Salmos 125

बिधाता डाहा आपणीं परज़ा राज्ज़ी-राम्बल़ै

हांढा लै राज़ै दाबेदे गिह

1 ज़ुंण बिधाता दी भरोस्सअ डाहा, तिंयां आसा सियोन पर्बता ज़िहै,

ज़ुंण नां च़ुकदअ अर नां कधि ओर्ही-पोर्ही सिक्‍कदअ।

2 ज़ेही एरुशलेम नगरी फेर-फिरदी धारा आसा,

तिहअ रहणअ बिधाता आपणीं परज़ा फेर

आझ़ा पोर्ही सारी-सदा लै।

3 धर्मीं मणछे ज़ैगा प्रैंदै निं कदुष्ट मणछो राज़ सदा रहंदअ,

ताकि धर्मीं मणछ कदुष्ट मणछा ज़िहै कदुष्ट कामां बाखा नां फिरे।

4 बिधाता करा तिन्‍नां लै भलअ ज़ुंण भोल़ै आसा अर

ज़ुंण तेऊए हुकम मना।

5 पर ज़ुंण तेता का उंबल़ी बाता डेओआ,

तिन्‍नां लै दैआ सह तेही ई सज़ा ज़ेही कदुष्ट मणछा भेटा*125:5 सज़ा ज़ेही कदुष्ट मणछा भेटा तिन्‍नां भेटा घोर सज़ा।

सोभी इज़राईली लै लोल़ी मेल़-ज़ोल़ हुअ।