1 Mu mwaka ugira icumi, mu kwezi kw’icumi, ku musi w’icumi na kabiri, umwami Yehoyakini ari mu kinyago, ijambo ry’Uhoraho ryatumwe kuri jewe riti: 2 "Mwana w’umuntu, hindukira uhange amaso Farawo, umwami wa Egiputa, umuvugishweko hamwe n’abantu bose ba Egiputa. 3 Umubwire uti: ‘Uku ni ko Uhoraho Nyeninganji avuze:

Nzokugwanya yewe Farawo, mwami wa Egiputa,

wa gisizimwe kiryamye hagati y’inzuzi zawe.

Kuko wibwira uti: Uruzi Nili ni urwanje;

ni jewe narwiremeye.

4 Ariko nzoshira igera mu mibangabanga yawe,

amafi yo mu nzuzi zawe ndayomeke mu bigaragamba vyawe.

Nzogukwega ndagukure hagati y’izo nzuzi,

uko wakabaye amafi yose yometse mu bigaragamba vyawe.

5 Nzoguterera mu bugaragwa,

mwe n’amafi yo mu nzuzi zawe.

Uzogwa mu gahinga, kandi nta wuzoguhamba,

nta n’uwuzokwegeranya ibisigarira vyawe.

Nzokugaburira ibikoko vyo kw’isi

n’inyoni zo mu kirere.

6 Maze abo muri Egiputa bose bazomenya ko ndi Uhoraho,

mwabereye inzu ya Isirayeli icishimikizo kimeze nk’inkoni y’irenga. 7 Igihe bagufata ngo bakwishimikize wavunikiye mu maboko yabo, maze ubakomeretsa igitugu; igihe bakwegamira, waravunitse baca bagwira umugongo, bavunika amafyigo.

8 None rero uku ni ko jewe Uhoraho Nyeninganji mvuze: Nzoguteza inkota, mponye abantu bawe n’ibitungwa vyabo. 9 Egiputa hazocika agahinga, habe amashamba. Ni ho bazomenya ko jewe ndi Uhoraho.

Kuko wavuze uti: Uruzi Nili ni urwanje, ni urwo niremeye, 10 ni co gituma nzokugwanya, nkagwanya n’inzuzi zawe, igihugu ca Egiputa nkakigira agahinga, kuva i Migidoli gushika muri Asuwani no ku mbibe za Etiyopiya. 11 Nta maguru y’abantu canke y’ibikoko azosubira kugicamwo; kizomara imyaka mirongo ine atabakibamwo. 12 Egiputa nzokigira umusaka, kibe agahinga hagati mu bindi bihugu vyabaye agahinga, umugwa waho ube umusaka hagati mu yindi migwa yabaye imisaka. Abanyegiputa na bo nzobashwiragiza mu mahanga, basabagire mu bindi bihugu.

13 Ariko uku ni ko jewe Uhoraho Nyeninganji mvuze: Inyuma y’imyaka mirongo ine nzokwegeranya Abanyegiputa ndabakure iyo bashwiragiriye. 14 Nzobakura mu buja, ndabasubize ruguru muri Egiputa, igihugu ca ba sekuruza babo. Ariko bazoguma ari ubwami butoya. 15 Buzokwama ari ubwami butoya mu bundi bwami, ntibuzokwigera busubira kwishira hejuru y’ayandi mahanga. Nzobugira ubwami buto cane, butazigera busubira kuganza ayandi mahanga. 16 Egiputa ntikizosubira kuba ivyizigiro vy’Abisirayeli, ariko kizoba icibutso c’icaha bakoze mu kugihindukirira ngo kibatabare. Maze Abisirayeli bazomenya ko ari jewe Uhoraho Nyeninganji jenyene.’ "

17 Mu mwaka ugira mirongo ibiri n’indwi, mu kwezi kwa mbere, ku musi wa mbere, umwami Yehoyakini ari mu kinyago, ijambo ry’Uhoraho ryatumwe kuri jewe, riti: 18 "Mwana w’umuntu, Umwami Nebukadineza, umwami w’i Babiloni, yakoresheje igikorwa kigoye ingabo ziwe mu kugwanya Tiro. Ingabo ziwe zahatobokeye ubuhanza, ibitugu vyabo vyuzurako inguma. Ariko yaba umwami, yaba ingabo ziwe, nta wagize ico akura muri Tiro ku bw’ibitero bagize kuri ico gisagara. 19 None rero uku ni ko jewe Uhoraho Nyeninganji mvuze: Ngiye guha Nebukadineza umwami w’i Babiloni Egiputa, atware ubutunzi bwaho. Azonyaga ivyo muri ico gihugu bibe impembo y’ingabo ziwe. 20 Nzomuha Egiputa nk’impera ku bw’igikorwa we n’ingabo ziwe bankoreye, ni jewe Uhoraho Nyeninganji ndabivuze.

21 Ico gihe nzokwongera inkomezi Abisirayeli, kandi nawe Ezekiyeli, nzoguha ububasha kugira ngo ushobore kuvugana na bo. Ni ho bazomenyera ko jewe ndi Uhoraho."