सारअ संसार खोज़ा इहअ कि बिधाता केतरअ महान आसा
1 सरग करा ऐहा गल्ला प्रगट कि परमेशर किहअ महान आसा,
एता भाल़ी जाआ थोघ लागी कि परमेशरै केही-केही कारीगीरी आसा किई दी!
2 एक धैल़ी खोज़ा दुजी धैल़ी का परमेशरे बारै गल्ला अर
राच करा दुजी राची का परमेशरो ज्ञैन प्रगट।
3 नां तिन्नें बोली-भाषा आथी अर
नां तिन्नें गल्ला शुण्हदी।
4 तज़ी बी पुजा सारी पृथूई दी तिन्नों समाद अर
तिन्नें गल्ला शुण्हिंआं सारै संसारै।
बिधाता आसा सुरज़ा लै खिम्भ बणाअं द,
5 सह निखल़ा दोत्ती तेता का लाल़ै ज़िहअ तैर्हुई अर
सह हआ शूरबीरा ज़िहअ ठुहर दैणा लै तैर।
6 सह शुझिआ सरगै एकी पुंझ़ा का
दुजै पुंझ़ै तैणीं हांढदअ अर
तेऊए तात्तै धुप्पै का निं कोहै लुक्की सकदअ।
बिधातो बधान
7 बिधातो बधान आसा शुचअ-पाक्कअ,
सह दैआ नऊंईं ज़िन्दगी।
तेऊए हुकम आसा शुचै-पाक्कै अर
तेता करै एछा आम मणछा अक्ल।
8 बिधातो बधान आसा भलअ,
ज़ुंण तेता मना तिंयां रहा खुश।
बिधाते हुकम आसा प्रैश्शै ज़िहै अर
तिंयां दैआ ज़िऊंणें बुध।
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)