1 Ijambo ry’Uhoraho ryatumwe kuri jewe riti:

2 "Mwana w’umuntu, uriteguye guca urubanza? Uriteguye gucira urubanza iki gisagara gisesa amaraso? Nuko nucagirize ibizira bakora, 3 ukibwire uti: ‘Uku ni ko Uhoraho Nyeninganji avuze: Yewe wa gisagara cikwegera guhona mu gusesa amaraso muri co, no mu kwihumanisha ibigirwamana, 4 amaraso washeshe atumye uba uwo gutsindwa n’urubanza, kandi uhumanijwe n’ibigirwamana wibaziye. Utumye imisi yawe yo gutikizwa ikwegereza, kandi ushitse ku mpera y’imyaka yawe. Ni co gituma nzoguhindura igitutsi ku banyamahanga, n’agatwengo ku bindi bihugu vyose. 5 Abari hafi n’abari kure bazogushinyaguriza, kuko wagize izina ribi, wuzuyemwo umuryano.

6 Raba ingene umuganwa wese ari muri Isirayeli akoresha igitugu ciwe mu gusesa amaraso. 7 Abakubamwo basuzugura ba se na ba nyina; bacinyiza ba kavantara, bakagirira nabi impfuvyi n’abapfakazi. 8 Wasuzuguye ivyera vyanje, umpumaniriza amasabato. 9 Muri wewe hari abadodobereza abandi bakicwa; muri wewe hari abagirira imisi mikuru mu mataba y’imisozi, bagakorerayo ibiteye isoni. 10 Muri wewe hari abasambanya abagore ba ba se; muri wewe hari abafata abagore ku nguvu bari mu miziro yabo. 11 Muri wewe, umugabo akora ibizira n’umugore w’umubanyi wiwe, uwundi agakora ibizira n’umukazana wiwe, uwundi na we agahumanya mushikiwe, uwo basangiye se. 12 Muri wewe, abantu bakira ibiturire kugira ngo basese amaraso, bakaka inyungu ku ngurane, kandi bakaka inyungu z’umurengera. Ikirengeye ivyo, mwarantaye, ni jewe Uhoraho Nyeninganji ndabivuze.

13 Ehe nzokubita amashi ku yandi ku bw’inyungu z’umurengera watse no ku bw’amaraso washeshe muri wewe. 14 Mbega umutima wawe uzoshobora kwihangana canke amaboko yawe areme ku musi nzoguhanirako? Ni jewe Uhoraho ndabivuze, kandi nzobikora. 15 Nzobashwiragiza mu mahanga, ndabasanzaze mu bihugu vyose; kandi nzokuraho ubuhumane bwanyu. 16 Niwamara kuboneka uhumanye imbere y’ayandi mahanga, uzomenya ko jewe ndi Uhoraho.’ "

17 Maze Ijambo ry’Uhoraho rimbwira riti: 18 "Mwana w’umuntu, ab’inzu ya Isirayeli bose bambereye nk’imyanda iva kw’ifeza. Bameze nk’imyanda iva ku butare bwitwa umujumbu, tini, icuma, irya myanda isigara iyo ubwo butare buciye mw’itanure. 19 None rero uku ni ko Uhoraho Nyeninganji avuze: Kubera yuko mwese mwahindutse nk’imyanda iva ku butare, nzobegeraniriza i Yerusalemu. 20 Nk’uko umuntu yegeraniriza ifeza, umujumbu, icuma, umuringa na tini, mw’itanure ngo bishongeshwe n’umuriro, ni ko nzobegeranya mu burake n’ubushangashirwe bwanje, ndabashire mu gisagara hagati mushongereyo. 21 Nzobegeranirizayo ndabahuhishe uburake bwanje, mushongereyo. 22 Nk’uko ifeza ishongera mw’itanure, ni ko namwe muzoshongera muri Yerusalemu, ni ho muzomenya ko ari jewe Uhoraho nabasutseko uburake bwanje."

23 Ijambo ry’Uhoraho ryongera kumbwira riti: 24 "Mwana w’umuntu, barira Isirayeli uti: ‘Uri igihugu gihumanye, kitazoronka imvura canke urume ku musi w’uburake bwanje.’ 25 Abaganwa baco bakigiriyemwo inama z’ubugarariji, nk’intare itontoma itabagura ico yafashe; bica abantu ata co bazira, bakanyaga ubutunzi bwabo, bagapfakaza benshi bo muri co. 26 Abaherezi baho barenze ku vyagezwe vyanje, bahumanya ivyera vyanje; ntibatandukanya ivyejejwe n’ibitejejwe; bigisha ko ata tandukaniro hagati y’ibihumanye n’ivyejejwe; birengagije amasabato yanje, maze izina ryanje risuzugurirwa muri bo. 27 Abatware baho bameze nk’amabingira atabagura ico yafashe; barasheshe amaraso, bica abantu kugira ngo bashike ku nyungu mbi. 28 Abavugishwa baho ivyo bikorwa bibi babisiga irangi ryera mu kuvugishwa ibinyoma n’indagu z’ububeshi. Bavuga bati: ‘Uku ni ko Uhoraho Nyeninganji avuze,’ kandi Uhoraho ata na kimwe yababwiye. 29 Abo muri ico gihugu bahahaza abandi, bakabambura utwabo; bahahaza aboro n’abakene, bakarenganya ba kavantara, bakanka kubacira imanza ziroranye.

30 Kandi nararondeye muri bo umuntu n’umwe yosanasana uruzitiro rw’ubugororotsi, agahagarara imbere yanje ngo azibire igihengeri, agasengera igihugu ngo sindagitikize, ariko nta n’umwe naronse. 31 Ni co gituma nzogisukako ishavu, ndagitongoze umuriro w’uburake bwanje, ndabashitseko igihano c’ivyaha vyabo, ni jewe Uhoraho Nyeninganji ndabivuze."