Isaías 6

यशायाह खे बुलाणा

1 आऊँ दसुआ कि एक दिन क्या ऊआ जेस साले यहूदा प्रदेशो रा राजा उज्जियाह मरेया, मैं परमेशर बऊत ई ऊच्चे सिंहासनो पाँदे बैठेया रा देखेया ओर तेसरे टाल्ले रे केरे ते मन्दर परी गा।*6:1 प्रका. 4:2,6, मत्ती 25:3, प्रका. 7:10 2 तेसते पाँदले कनारे साराप*6:2 साराप गुस्से वाल़े स्वर्गदूत दिशे, तिना रे छे-छे पंख थे, तिने दूई पंखा साथे आपणा मूँ टखी राखेया था, दूई साथे आपणे पैर ओर दूई साथे उडने लगी रे थे। 3 ओर सेयो एकी-दूजे खे आका पायी-पायी की गाणे लगी रे थे, "सेना रा यहोवा पवित्र, पवित्र, पवित्र ए; सारी तरती तेसरे तेजो ते परी रिये ए।"*6:3 प्रका. 4:8, प्रका. 15:8 4 ओर तिना रे आका पाणे ते देऊल़ी रिया निऊँआ ईलणे लगिया ओर मन्दर तुएँ साथे परी गा। 5 तेबे मैं चींगदे ऊए बोलेया, "हाय! हाय! आऊँ नाश ऊईगा, कऊँकि आऊँ अशुद्ध ओठ वाल़ा माणूं ए ओर आऊँ अशुद्ध ओठवाले माणूंआ बीचे रऊँआ, कऊँकि मैं सेना रा यहोवा महाराजाधिराज आपणी आखी साथे देखी राखेया!" 6 तेबे एक साराप आथो रे फेऊ लई की, जो तिने चिमटे साथे बेदिया पाँदा ते चकेया था, मांगे उडी की आया। 7 तिने तिजी साथे मेरा मूँ छुँईं की बोलेया, "देख, इने तेरा ओठ छुँईं ला रा, इजी री खातर तेरे बुरे काम दूर ऊईगे ओर तेरे पाप माफ ऊईगे।" 8 तेबे मैं परमेशरो रा ये वचन सुणेया, "आऊँ केसखे पेजूँ ओर म्हारी तरफा ते कुण जाणा?" तेबे मैं ज्वाब दित्तेया, "आऊँ एती ए! माखे पेज।" 9 यहोवे मांते बोलेया, "जा, ओर इना इस्राएलो रे लोका खे बोल, सुणदे ई रओ, पर समजो नि, देखदे ई रओ, पर बूजो नि।" 10 तेबे तिने माखे बोलेया, "तूँ इना लोका रे मन मोटे ओर इना रे काना खे पारी करी दे ओर इना रिया आखी बन्द करी दे, एड़ा नि कि सेयो आखी साथे देखो ओर कानो साथे सुणो ओर मनो ते बूजो ओर मन फिराओ ओर ठीक ऊई जाओ।"*6:10 मत्ती 13:15, यूह. 12:40, प्रेरि. 28:26,27, रोम. 11:8 11 तेबे मैं यहोवे ते पूछेया, "ओ परमेशर, कदुओ तक?" तिने बोलेया, "जदुओ तक शईर नि उजड़ो ओर तिना रे कोई नि रयी जाओ ओर कअरा रे कोई माणूं नि रयी जाओ ओर देश उजाड़ ओर सुनसाण ऊई जाओ, 12 ओर यहोवा माणूंआ खे तेथा ते दूर करी देयो ओर देशो री कई जगा ऊजड़ ऊई जाओ। 13 चाए तेथो रे रणे वाल़ेया रा दसुआ इस्सा बी रयी जाओ, तेबे बी तिना दुबारा अमला करना ओर फूकी देणे, पर जेड़े छोटे या बड़े बाँजा रे डाल़ बाडणे ते बाद बी ठूँठ बणेया रा रओआ, तिंयाँ ई पवित्र इस्सा तेसरा इस्सा ठईरना।"