बिधाते पबित्र ज़ैगा कुंण सका डेऊई?
राज़ै दाबेदो भज़न
1 सारी पृथूई अर तेते हर च़िज़ा आसा बिधाते,
सारअ संसार अर सोभै मणछ बी आसा बिधाते।
2 बिधाता ई आसा धरतीए आथरी डुघै समुंदर अर
बडै-बडै दरैऊआ दी पाक्की डाही दी।
3 बिधाते धारा प्रैंदै कुंण सका उखल़ी?
तेऊए पबित्र ज़ैगा कुंण सका खल़अ हई?
4 सिधै तिंयां ज़सरै काम अर बच़ार भलै आसा,
ज़ुंण मुहुर्ती नांईं पूज़दै अर
ज़ुंण झ़ुठी ज़बान निं करदै।
5 बिधाता दैणीं तिन्नां लै बर्गत अर तेऊ डाहणैं तिंयां बच़ाऊई,
तिंयां ई बणाणैं बिधाता आप्पू संघै धर्मीं।
6 इहै मणछ ई करा परमेशरे लोल़-तोप,
ईंयां ई मणछ सका याकबे परमेशरा सेटा एछी।
7 पैहलकै ज़मानैं ओर्हीए
उछ़टी-बिरली प्रऊल़ी खोल्हा
ताकि महान प्रतप्पी राज़अ भितरा लै एछी सके।
8 महान प्रतप्पी राज़अ कुंण आसा?
सह आसा परम प्रधान परमेशर बिधाता ज़हा का सारअ बल आसा अर
ज़ुंण जुधा लै सोभी का बडअ जोधअ आसा।
9 पैहलकै ज़मानैं ओर्हीए
उछ़टी-बिरली प्रऊल़ी खोल्हा
ताकि महान प्रतप्पी राज़अ भितरा लै एछी सके।
10 महान प्रतप्पी राज़अ कुंण आसा?
सह आसा स्वर्गे सारी सैनो मालक बिधाता।