1 हे बिधाता, मेरै हुऐ खास्सै दुशमण!

मुंह संघै लागै खास्सै झ़घल़दै!

2 कई आसा इहअ बोल्दै लागै दै,

"बिधाता निं एऊ बच़ाऊंदअ च़ाल्‍लअ एछी!"

3 पर हे बिधाता, खातरै का हर बगत बच़ाऊंणा लै आसा

तूह ई मेरी ढाल़

तूह ई आसा मेरी इज़त ज़ुंण मुंह हर बगत ज़ीत दैआ।

4 हुंह करा ताह बिधाता सेटा ज़ोरै-ज़ोरै अरज़

अर तूह दैआ मुल्है तेरी पबित्र धारा का ज़बाब।

5 हुंह सुत्ता राची निहंचै निंजा

किल्हैकि तूह बिधाता करा मेरी फाज़त।

6 फेरा-फेर मुंह हारदै-मारदै आऐ दै

हज़ारो दुशमणा का निं हुंह डरदअ।

7 हे मेरै परमेशर बिधाता, तूह एछ इना कदुष्टा का मुंह बच़ाऊंदअ आप्पै!

मेरै दुशमणे थोथरै बाह च़टराल़ै

अर तिन्‍नें दांदे माल़ा शोट धरनीं,

8 किल्हैकि तूह दैआ आपणैं लोगा लै बर्गत

अर तिन्‍नां लै ज़ीत दैणैं आल़अ आसा तूह बिधाता आप्पै।