1 Maze ankura aho, anjana inyuma ahaherereye mu buraruko, anshikana ku twumba turabana n’imbuga y’Ingoro iri imbere y’uruhome rw’inyuma rwo mu buraruko. 2 Inzu yari ifise umuryango waraba mu buraruko yari ifise ingero z’igice c’ukuboko ijana* z’uburebure na mirongo itanu* z’ubwaguke. 3 Hari ku ngero z’igice c’ukuboko mirongo ibiri* uvuye ku rugo rw’imbere, hakaba ku mbuga ishasheko amabuye y’urugo rw’inyuma, n’aho amabaraza y’utwumba twari tugerekeranye dutatudutatu yari ari. 4 Imbere y’utwo twumba hari inzira ipima ingero z’igice c’ukuboko cumi z’ubwaguke n’ingero z’igice c’ukuboko ijana* z’uburebure, kandi imiryango yatwo yaraba mu buraruko. 5 Utwumba two hejuru twari dutoduto ku two musi n’utwo hagati, kuko twagabanywa n’amabaraza yatwo. 6 Utwumba two hejuru nta nkingi twari dufise, ni co gituma twari dutoduto amaja hasi kurusha utwo hagati n’utwo musi. 7 Uruhome rwo hanze rubangabanganye n’utwumba hamwe n’intangaro rwari rufise uburebure bw’amakika bw’ingero z’igice c’ukuboko mirongo itanu*. 8 Mu gihe uburebure bw’amakika bw’utwumba tw’aharaba mu rugo rw’inyuma bwari ingero z’igice c’ukuboko mirongo itanu, utwegereye Ingoro two twari dufise ingero z’igice c’ukuboko ijana. 9 Utwumba two hasi twari dufise umuryango uraba mu buseruko, abawucamwo ni ababa bavuye mu rugo rw’inyuma.

10 Ku ruhande rwo hepfo ahabangabanganywe n’urugo rw’inyuma, ahahurira imbuga y’imbere y’Ingoro n’uruhome rw’inyuma hari utwumba tubiri. 11 Inzira yari imbere yarwo yasa n’inzira y’imbere y’utwumba tw’ahaherereye mu buraruko. Twose twarangana mu burebure no mu bwaguke. Imiryango yatwo yarangana, n’inzugi zatwo zarangana n’iy’amaja mu buraruko. 12 Inzugi z’utw’ahaherereye mu bumanuko na zo ni ko zari zimeze. Aho inzira iherera hari urugi, kandi iyo nzira yari ibangabanganywe n’uruhome rw’ahaherereye mu buseruko, iyo abantu bacamwo bagiye mu twumba.

13 Maze arambwira ati: "Utu twumba na two tw’ahaherereye mu buraruko n’utw’ahaherereye mu bumanuko turaba ku mbuga y’Ingoro, ni utwo abaherezi begera Uhoraho bazoriramwo ibimazi vyejejwe cane. Ni ho bazotereka amashikanwa, ari ay’ifu, ari amashikanwa yo guhonga ivyaha, ari ayo gukurako urubanza, kuko ari ikibanza cejejwe. 14 Abaherezi bavuye Ahera, ntibazoca basohoka ngo baje mu rugo rwo hanze. Bazobanza kwambura imyambaro bari bambaye bariko barakora igikorwa c’ubuherezi, kuko ico kibanza barimwo ari icera. Bazokwambara izindi mpuzu imbere yo kwegera ibindi bibanza abandi bantu bose bazoba barimwo."

15 Ahejeje gupima ivy’imbere mu Ngoro, aransohokana duciye mw’irembo ry’aharaba mu buseruko, apima urugo impande zose. 16 Apima uruhande rw’ahaherereye mu buseruko, akoresheje ya nkoni. Rwari rufise uburebure bw’amakika bw’ingero z’igice c’ukuboko amajana atanu*. 17 Apima uruhande rw’amaja mu buraruko. Rwari rufise uburebure bw’ingero z’igice c’ukuboko amajana atanu. 18 Apima n’uruhande rw’amaja mu bumanuko. Rwari rufise uburebure bw’amakika bw’ingero z’igice c’ukuboko amajana atanu. 19 Hanyuma arahindukira apima urw’amaja mu buseruko. Rwari rufise uburebure bw’amakika bw’ingero z’igice c’ukuboko amajana atanu. 20 Yongera apima n’imbuga ikikuje izo mpande zine, na yo ikaba yari ikikujwe n’uruhome. Hari ingero z’igice c’ukuboko amajana atanu ku ruhande rumwerumwe, kandi hatandukanya ahera n’ahasanzwe.