1 तिना दिना दे आऊँ सारे इस्राएली कराने रा परमेशर ठईरना ओर सेयो मेरे लोक ठईरने, यहोवे री येई बाणी ए। 2 यहोवा ईंयाँ बोलोआ, "जो प्रजा तलवारे की मरने ते बची की निकल़ो, तिना पाँदे बणो दे दया ऊणी, आऊँ इस्राएलो खे राम देणे खे त्यार ऊणा।" 3 बऊत बखत पईले यहोवे माखे दर्शण देई की बोली राखेया, "आऊँ सदा तांते प्यार करूँआ, इजी बजा ते मैं तां पाँदे आपणी करूणा बणाई राखी। 4 ओ इस्राएलो री कुआँरी बेटी! मां तूँ फेर बसाणी, तां तेती फेर बांकी बणी की डफली बजाणी ओर खुशी मनाणे वाल़ेया बीचे नाचदी ऊई निकल़नी। 5 तां शोमरोनो री पाह्ड़िया पाँदे फेर अंगूरा रे बगीचे लगाणे ओर जो तिना खे लगाओगा, तेस तिना रे फल बी खाई सकणे।" 6 कऊँकि एड़ा दिन आऊणा, जिदे एप्रैमो रे पाह्ड़ी इलाके रे पईरेदारा आका पाणिया, "उठो, आसे सिय्योन पाह्ड़ो पाँदे आपणे परमेशर यहोवे गे चलूँए।"

7 कऊँकि यहोवा ईंयाँ बोलोआ, "याकूबो रिया बजा ते खुशिया साथे जयजयकार करो, जो जातिया बीचे महान ए, तेसरिया तँईं जोरे की स्तुति करो ओर बोलो, ‘ओ यहोवा, आपणी इस्राएली प्रजा रे बचे दे लोका रा बी उद्धार कर।’ 8 देखो, मां आपणे लोक उत्तर देशो*31:8 उत्तर देशो बेबीलोन ते ल्याऊणे ओर तरतिया रे कूणे-कूणे ते कट्ठे करने ओर तिना बीचे अन्दे, लंगड़े, गर्भवती, ओर बच्चा पैदा करने वाल़िया जवाणसा बी आऊणियां, एक बड़ी मण्डल़ी एती वापस आऊणी। 9 सेयो रोंदे ऊए आऊणे ओर गिड़गिड़ांदे ऊए मेरे जरीये पऊँचाए जाणे, मां सेयो नदिया रे कनारे-कनारे ते ओर एड़ी सीदिया बाटा रिये ल्याऊणे, जिसिये तिना खे ठोकर नि लगो, कऊँकि आऊँ इस्राएलो रा बाओ ए ओर एप्रैम मेरा जेठा माठा ए।"*31:9 1 कुरि. 6:18 10 ओ जातिया-जातिया रे लोको, यहोवे रा वचन सुणो ओर दूर-दूर देशा दे बी इजी रा प्रचार करो, बोलो, जिने इस्राएली लोका खे तित्तर-बित्तर कित्तेया था, तेस ई सेयो कट्ठे बी करने ओर तिना री एड़ी रक्षा करनी जेड़ा ग्वाल़ा आपणी पेडा रे चूण्डो री करोआ। 11 कऊँकि यहोवे याकूब छुड़ाई ला रा ओर तेस दुश्मणो रे पञ्जे ते जो तेसते जादा तागतबर था, तेसखे छुटकारा देई राखेया। 12 इजी री खातर इस्राएलो रे लोका सिय्योन पाह्ड़ो री चूँडिया पाँदे आई की जयजयकार करनी ओर यहोवे ते, नज्ज, नया अँगूरा रा रस, जैतूनो रा तेल, पेडा-बाकरिया ओर गायी-बल़दा रे बच्चे बगैरा खरे-खरे दान पाणे खे पीड़ लगाई की चलणे ओर तिना रा प्राण सींजे रे बगीचे जेड़ा ऊणा ओर सेयो फेर कदी उदास नि ऊणे। 13 तेस बखते तिना री कुआँरिया मूनिया नाचदे ऊए खुशी मनाणी ओर जवान ओर स्याणेया मिली की खुशी मनाणी। कऊँकि मां तिना रा दु:ख दूर करना, मां तिना खे शान्ति देणी ओर दु:खो रे बदले सुख देणा। 14 मां पुरोईत तल़ी री चीजा साथे बऊत रज्जाणे ओर मेरी प्रजा मेरे खरे दानो साथे सन्तुष्ट ऊणी, यहोवे री येई बाणी ए।

15 यहोवा ईंयाँ बी बोलोआ, "सुण, रामाह शईरो दे दु:ख ओर बड़िया पारी राड़ी सुणोईया। राहेल आपणे बच्चेया खे रोया करोई; ओर आपणे बच्चे रिया बजा ते शान्त नि ऊँदी, कऊँकि से एबे नि रये।"*31:15 मत्ती 2:18 16 यहोवा ईंयाँ बोलोआ, "रोणे-पीटणे ओर आसू सेटणे ते रूकी जा, कऊँकि तेरी मईणता रा फल मिलणे वाल़ा ए ओर सेयो दुश्मणा रे देशो ते वापस आऊणे।*31:16 प्रका. 21:4, होशे 1:11 17 अन्तो दे तेरी उम्मीद पूरी ऊणी, यहोवे री येई बाणी ए, तेरे कुलो रे लोक आपणे देशो दे वापस आऊणे। 18 मैं एप्रैम ये गल्ला बोली की रोंदे ऊए सुणी राखेया, ‘तैं आसा खे सजा दित्ती ओर मेरी सजा एड़े बाच्छूए जेड़ी ऊई जो काडी नि राखेया ओ, पर एबे तूँ माखे फेर, तेबे आऊँ फिरना, कऊँकि तूँ मेरा परमेशर यहोवा ए। 19 ओ यहोवा, आऊँ तांते पटकणे ते बाद पछताया ओर माखे सिखाणे ते बाद आऊँ बऊत दु:खी ऊआ, पुराणे पापो खे याद करी की आऊँ शर्मिंदा ऊआ ओर मेरा मूँ काल़ा ऊईगा।’ 20 परमेशर बोलोआ: तुसे जाणोए कि एप्रैम मेरा प्यारा पाऊ ए। से मेरा लाडला ए। जेबे-जेबे आऊँ तेसरे खलाफ गल्ला करूँआ, तेबे-तेबे माखे तेसरी याद आओई। इजी बजा ते मेरा मन तेसरे खलाफ परी जाओआ ओर मां तेस पाँदे पक्का दया करनी, यहोवे री येई बाणी ए।"

21 भविष्यबक्ते बोलेया, "ओ इस्राएलो रे लोको, जेसा बाटा रिये तुसे गये थे, तिदे खम्बे ओर चण्डे खड़े करो ओर आपणे इना शईरा दे वापस आऊणे खे मन लगाओ। 22 ओ पटकणे वाल़ी बेटी तां कदुओ तक ओर-पोरे कुमदे रणा यहोवे री एक नयी सृष्टि तरतिया पाँदे प्रगट ऊणी, मतलब जवाणसा मर्दो री मताद करनी।"

23 इस्राएलो रा परमेशर, सेना रा परमेशर यहोवा ईंयाँ बोलोआ, "जेबे मां यहूदी बन्दी तिना रे देशो रे शईरा दे वापस ल्याऊणे, तेबे तिना बीचे ये आशीर्वाद फेर देया जाणा, ‘ओ तर्मो साथे परी री जगा, ओ पवित्र पाह्ड़, यहोवा ताखे आशीर्वाद देयो!’ 24 यहूदा ओर तेथो रे सारे शईरो रे लोक, जिम्मीदार ओर गवाल़े बी तिदे चूण्ड बणाई की कट्ठे बसणे। 25 कऊँकि मैं थके रे लोका रे प्राण सन्तुष्ट करी राखे ओर उदास लोका रे प्राण परी ते रे।"*31:25 मत्ती 11:28, लूक. 6:21 26 ये सुणने ते बाद आऊँ जागेया ओर मैं देखेया ओर माखे मेरी नींज मीठी लगी। 27 तेबे यहोवे घोषणा कित्ती, "देख, एड़े दिन आऊणे वाल़े ए जेबे मां इस्राएल ओर यहूदा रे लोका रे बाल-बच्चे ओर डांगर दोनो बऊत बढ़ाणे। 28 जिंयाँ आऊँ तिना खे सोची-सोची की रूड़ाऊँ ओर टाल़ूं था, तिंयाँ ई एबे मां सोची-सोची की सेयो रूमणे ओर बढ़ाणे, यहोवे री येई बाणी ए। 29 तिना दिना दे तिना फेर ये कहावत नि बोलणी कि बुजुर्गे तो जंगल़ी अंगूर खाए, पर तिना रे कुलो रे दाँद खट्टे ऊईगे रे। 30 कऊँकि जो कोई जंगल़ी अंगूर खाओगा, तेसरे दाँद खट्टे ऊई जाणे ओर हर एक माणूं आपणे ई पापो रिया बजा ते मरना।"

31 तेबे यहोवा ईंयाँ बी बोलोआ, सुण, एड़े दिन आऊणे वाल़े ए जेबे मां यहूदा ओर इस्राएलो रे कराने साथे नवीं वाचा बानणी।*31:31 मत्ती 26:28, लूक. 22:20, 1 कुरि. 11:25,2 कुरि. 3:6, इब्रा. 8:8,9 32 से तेसा वाचा जेड़ी नि ऊणी जो मैं तिना रे बुजुर्गा साथे तेस बखते बानी थी जेबे आऊँ तिना रा आथ पकड़ी की तिना खे मिस्र देशो ते निकयाल़ी की ल्याया था, कऊँकि तेबे बी आऊँ तिना ते एड़ा ई प्यार करुँ था जेड़े एक लाड़ा आपणियां लाड़िया ते करोआ, तेबे बी तिने मेरी वाचा तोड़ी ती। 33 पर जो वाचा मां तिना दिना ते बाद इस्राएलो रे कराने साथे बानणी, से ये: मां आपणा बिधान तिना रे मनो दे समवाणा, ओर से तिना रे मनो दे लिखणा, ओर आऊँ तिना रा परमेशर ठईरना ओर सेयो मेरी प्रजा ठईरने, यहोवे री येई बाणी ए।*31:33 2 कुरि. 3:3, इब्रा. 8:10,11, रोम. 11:26,27 34 तेबे तिना खे एकी-दूजे खे ये नि बोलणा पड़ना कि यहोवे खे जाणो, कऊँकि यहोवे री ये बाणी ए कि छोटे ते लई की बड़े तक, सबी मेरा ज्ञान राखणा, कऊँकि मां तिना रे पाप माफ करने ओर तिना रे पाप फेर याद नि करने।*31:34 1 थिस्स. 4:9, प्रेरि. 10:43, 1 थिस्स. 4:9, इब्रा. 10:17 35 जिने दिनो खे प्रयासा देणे खे सूरज ओर राती खे प्रयासा देणे खे चाँद ओर तारेया खे नियम ठराई राखे, जो समुद्रो खे उछाल़ोआ ओर तेतेरी लईरा खे गरजाओआ ओर जेसरा नाओं सेना रा यहोवा ए, सेई यहोवा एड़ा बोलोआ, 36 "जे यो नियम मां सामणे ते टल़ी जाओ, तो तेबेई ये ऊई सकोआ कि इस्राएलो रा कुल मेरी नजरा दे सदा खे एक जाति ठईरने री बजाए खत्म ऊई सकोगा।"

37 यहोवा ये बी बोलोआ, "जे पाँदा ते सर्ग नापेया जाओ ओर थाले तरतिया री निऊँ खणी-खणी की पता लगाया जाओ, तेबेई आऊँ इस्राएलो रे सारे कराने खे तिना रे पापो रिया बजा ते छाडी देऊँगा।" 38 "देख, यहोवे री ये बाणी ए कि एड़े दिन आऊणे लगी रे जिदे ये यरूशलेम शईर हननेलो रे गुम्मटो ते लई की कूणे रे बड़े द्वारो तक यहोवे रिया तँईं बणाया जाणा। 39 शईरो री बारली दवाला खे नापणे री रस्सी फेर आगे बढ़ी की सीदे पच्छमा दे गारेब पाह्ड़िया ते गोआ पाह्ड़िया तक पऊँचणी। 40 लाशा ओर स्वाई री सारी तराई ओर किद्रोन नाल़े तक जितणे डोरू ए, कोड़ेया रे पूर्बो रे बड़े द्वारो रे कूणे तक जितणी जमीन ए, से सब यहोवे रिया तँईं पवित्र ठईरनी। से शईर सदा खे फेर ना तो टाल़ेया जाणा ओर ना ई नाश करेया जाणा।*31:40 लूक. 22:20; 1 कुरि. 11:25; 1 कुरि. 3:6; इब्रा. 13:20 "