Salmos 81

बिधाता दैआ हाम्हां लै बल

गाज़ै-बाज़ै आल़ेए सैणैं लै: गित्तीथ रागा दी असापो भज़न

1 म्हारअ बल आसा परमेशर, तेऊए करा ज़ोरै-ज़ोरै ज़ै-ज़ैकार,

ज़हा परमेशरा याकब मना, तेऊओ बोला भज़न!

2 गिहा बोला, संघा बाज़ा डफली, बींन, सरनाई

अर भांती-भांतीए बाज़ै।

3 तेऊए थैरा लै अर

पुनूंईए धैल़ै बाज़ा नर्शिंगै।

4 ज़हा परमेशरा याकब मना,

तेऊ आसा इज़राईला लै अह ई बधान खोज़अ द।

5 तेऊ दैनअ अह बधान युसुफे खिंब इज़राईली लै तधू,

ज़धू मिसर देशे खलाफ जुध छ़ेल़अ।

तिधी शूणैं मंऐं पाखली बोली दी इहै बोल:

6 "थारी कान्हो बोझ़अ काढअ ऐबै मंऐं पोर्ही अर

थारी पिठीओ गर्कअ भर्टू बशैल़अ मंऐं धरनीं।

7 खरीए पलका पाई तम्हैं मुंह सेटा लेर-पकार, ऐबै हेरै मंऐं तम्हैं बच़ाऊई।✝81:7 लुआ. 17:1-7; गण. 20:2-13; भज. 95:8,9

ज़िधा का गुल़ूबिज़ल़ू लागा, तैहा गुप्त ज़ैगा का शूणीं मंऐं थारी अरज़।

मरीबा नाओंए सोबल़ा सेटा हेरै मंऐं तम्हैं परखी।

8 इज़राईलीओ, शूणां, तम्हैं आसा मेरी परज़ा, मंऐं डाहै तम्हैं नैरी कि

भलअ हणअ त इहअ कि तम्हैं मेरी ई शुणदै!

9 तम्हैं निं हेरे होरी देअआ पूज़दै लागी।

10 हुंह बिधाता ई आसा थारअ परमेशर

ज़ुंणी तम्हैं मिसर देशे गलामी का आसा छ़ड़ैऊई आणै दै।

तम्हां आसा सिधी बोल़णें बेर, हुंह दैंऊं थारी ज़रुरतीए सोभै गल्‍ला।

11 पर तम्हैं मेरी खास परज़ा निं मेरी गल्‍ला शूणीं!

अर तम्हैं इज़राईली निं मुल्है झ़ूरै!

12 मंऐं दैनअ तम्हां थारी हठी दी रहणैं कि

ज़ेही थारी सलाह होए, तम्हैं लागे तिहअ ई करदै।

13 भलअ हणअ त इहअ कि तम्हैं मेरी परज़ा

ज़िहअ हुंह बोले तिहअ ई शुणदै अर करदै!

14 तै करनै तै मुंह घल़ी-पला दी थारै दुशमण खतम अर

थारै बैरी पल़णीं ती मेरी मार।

15 ज़ुंण मुंह बिधाता लै नफरत करा, तिन्‍नां रघोल़णअ त मुंह सेटा नाक,

तिंयां हणैं तै सदा लै शर्मिंदै।

16 पर तम्हैं रज़ैऊंणै तै मुंह बधिया का बधिया कणके रोटी अर

बणें मखीरा खैऊई करै।"