1 बिधाते ज़ै-ज़ैकार, तेऊओ करा शूकर,

किल्हैकि सह आसा भलअ अर सह झ़ूरा हाम्हां लै सदा।

2 बिधाता ज़ुंण महान काम किऐ तेता निं कुंण गणी सकदअ,

तेता लै तेऊए ज़ेतरी बी ज़ै-ज़ैकार करे सह आसा थोल़ी।

3 बिधाता दैआ तिन्‍नां लै बर्गत ज़ुंण शुचै आसा

अर ज़ुंण सदा भलै काम करा।

4 हे बिधाता, ज़ेभै तूह आपणीं परज़े मज़त करे, तेभै निं मुंह बिस्सरी पाई,

तिन्‍नां संघै बच़ाऊऐ तूह मुंह बी।

5 ताकि हुंह तेरै छ़ांटै दै मणछा सफल हंदै भाल़ी सकूं,

संघा हुंह बी तिन्‍नें खुशी दी साझ़ू हई हऊं अर

तेरी आपणीं परज़ा संघै हुंह बी तेरी बड़ैई करूं।

6 म्हारै भलै हुऐ तिहै ई पाप ज़िहै म्हारै दाद-बाब करा तै,

हाम्हैं किऐ घोर कदुष्ट काम!

7 ज़ुंण महान अर नुआहरै काम तंऐं मिसर देशै किऐ, तेता निं म्हारै दाद-बाब समझ़ी बोल़ै,

तिन्‍नैं पाअ कई बारी बिस्सरी कि तूह तिन्‍नां लै किहअ खास्सअ झ़ूरा,

लाल समुंदरे बाढै किअ त तिन्‍नैं तूह पिठी पिछ़ू लै!

8 पर तंऐं बच़ाऊऐ तिंयां, ज़ेही तंऐं ज़बान थिई दैनी दी,

ताकि तेरअ महान बल प्रगट होए।

9 तंऐं किअ लाल समुंदरा लै हुकम

अर सह हुअ मांझ़ा-मांझ़ी शुक्‍कअ!

संघा टपाऊई तंऐं आपणीं परज़ा तैहा शुक्‍की ज़ैगा बाती समुंदरा पार।

10 तंऐं बच़ाऊऐ तिंयां तिन्‍नां का ज़ुंण तिन्‍नां संघै ज़ीद करा तै,

तंऐं बचाऊऐ तिंयां तिन्‍नें दुशमणा का।*

11 पर तिन्‍नें दुशमण डुबै लाल समुंदरे पाणीं दी सोभै,

तिन्‍नां मांझ़ै निं कुंण एक बी ज़िऊंदअ रहअ।

12 तेखअ किअ तिन्‍नैं तेरी गल्‍ला दी विश्वास,

संघा लागै गिहा बोली तेरी ज़ै-ज़ैकार करदै।

13 पर तेतरी गऐ तिंयां झ़ट च़ारै तेरै कामां बिस्सरुई!

संघा गऐ तेरी सलाह बाझ़ी आपणैं साबै काम करदै लागी!

14 तिन्‍नैं डाहअ सिधअ आपणैं पेटो धैन,

संघा लागै उज़र रेगीस्तानै तिंयां ताह परमेशरा पटंकदै।

15 तंऐं दैनअ तिन्‍नां लै ज़िहअ तिन्‍नैं मांगअ तिहअ,

पर बादा का पाऐ तंऐं घोर बमारी करै मारी।

16 रेगीस्तानै लागै तिंयां खिम्भे दला दी मोसा अर हारणा संघै ज़ीद डाहंदै

ज़ुंण तेरै पबित्र दास थिऐ।

17 तेखअ धुआशुई धरती ओर्ही-पोर्ही,

संघा डुबै तेथ दतान, अबीराम तिन्‍नें टबरे टोली संघी।

18 ज़ुंण तिन्‍नां कदुष्टे साथा होर थिऐ,

तिन्‍नां लै पल़ी सरगा का बीज अर तिंयां हुऐ सोभ खतम।

19 तिन्‍नैं बणाअं होरेब धारा गोधै सुन्‍नेंओ बाछ़ू,

संघा लागै तैहा मुहुर्तीए पूज़ा करदै!

20 तिन्‍नैं बदल़अ ताह बिधातो महान प्रतप्प

घाह खाणैं आल़ै पशूए रुपै!

21 तिंयां बिस्सरुऐ तेऊ परमेशरा ज़ुंणी तिंयां बच़ाऊऐ तै!

ज़ुंणी मिसर देशै नुआहरै-नुआहरै महान काम किऐ तै!

22 तंऐं भाल़ तिधी किहै-किहै महान काम किऐ तै!

लाल समुंदरै भाल़ तंऐं किहै नुआहरै काम रहैऊऐ तै!

23 ज़ांऊं तंऐं तिधी रोश्शै इहअ बोलअ कि मंऐं लाऐ ईंयां सोभै पठी खतम करी,

तिधी किई तेरै आप्पू लै छ़ांटै दै दास मोसा ताखा अरज़ कि इहअ निं करी,

तै हुअ तेरअ कोप ठांढअ संघा बच़ै तिंयां मरनै का।

24 तेखअ समझ़अ तिन्‍नैं दिला लोभणैं आल़अ सह देश बी बृथा!

किल्हैकि तिन्‍नैं निं तेरी गल्‍ला दी विश्वास डाहअ।

25 तिंयां रहै आपणैं खिम्भे डेरै पल़ी बखर्दै लागी,

तिन्‍नैं निं ताह बिधाते गल्‍ल मनी!

26 तंऐं दैनी तिन्‍नां लै एही चतैनगी,

"ईंयां करनै मुंह एऊ रेगीस्तानै ई खतम।

27 इने आद-लुआद छिंगणी मुंह होरी ज़ाती जैंदरी,

इना दैणअ मुंह पराऐ देशै मरनै।"

28 तेखअ लागै भाल़ तिंयां बाल-पोर देअए पूज़ा करदै,

संघा उझ़ुऐ मुल्दै लै बल़ीदान किई दी शिखा खांदै!

29 आपणैं इना कदुष्ट कामां करै ठैऊई तिन्‍नैं ताल्है रोश्शै,

तेखअ पल़ी बै तिन्‍नां जैंदरी नबिज़री बमारी।

30 पर तेखअ निखल़अ पिनहास हिम्मत करी आजू संघा दैनी तिन्‍नां लै सज़ा ज़ुंण दोशी थिऐ,

तैबै जाई करै हुई सह नबिज़री बमारी खतम।

31 तेऊए अह गल्‍ल करनी आजू बी सदा

पोस्ती दर पोस्ती आद।

32 मरीबा नाओंए सोबल़ा सेटा बी ठैऊई तिन्‍नैं ताह बिधाता लै रोश्शै,

तेता पिछ़ू पल़ी तेरै दास मोसा लै बडी आफ़त।

33 तिन्‍नैं हंतअ मोसा* खास्सअ,

खिरी बोलअ तेऊ बाझ़ी बच़ारै।

34 इज़राईली निं तिंयां कदुष्ट मणछ मारै आथी,

ज़हा लै बिधाता इहअ बोलअ त कि इना निं ज़िऊंदै छ़ाडी,

35 पर तिंयां घूल़ै-मिल़ै तिन्‍नां देशे लोगा संघै आप्पू पै,

संघा शिखल़ै तिन्‍नें इहै रिती-रबाज़ ज़ेता का तूह बिधाता नराज़ हआ।

36 तिंयां लागै मुहुर्ती पूज़दै अर

सह ई हुई तिन्‍नां लै बरैबाद करनै आल़ी फाही।

37 होर ता होर तिन्‍नैं किऐ कनान देशै आपणैं शोहरू-शोहरी तोही

भूत-बशाचे मुहुर्ती लै बल़ीदान!

38 तिन्‍नैं किई तिन्‍नां नर्दोश लान्हें हत्या,

तैही लागी तेऊ सारै देशै तिन्‍नां हत्या करनै आल़ेए छ़ोत।

39 तिंयां हुऐ तिन्‍नें आपणैं कदुष्ट कामां करै छ़ोतलै,

तिन्‍नों मुहुर्ती पूज़णा लै झ़ूरनअ शुझुअ ताह बिधाता का कंज़रैई करनै ज़िहअ पाप।

40 तैही आई ताह बिधाता इना इहै मणछा लै रोश्शै,

ताह हुई तिन्‍नां का खास्सी नफरत।

41 तेखअ डाहै तंऐं तिंयां पराई ज़ातीए लोगा जैंदरी शोटी,

तंऐं दैनअ तिन्‍नां प्रैंदै तिन्‍नें दुशमणा राज़ करनै।

42 तिन्‍नें दुशमणै मारै तिंयां हंती-हंती,

तिंयां आणै तै तिन्‍नैं पठी हारी-मारी।

43 तूह बिधाता रहअ तिन्‍नां हर बगत बच़ाऊंदअ लागी,

पर तिंयां रहै ताल्है द्रोह करदै लागी

अर होर बी खास्सै पाप करदै लागी!

44 ज़ांऊं खास्सी खरीए पलका ताखा तिन्‍नें लेर-पकार शुण्हुंई,

तूह निं तज़ी बी तिन्‍नें मज़त करनै का पिछ़ू हटअ।

45 तंऐं डाही तिन्‍नें भलाईए तैणीं आपणीं करार आद,

तूह आसा इहअ महान कि तूह झ़ूरा खास्सअ अर तंऐं किई तिन्‍नां लै झींण।

46 तंऐं बझ़ैल़ी तेखअ तिन्‍नां का बी झींण करनै

ज़ुंणी तिंयां गलाम तै डाहै दै बणाईं।

47 ए म्हारै परमेशर बिधाता, हाम्हां बच़ाऊ,

हाम्हां पजैल़ देशा-देशा का झाल़ी करै बापस,

ताकि हाम्हैं तेरअ शूकर करी सके अर

तेरै पबित्र नाओंए ज़ै-ज़ैकार करी सके।

48 इज़राईले परमेशर बिधाते करा ज़ै-ज़ैकार,

तेऊए करा आझ़ा पोर्ही सदा ज़ै-ज़ैकार!

सोभै बोला, "एवमस्तू!" बिधाते लोल़ी सदा ज़ै-ज़ैकार हुई।