1 यहोवा बोलोआ, जो माखे मतादा रिया तँईं पूछो पनि थे, सेयो माखे टोल़ने लगी रे; जो माखे टोल़ो पनि थे तिने आऊँ पाई ला रा ओर जिना जातिया खे मेरा नि बोलेया जाओ था, तिना खे बी आऊँ बोलूँआ, "देख, आऊँ एती आ, मां तुसा री मताद करनी।" 2 मैं एक टीठ जातिया रिया तरफा खे पूरा दिन आपणे लोका रे स्वागतो खे आथ फैलाई राखे, जो आपणी योजना रे मुताबिक बुरी बाटा रे चलो थे।* 3 एड़े लोक जो मां सामणे ई बगीचे दे मूर्तिया खे बलि चढ़ाई-चढ़ाई की ओर ईटा ते बणी री मूर्तिया री बेदिया पाँदे तूप बाली-बाली की माखे लगातार रोष चढ़ाओ थे। 4 ये लोक कब्रा बीचे बैठो थे ओर लूकणे री जगा दे रात बिताओ थे; जो सूंअरो रा मास खाओए ओर तिना रे पांडेया दे मूर्तिया खे बलि कित्ते रे मासो ते बणेया दा रस ए। 5 पर ये लोक दूजे लोका ते बोलोए, "अटी जा, मां नेड़े नि आओ, कऊँकि आऊँ तांते पवित्र ए।" यो मेरे नाको रे तुएँ ओर तेसा आगी जेड़े ए जो पूरा दिन बल़दी रओई। 6 यहोवा बोलोआ, "देखो, तिना री सजा मां सामणे लिखी राखी: मां चुप नि रणा, मां जरूर बदला लणा, बल्कि तुसा रे ओर तुसा रे बुजुर्गा रे बुरे कामो रा बदला बी तुसा री गोदा दे परी देणा। 7 कऊँकि तिने पाह्ड़ो पाँदे तूप बाल़ेया ओर पाह्ड़िया पाँदे मन्दरो दे मूर्तिया री पूजा करी की मेरी बेज्जती करी राखी, इजी री खातर आऊँ यहोवा बोलूँआ कि इना रे पिछले कामा रा दण्ड बी इना री गोदा दे तोली की देणे।" 8 यहोवा ईंयाँ बोलोआ; "जिंयाँ अंगूरा रे केसी गुच्छे रे नया रस परी जाओआ, तेबे लोक बोलोए, इजी खे बर्बाद नि करो, कऊँकि इदे आशीष ए, तिंयाँ ई मां आपणे दासो रिया खातर करना कि मेरे सबी लोका खे नाश नि करुँ। 9 मां याकूबो बीचा ते एक कुल ओर यहूदा बीचा ते आपणे पाह्ड़ो रा एक बारिस पैदा करना; मेरे चूणे रे तेसरे बारिस ऊणे ओर मेरे दास तेती रणे। 10 मेरी प्रजा जो माखे टोल़ोई, तिना रिया पेडा-बाकरिया तो शारोनो री काअटिया दे चरनिया ओर तिना रे गायी-बल़दा आकोर नाओं री तराईया दे राम करना। 11 पर तुसे लोक तो यहोवे खे छाडी देओए ओर मेरे पवित्र पाह्ड़ो खे पूली जाओए, जो गाद ओर मेनी नाओं रे भाग्य देवते खे मेजो पाँदे खाणे रिया चीजा सजाओए ओर आत्मा साथे गल्ल करने वाल़ी देविया खे मसाला मलाया रा शराब पेंटा रे रूपो दे चढ़ाओए;* 12 मां तुसे गिणी-गिणी की तलवारी रा ग्रा बणाई देणे ओर तुसे सब मरने खे नपणे; कऊँकि जेबे मैं तुसे बुलाए तुसे कोई ज्वाब नि दित्तेया, जेबे आऊँ बोलणे लगेया, तेबे तुसे मेरी नि सुणी; बल्कि जो माखे बुरा लगोआ, तुसे सेई रोज कित्तेया ओर जेते कि आऊँ दु:खी ओऊँआ, तुसे सेई अपनाया।" 13 इजी बजा ते यहोवा ईंयाँ बोलोआ: "देखो, मेरे दासा तो खाणा, पर हे पापियो तुसे सब पूखे मरने; मेरे दासा पीणा, पर तुसे त्याये रणे; मेरे दासा खुशी मनाणी, पर तुसे शर्मिंदा ऊणे; 14 देखो, मेरे दासा रे मन खरे ए इजी खे तिना खुशिया रिया बजा ते जयजयकार करनी पर तुसा दु:खो रे मारे हाय-हाय करनी। 15 मेरे‍ चूणे दे लोका तुसा रा उदारण देई-देई की स्राप देया करना ओर परमेशर यहोवे तुसे नाश करने; पर तेस आपणे दासा रा दूजा नाओं राखणा।* 16 तेबे सारे देशो दे जो कोई आपू खे तन्य बोलोगा, तेस सच्चे परमेशरो रा नाओं लई की आपू खे तन्य बोलणा ओर जो कोई देशो रे कसम खाओगा, तेस सच्चे परमेशरो रे नाओं ते कसम खाणी; कऊँकि पिछला कष्ट दूर ऊईगा ओर से मेरिया आखी ते लूकी गा रा।"

17 यहोवा बोलोआ, "कऊँकि देखो, मां एक नया सर्ग ओर नई तरती बनाणी ओर लोका मेरे लोका रिया पईलकिया गल्ला याद नि राखणियां ओर सोच बिचारो रे पनि आऊणियां।"* 18 इजी री खातर जो आऊँ पैदा करने वाल़ा ए, तेतेरी बजा ते तुसे खुश ओ ओर सदा मगन रओ; कऊँकि देखो, मां यरूशलेम मगन ओर तेथो री प्रजा खुश बनाणी। 19 आऊँ आपू यरूशलेम शईरो रिया बजा ते मगन ओर आपणी प्रजा रिया बजा ते खुश ऊणा; तिदे फेर मतादा खे रोणे रा ओर चींगणे री आवाज नि सुणनी।* 20 परमेशरो री नवीं दुनिया दे फेर ना तो थोड़े दिना रा बच्चा ओर ना एड़ा स्याणा मरना, जिने आपणी उम्र पूरी नि करी राखी ऊगी; कऊँकि जो बचपनो रे मरने वाल़ा ए से सौ साला रा ऊई की मरना, पर पापी सौ साला रा ऊई की स्रापित ठईरना। 21 मेरे लोक कअर बणाई की तिदे रणे; तिना अंगूरा रे बगीचे लगाई की तिना रा फल़ खाणा। 22 एड़ा नि ऊणा कि सेयो बणाओ ओर अमला करने वाल़ा रओ; या सेयो लगाओ ओर दूजा खाओ; कऊँकि मेरी प्रजा री उम्र डाल़ा जेड़ी ऊणी ओर मेरे चूणे रेया आपणे कामो रा पूरा फायदा चकणा। 23 तिना री मईणत बेकार नि ऊणी, ना तिना रे बाल़क कबराई की मरने, कऊँकि सेयो यहोवे रे तन्य लोका रा कुल ठईरने ओर मां सेयो ओर तिना रे वंशो खे सदा खे आशीष देणी।* 24 माखे प्रार्थना दे बुलाणे ते पईले ई मां तिना खे ज्वाब देणा ओर तिना रे माँगदे ई मां तिना री सुणी लणी। 25 भेड़िये ओर मिन्टू साथे-साथे चरेया करने, ओर शेरो बल़दो जेड़ा काआ खाया करना ओर सापो माट्टी ई खाया करनी। मेरे सारे पवित्र पाह्ड़ सिय्योनो पाँदे ना तो केसी, केसी खे दु:ख देया करना ओर ना केसी, केसी रा नुकशाण करना, यहोवे रा येई वादे रा वचन ए।