Isaías 26

परमेशरो रा एक स्तुतिया रा गीत

1 मोआबो रे नाशो रे दिने यहूदा रे लोका ये गाणा गाणा,

"म्हारा एक मजबूत शईर ए! परमेशर म्हारे शईरो री रक्षा करोआ, से एक दवाला जेड़ा ए।

2 शईरो रे बड़े द्वार खोलो, परोसे जोगी जातिया खे पीतरे आऊणे देओ।

मतलब तेसा जातिया खे जेसरे लोक तर्मो रा काम करदे ओ।

3 ओ यहोवा, जेसरे मने तां पाँदे सब्र राखी राखेया,

तेसरी तूँ पूरी शान्तिया साथे रक्षा करेया,

कऊँकि से तां पाँदे परोसा राखोआ।*26:3 फिलि. 4:7

4 परमेशरो पाँदे सदा परोसा राख,

कऊँकि परमेशर यहोवा सदा रणे वाल़ी चट्टान ए।

5 से ऊच्चे पद वाल़ेया खे चुकाई देयोआ, जो शईर उची जगा दे बसी रा, तेसखे से थाले करी देयोआ।

से तिजी खे जमीना पाँदे सेटी की माट्टिया दे मलायी देयोआ।

6 ओ यहोवा, तेबे दीन ओर नम्र लोका शईरो रे खण्डहर आपणे पैरा साथे केसणे।"

7 तर्मिये री बाट सच्चाई ए, तूँ जो आपू तर्मी यहोवा ए,

तूँ तर्मिये री अगुवाई करेया।

8 ओ यहोवा, तेरे न्याय री बाटा दे आसे लोक ताखे न्याल़दे आई रे,

मारा मन ताखे ओर तेरे नाओं खे यादा करना चाओआ।

9 मेरा मन रात पर तां साथे रणा चाओआ,

मेरा मन पूरी कोशिश करी की ताखे टोल़ोआ,

कऊँकि जेबे तेरे न्याय रे काम तरतिया पाँदे बताओए,

तेबे दुनिया रे रणे वाल़े लोक तार्मिकता खे सीखो ए।

10 जे तुसे दुष्टो पाँदे दया बी करी देयो, तेबे बी से ठीक कर्म करना नि सकदा,

तेस तर्मो रे राज दे बी बुराई करनी ओर से कदी बी महान यहोवे रे बारे दे सोची नि सकदा।

11 ओ यहोवा, तेरा आथ बढ़ेया राए, पर तेरे दुश्मण नि देखदे।

पर तिना खे पता लगी जाणा कि ताखे प्रजा री केड़ी जल़न ए ओर सेयो शर्मिंदा ऊणे।*26:11 मीका 5:9, इब्रा. 10:27

12 तेरे बैरी आगी दे फूखणे।

ओ यहोवा, तां आसा खे शान्ति ठराणी,

आसे जो कुछ करी राखेया, से तैंई मारिया तँईं करी राखेया।

13 ओ यहोवा तू मारा परमेशर ए, तांते अलावा ओर मालक बी आसा पाँदे राज करो थे,

पर तेरी कृपा ते आसे बस तेरे ई नाओं रा गुणगाण करूँए।

14 एबे सेयो न्यायी मरी गे रे, सेयो फेर कदी जिऊँदे नि ऊणे, तिना खे मरे दे बऊत दिन ऊईगे,

सेयो फेर नि उठी सकदे, तैं तिना खे नाशो रे बारे दे सोची की सेयो एड़े नाश कित्ते कि सेयो फेर याद नि आऊणे।

15 ओ यहोवा, तैं यहूदा रा प्रदेश बढ़ाया।

तैं जातिया खे बढ़ाई की आपणी महिमा दखाई राखी

ओर तेस देशो रे सारे बन्ने तैं बढ़ाई राखे।

16 ओ यहोवा, सेयो लोक ताखे दु:खो दे याद करो थे,

जेबे तूँ तिना खे दण्ड देओ था, तेबे से दबी री आवाजा दे आपणे मनो री गल्ल तांगे बताओ थे।

17 ओ यहोवा, आसे लोक बी, तां सामणे तेड़े ई ऊईगे रे।

जिंयाँ गर्भवती जवाणस बच्चा जमाणे रे बखते रिगड़ोई ओर पीड़ा रिया बजा ते चींगोई।*26:17 पज. 48:6

18 आसे बी गर्भवती ऊए, आसे बी रिगड़े, आसे मानो अवा खे ई जन्म दित्तेया।

आसे देशो रिया तँईं कोई उद्धारो रा काम नि कित्तेया ओर दुनिया दे रणे वाल़ेया रा नाश करने दे असफल रये।

19 ओ यहोवा, तेरे मरे दे लोक जिऊँदे ऊणे, मुड़दे उठी की खड़े ऊणे।

ओ माट्टिया दे बसणे वाल़ेयो, जागी की जयजयकार करो!

कऊँकि तेरा पाल़ा जोतिया ते पैदा ओआ ओर तरतिया मुड़दे वापस करी देणे।

न्याय ओर छुटकारा

20 ओ मेरे यहूदा शईरो रे लोको, आओ, तुसे आपणे-आपणे कमरे दे आई की दरवाजे बन्द करो, ओर थोड़ी देरा तक जदुओ तक यहोवे रा रोष शान्त नि ओ तदुओ तक आपू खे लकोई की राखो।*26:20 पज. 91:4, 32:7 21 कऊँकि देखो, यहोवा तरतिया दे रणे वाल़ेया खे पापो री सजा देणे खे आपणे स्वर्गो रिया रणे री जगा ते चली की आऊणे लगी रा ओर तरतिया पाँदे लकोई की कित्ती रया अत्या सामणे आई जाणिया, ओर जो लोक मरीगे दे ए, तिना खे तरती एबे ओए नि लकोई सकणी।