ଏ଼ୱିକିହାଁ ଜାର୍ନି କିଅଁ ?" ନୀ ମାହାପୂରୁ ଏଲେଇଞ୍ଜି ମାନେସି, "ଜାର୍ନି ଆ଼ନି ବା଼ଡ଼୍‌ୟୁ ହୀନାତେଏଁ ନା଼ନୁ, ନା଼ନୁ କି କକାରି ପ଼ଦାଁ ଆ଼ନାଣି ସୁଣ୍ତିଇଁ ?"

10 ଜିରୁସାଲମତି ଜୀୱୁ ନ଼ନାତେରି ବାରେ, ମୀରୁ ଏ଼ଦାନି ତଲେ ରା଼ହାଁ କିଦୁ

ଅ଼ଡ଼େ ଏ଼ଦାନି ତାକି ରା଼ହାଁ କିଦୁ; ଏ଼ଦାନି ତାକି ଦୁକୁ କିନାତେରି ବାରେ,

ମୀରୁ ରା଼ହାଁ ତାକି ଏ଼ଦାନି ତଲେ ରା଼ହାଁ କିଦୁ;

11 ଏଚେଟିଏ ମୀରୁ ତାନି ବା଼ଡ଼୍‌ୟୁ ଲେହେଁତି ପା଼ଲୁ ଗସାହାଁ ପାଞ୍ଜିଦେରି;

ମୀରୁ ପା଼ଲୁ ପୀଚାହାଁ ତାନି ହା଼ରେକା ବାତ୍‌କୁତା ରା଼ହାଁ ଆ଼ଦେରି।

12 ଇଚିହିଁ ପ୍ରବୁ ଈ କାତା ଏଲେଇଞ୍ଜି ମାନେସି, "ମେହ୍‌ମୁ, ନା଼ନୁ ତାନି ୱାକି କାଡା ଲେହେଁ ହିତ୍‌ଡ଼ି ଅ଼ଡ଼େ ତେ଼ଲିମାନି କାଡା ଲେହେଁ ହା଼ରେକା ଦେ଼ସାତି ବାତ୍‌କୁ ତାଇଁ, ଇଞ୍ଜାଁ ମୀରୁ ଏମ୍ବାଟି ପା଼ଲୁ ଗହ୍‌ଦେରି ଅ଼ଡ଼େ ମୀରୁ ବମିତା ଡେ଼କ୍‌ୱି ଆ଼ଦେରି ଅ଼ଡ଼େ ମେଣ୍ତା ଲାକ ଏ଼ନ୍ଦିକିୱି ଆ଼ଦେରି। 13 ଏ଼ନିକିଁ ରଅଣାଇଁ ତାମି ଇୟା ସା଼ସା ହୀନେ, ଏଲେକିହିଁ ନା଼ନୁ ମିଙ୍ଗେ ସା଼ସା ହିୟାଇଁ ଅ଼ଡ଼େ ମୀରୁ ଜିରୁସାଲମତା ସା଼ସା ବେଟାଆ଼ଦେରି।" 14 ଇଞ୍ଜାଁ, ମୀରୁ ଈଦାଆଁ ମେହ୍‌ଦେରି ଅ଼ଡ଼େ ମୀ ହିୟାଁ ରା଼ହାଁ ଆ଼ନେ, ଅ଼ଡ଼େ ମୀ ଡୁମ୍‌କା ପେ଼ଡ଼୍‌କା ପୁଃନି କ଼ଡ଼୍‌ଗି ଜା଼ଡ଼ା ଲେହେଁ ହିତ୍‌ଡ଼ି ଆ଼ନୁ; ଇଞ୍ଜାଁ, ପ୍ରବୁତି କେୟୁ ତାନି ହ଼ଲିୟାଙ୍ଗା ତାକି ତ଼ଞ୍ଜା ଆ଼ନେ ଅ଼ଡ଼େ ଏ଼ୱାସି ତାନି ସାତ୍ରୁୟାଁ କ଼ପାଟି କାର୍‌ବି ଆ଼ନେସି।

ମାହାପୂରୁତି ଗା଼ୱୁରମି ଅ଼ଡ଼େ ଡା଼ୟୁତି ବିଚାରା

15 ଇଚିହିଁ ମେହ୍‌ଦୁ, ପ୍ରବୁ ହିଚୁ ତଲେ ୱା଼ନେସି, ଅ଼ଡ଼େ ତାନି ରାତା ବାରେ ରୁୱାଗା଼ଲି ସମାନା ଆ଼ନେ, ତାନି କାଜା ବା଼ଡ଼୍‌ୟୁତି କାର୍‌ବି ଅ଼ଡ଼େ ନା଼ସାକିନି ହିଚୁ ତଲେ ଲା଼ଗାଲି ୱା଼ନେସି। 16 ଇଚିହିଁ ପ୍ରବୁ ହିଚୁ ତଲେ ଅ଼ଡ଼େ ତାନି କାଣ୍ତା ତଲେ ବାରେ ଦାର୍‌ତିତି ଲ଼କୁଣି ବିଚାରା କିନେସି; ଏଚେଟିଏ ପ୍ରବୁ ତା଼ଣାଟି ହା଼ତି ଲ଼କୁ ହା଼ରେକା ଆ଼ନେରି।

17 ଆମିନି ଲ଼କୁ ଜାହାରାଇଁ ଈଦାଆଁତାକି ସୁଦୁ ଅ଼ଡ଼େ ଅଟ୍‌ହା କଡିମାନେରି, କି ବା଼ଡ଼ାତା ହାନେରି ଅ଼ଡ଼େ ରଅଣି ଜେ଼ଚ ନିଚାହାଁ ପାଜି ଅ଼ଡ଼େ ଅର୍‌ଲି ଊଙ୍ଗା ଆ଼ଆତିଁ ଏଟ୍‌କାତି ଅ଼ପାଆଗାଟି ଆ଼ସ୍ତି ତିଞ୍ଜିମାନେରି, ଏ଼ୱାରି ରହେଁଏ ନା଼ସା ଆ଼ନେରି, ଈ କାତା ପ୍ରବୁ ଏଲେଇଞ୍ଜି ମାନେସି। 18 "ଇଚିହିଁ ନା଼ନୁ ଏ଼ୱାରି କାମା ଅ଼ଡ଼େ ଅଣ୍‌ପୁ ବାରେ ପୁଇଁ; ବାରେ ଦେ଼ସା ଅ଼ଡ଼େ ବାରେ ହା଼ଡାତି ଲ଼କୁଣି କୂଡ଼ି କିନି ଦିନା ୱା଼ହିମାନେ ଅ଼ଡ଼େ ଏ଼ୱାରି ୱା଼ହାଁ ନା଼ ସାମ୍ବ୍ରମି ମେହ୍‌ନେରି। 19 ଇଞ୍ଜାଁ ନା଼ନୁ ଏ଼ୱାରି ତା଼ଣା ର଼ ସିନା ତୀରି କିଇଁ ଅ଼ଡ଼େ ଏ଼ୱାରି ବିତ୍ରାଟି ଗେଲ୍‌ପି ଆ଼ହାମାନି ଲ଼କୁଣି ନା଼ନୁ ବାରେ ଦେ଼ସାତି ଲ଼କୁ ତା଼ଣା, ତର୍ସିସ, ପୁଲ୍‌, ଅ଼ଡ଼େ ଲୁଦ୍‌, ଆମ୍ବାଆରି ଆପ୍‌କା ଆସ୍ତାରି, ତୁବଲ୍‌ ଅ଼ଡ଼େ ଜବନ ଈ ବାରେ ଏମିନି ସାମ୍‌ଦୁରି ମାଦି ମାନି ହେକତି ଟା଼ସ୍‌କା ନା଼ ନେହିଁ କାବ୍ରୁ ଏଚେଲା ୱେଞ୍ଜାହିଲଅରି, କି ନା଼ ବା଼ଡ଼୍‌ୟୁତି କାମା ମେସା ହିଲଅରି, ଏ଼ୱାରି ତା଼ଣା ପାଣ୍ତାଇଁ ଅ଼ଡ଼େ ଏ଼ୱାରି ହା଼ରେକା ଦେ଼ସାତି ଲ଼କୁ ତା଼ଣା ନା଼ ସାମ୍ବ୍ରମି ୱେ଼କ୍‌ନେରି।" 20 ଇଞ୍ଜାଁ ପ୍ରବୁ ଏଲେଇଞ୍ଜି ମାନେସି, "ଇସ୍ରାୟେଲ ମୀର୍‌କା ଏ଼ନିକିଁ ସୁଦୁ ସିପାତା ପ୍ରବୁତି ଇଲୁତା ଦା଼ନା ତାନେରି, ଏଲେକିହିଁ ଏ଼ୱାରି ମୀ ବାରେ ତାୟିୟାଁଇଁ ପ୍ରବୁତି ଦା଼ନା ତାକି ବାରେ ଦେ଼ସାତି ଲ଼କୁ ବିତ୍ରା ଏ଼ୱାରାକି ଗ଼ଡ଼ା, ରାତା ଅ଼ଡ଼େ ସଗଡ଼ି, ତାଲି ଗ଼ଡ଼ା ଅ଼ଡ଼େ ଊଟୁ ଲାକ ନା଼ ସୁଦୁ ହ଼ରୁ ଜିରୁସାଲମତା ତାନେରି।" 21 ଅ଼ଡ଼େ, ନା଼ନୁ ଏ଼ୱାରି ବିତ୍ରାଟି ପୂଜେରା ଅ଼ଡ଼େ ଲେ଼ବି ଲ଼କୁ ଆ଼ହାଲି ତାକି ଲ଼କୁଣି ଆବିଇଁ, ଈ କାତା ପ୍ରବୁ ଏଲେଇଞ୍ଜି ମାନେସି।

22 "ଇଚିହିଁ ନା଼ନୁ ବା଼ଡ଼୍‌ୟୁ ତଲେ ପୁଃନି ହା଼ଗୁପା଼କା ଅ଼ଡ଼େ ପୁଃନି ଦାର୍‌ତି ରାଚି କିଇଁ, ଏ଼ଦି ଏ଼ନିକିଁ ନା଼ ନ଼କିତା ତୀରି ଆ଼ହାଁ ଡ଼ୟିନେ, ଏଲେକିହିଁ ମୀ କୂଲୁ ଅ଼ଡ଼େ ମୀ ଦ଼ରୁ ତୀରି ଆ଼ନେ," ଈ କାତା ପ୍ରବୁ ଏଲେଇଞ୍ଜି ମାନେସି। 23 "ଅ଼ଡ଼େ ର଼ କା଼ଡ଼କିଟିଏ ଅ଼ର କା଼ଡ଼କି ପାତେକା ଅ଼ଡ଼େ ର଼ ଜ଼ମିନି ଦିନାଟିଏ ଅ଼ର ଜ଼ମିନି ଦିନା ପାତେକା ବାରେ ଦାର୍‌ତିତି ଲ଼କୁ ନା଼ ନ଼କିତା ଜହରା କିହାଲି ୱା଼ନେରି," ଈ କାତା ପ୍ରବୁ ଏଲେଇଞ୍ଜି ମାନେସି। 24 "ଇଞ୍ଜାଁ ଏ଼ୱାରି ପାଙ୍ଗାତା ହାଜାହାଁ, ଆମ୍ବାଆରି ନା଼ କ଼ପାଟି ଲାଗେଏତି କାମା କିହାମାନେରି, ଏ଼ ଲ଼କୁତି ମାଡ଼୍‌ହା ମେହ୍‌ନେରି; ଇଚିହିଁ ଏ଼ୱାରି ପୀଡ଼୍‌କା ହା଼ଉ, କି ଏ଼ୱାରି ହିଚୁ ଡୁମ୍ବେଏ; ଇଞ୍ଜାଁ ଏ଼ୱାରି ବାରେ ଦାର୍‌ତିତା ଅ଼ପାଆଗାଟାରି ଆ଼ନେରି।"