बिधाता करा हर बगत भलअ
राज़ै दाबेदो शिग्गायोन नाओं भज़न। अह भज़न बोलअ त तेऊ बिधाता सेटा बिन्यामीन गोत्रे कूशा पिछ़ू।
1 हे मेरै परमेशर बिधाता, हुंह एछा तेरी शरणा दी,
ज़ुंण मुंह पिछ़ू आसा पल़ै दै,
तूह बच़ाऊ मुंह तिन्नां का संघा दै मुल्है छ़ुटकारअ।
2 इहअ निं हआ कि तिंयां मुंह सिहा ज़िहै धेल़े-च़िरे
अर ज़िधी मुंह बच़ाऊंदअ कोहै निं होए
अर तिंयां मेरै च़िथल़ै-च़िथल़ै करे!
3,4 हे मेरै परमेशर बिधाता, ज़ै मंऐं कहा लै बूरअ किअ होए,
ज़ै मंऐं कहा साथी-संघी लै धोखअ किअ होए,
ज़ै मंऐं थोघै बाझ़ी आपणैं दुशमणा लै बी ज़ुल्म किअ होए,
ज़ै मंऐं इना मांझ़ै एक बी गलती किई होए
5 तै दैऐ तूह मेरै दुशमणा मेरअ पिछ़अ करनै अर ढाकणैं,
तै दैऐ तूह तिन्नां मुंह मारी पाणै
अर मेरी ल्हासा माट्टै जैंदरी बदल़ी डाहणैं।
6 हे बिधाता, तूह आण आप्पू लै रोश्शै!
रोश्शै लाल-पिंऊंल़ै हुऐ दै मेरै दुशमणा सम्हनै हअ तूह मेरी तैणीं आप्पै खल़अ,
ऐबै कर तूह ई मेरी मज़त अर
तंऐं आसा हेरअ द नसाफ करी।
7 देशा-देशे लोगो झाल़अ लोल़ी ताह फेर हुअ अर
तंऐं लोल़ी तिन्नां प्रैंदै आपणअ आसन लाई राज़ किअ।
8 हे बिधाता, तूह दैआ सोभी लोगा लै नसाफ।
ऐबै कर तूह मेरअ बी नसाफ,
ताखा आसा थोघ कि हुंह आसा नर्दोश।
9 तूह बिधाता आसा धर्मीं अर
तूह हेरा म्हारै मन्न अर बच़ार परखी।
इना कदुष्टे ज़ुल्म कर खतम अर
धर्मीं मणछा लोल़ी भलअ फल भेटअ।7:9 प्रका. 2:23
10 बिधाता करा मेरी फाज़त अर
ज़ुंण दिले शुचै आसा, तिन्नां डाहा सह बच़ाऊई।
11 परमेशर आसा धर्मीं अर सह करा नसाफ अर
कदुष्टा लै दैआ सह कबल्ली सज़ा।
12 ज़ै कदुष्ट मणछ बूराईए बाता का पिछ़ू नांईं हटे,
बिधाता डाहणीं आपणीं तलबार पल़ैई अर
आपणअ धणश डाहणअ तैर करी।
13 तेऊ च़कणै आपणैं इहै शस्त्र ज़ुंण प्रल़या करा,
संघा छ़ाडणैं तेऊ आपणैं ज़ल़दी आगीए कतीर।
14 कदुष्ट मणछ सोठा ज़ुल्म ई करने बारै,
तिंयां सोठा उपद्रभ करने बारै संघा करा आफ़त खल़ी।
15 पर ज़ुंण खात्ती तिंयां होरी लै खण्हां अर
ज़ुंण ज़बाल़ तिंयां होरी लै ढोहा, तेथ मरा तिंयां आप्पू ई।
16 तिंयां ज़ुंण उपद्रभ करा अर होरी लै आफ़त पाआ,
सह हआ तिन्नें आपणैं ज़िऊआ लै ज़ज़ाल़।
17 हुंह करा परम प्रधान परमेशर बिधातो शूकर कि तेऊ किअ नसाफ,
मुंह करनी भज़न बोली तेऊए ज़ै-ज़ैकार।