1 ए धर्मीं मणछो,

ज़ुंण बिधाता किअ, तेता लै करा तेऊए ज़ै-ज़ैकार।

किल्हैकि धर्मीं मणछा शोभा अह ई गल्‍ल।

2 बिधातो करा बींन बाज़ी करै शूकर,

दस तारा आल़ै बाज़ै बाज़ी बोला तेऊओ भज़न।

3 बिधाते गांठा एक नऊंईं गिह,

तेऊ लै बाज़ा बधिया रागा दी बींन।

4 ज़ुंण बिधाता बोला, तिंयां गल्‍ला हआ शुची।

सह निं किछ़ू कामां लै भेदभाब करदअ

5 सह झ़ूरा धर्म अर नसाफ करना लै,

तेऊए झींण आसा पृथूई दी सोभी लै हर ज़ैगा।

6 बिधाता बणाअं खाखा का बैण बोली सारअ भ्रमंड,

ज़िहअ सह खाखा बोल्दअ रहअ तिहै ई रहै सुरज़, ज़ोथ अर सोभै तारै बणदै लागी।

7 तेऊ झाल़अ समुंदरो पाणीं एकी बाखा लै,

संघा डाहै डुघै समुंदरे पाणींए भढार भरी।

8 पृथूईए सोभी ज़ीबा लागा बिधाते डरा हेठै रहणअ,

धरती दी ज़ेतरै मणछ आसा, तिन्‍नां लागा तेऊए ज़ै-ज़ैकार करनी।

9 किल्हैकि ज़िहअ ई बिधाता बैण बोलअ, संसार बणअ तिहअ ई,

ज़िहअ तेऊ हुकम किअ, सह हुअ तिहअ ई प्रगट।

10 देशा-देशे लोग च़ाऐ ज़ेही बी बिक्री सोठे;

तिंयां हआ तेऊ सेटा बृथा,

सह निं तिन्‍नें तरकिबा सफल दैंदअ हणैं।

11 पर ज़ुंण बिधाता आप्पू सोठा सह हआ तिहअ ई,

ज़ुंण सह सोठा, सह रहा पोस्ती दर पोस्ती अटल़,

12 तेऊ देशा लै आसा खास्सी बर्गत ज़सरअ परमेशर बिधाता आसा,

तेऊ समाज़े लोग रहणैं खुश ज़हा सह आप्पू लै छ़ांटा।

13 बिधाता हआ स्वर्गा का उंधै भाल़अ लागअ द,

तेऊए आछ हआ हरेकी मणछा दी लागी दी।

14 सह रहा आपणीं राज़गाद्दी प्रैंदै बेशी

धरती दी बस्सै दै सोभी मणछा ज़ाच़दअ लागी।

15 मणछो मन्‍न आसा तेऊ ई बणाअं द,

तेऊ का हआ तिन्‍नें सोभी कामें बारै थोघ।

16 कोही बी राज़ै का केतरी बी खास्सी सैना किल्है निं होए,

सह निं तेते आसरै ज़िती सकदअ अर

नां कुंण शूर-बीर जोधअ आपणैं ज़ोरै छ़ुटी सकदअ।

17 घोल़ै आसरै निं जुध ज़िती सकदै,

तिन्‍नों खास्सअ बल बी निं मणछा बच़ाऊई सकदअ।

18 पर बिधाता रहा तिन्‍नां भाल़अ लागी ज़ुंण तेऊओ अदर करा,

अर ज़ुंण तेऊए झींण करने आशा डाहा।

19 सह बच़ाऊआ तिन्‍नां मरनै का,

घोर नकाल़ा जैंदरी बी डाहा तिन्‍नां ज़िऊंदै।

20 हे बिधाता, हाम्हैं आसा तेरै आसरै,

तूह कर म्हारी मज़त, हाम्हां डाह बच़ाऊई।

21 ताह बिधाता करै हआ म्हारै दिलै खुशी,

किल्हैकि हाम्हैं करा ताह पबित्र परमेशरा दी भरोस्सअ।

22 हे बिधाता, हाम्हां लै दै आपणीं बर्गत,

हाम्हां लै कर झींण, ज़ेही हाम्हैं ताखा आशा डाहा।