भज़न 142

सिधअ बिधातो आसरअ

ज़धू राज़अ दाबेद जुहल़ी त लुक्‍कअ द, तधू बोलअ त तेऊ बिधाता का अरज़ करना लै अह भज़न

1 हे बिधाता, हुंह मांगा ताखा मज़त,

हुंह पाआ ताह सेटा लेर-पकार।

2 हुंह खोज़ा आपणीं पठी खरी ताखा,

हुंह खोज़ा ताखा ई कि मुल्है किज़ै-किज़ै आफ़त आसा पल़ी दी।

3 ज़ेभै मुखा छ़ाड़ च़ाल्‍ली छ़ुटी,

तेभै हआ तिधी तूह ई मेरी मज़त करदअ।

ज़हा बाता हुंह डेऊई च़ाल्‍लअ त,

तेथ थिअ मेरै दुशमणै मुल्है खल़ाक्‍की डाही दी ढोही।

4 हुंह लागअ ओर्ही-पोर्ही भाल़अ,

पर मुखा निं तेथ कोहै शुझुअ,

ज़ुंण मुंह बच़ाऊई सके!

मुंह निं कुंण पुछ़णै आल़अ बी भेटअ।

5 हे बिधाता, मंऐं पाई ताह सेटा लेर-पकार कि तूह कर मेरी मज़त,

मुंह बच़ाऊंणै आल़अ आसा तूह ई,

आपणीं ज़िऊंदी ज़िता च़ाहा हुंह सिधअ ताह ई।

6 मेरी लेर-पकार शुण कि हुंह मांगा ताखा मज़त,

मेरी हुई ऐबै खास्सी बूरी दशा,

मुंह बच़ाऊ इना मेरै दुशमणा का!

किल्हैकि मुखा निं इना जोगी ज़ोर आथी।

7 एऊ कैद खानै का काढ मुंह पोर्ही,

तै करनी मुंह तेरै धर्मीं मणछे सभा दी तेरी ज़ै-ज़ैकार,

किल्हैकि तंऐं किई मुल्है खास्सी भलाई।