1 አቤት መና ጎዳዉ፥ ታን ሱረተን ሀመቴዳ ድራዉነ፥

ስ ባይናን መና ጎዳ አማነቴዳ ድራዉ፥

ታዉ ፕርዳ።

2 አቤት መና ጎዳዉ፥ ታና ፓጫ፥ ታና ብዳ፤

ታ ዎዛና ጾሞሳ።

3 አያዉ ጎፐ፥ አገና ነ ሲቁ ታ ስንን ደኤ፤

ታን ነ ቱማተ ኦግያን ሀመታይ።

4 ታን ጭምያ አሳቱዋና እትፐ ኡትከ፤

ሎአ ማላትያ ኢታቱዋ ማባራን ገልከ።

5 ኢታ ኦያ አሳቱዋ ሺቁዋ ታን እጻይ፤

ማካላንቻቱዋና እትፐ ኡትከ።

6 አቤት መና ጎዳዉ፥ ታን ቆሀቤናዋ በሳናዉ

ታ ኩሽያ ሜጫይ።

ነዉ ያርሽያ ሳኣ ዩያይ፤

7 ነ ጋላታ የ የጻይነ

ኔን ኦዳ ኦራባ ኡባ ኦዳይ።

8 አቤት መና ጎዳዉ፥ ኔን ደእያ ጎልያ፥

ነ ቦንቹ አቅያ ሳኣ ታን ዶሳይ።

9 ታና ናጋራንቻቱዋና እትፐ ፕቶፓ፤

ዎይ አሳ ዎያዋንቱና እትፐ ይሶፓ።

10 ኡንቱንቱ ኩሽያን ኢታ ሀልቹ ደኤ፤

ቃይ ኡንቱንቱ ኡሸቻ ኩሽያን ማታዪ ኩም ኡቴዳ።

11 ሽን ታና ግዶፐ፥ ታን ሱረተን ሀመታይ።

ታና ዎዛ፤ ታዉ ቃረታ።

12 ታ ገዲ ደምባ ሳኣን ኤቄዳ፤

ታን ዎልቃማ ሺቁዋን መና ጎዳ ጋላታና።