አሳፍ አኬካን ጻፌዳ ግንጹዋ

1 ታ አሳዉ፥ ታን ህንተና ታማርስያዋ ስስተ፤

ታ ዶናፐ ከስያ ቃላ ሀይዝተ።

2 ታን ኡንቱንቶ ሃሳይያ ዎደ፥

ሌምሱዋን ሃሳያይ፤✝78:2 ማቶሳ 13:35

በኒደፐ ጌሜዳ የዎቱዋ ቆንጭሳና።

3 ኑን ስሴዳነ ኤሬዳ የዎቱዋ፥

ቃይ ኑ አዎቱ ኑዉ ኦዴዳ የዎቱዋ ሃሳያና።

4 ሄ የዎቱዋ ኑን ኡንቱንቱ ናናቱዋፐ ቆሶኮ፤

መና ጎዳዉ በስያ ጋላታ፥

አ ዎልቃነ ማላልስያ አ ኦሱዋ፥

ይያ የለታዉካ ኑን ኦዳና።

5 እ ያቆባ ዛረቶ አዛዙዋ፥

እስራኤልያ አሳዉ ህግያ እሜዳ።

ካሰ ኑ አዎቱ ባረንቱ ናናቱዋ፥

ሄ ህገቱዋ ታማርሳና ማላ አዛዜዳ።

6 ሄዌነ፥ ካልያ የለታይ፥

ሄ ብሮ የለታና ናናቱ ኤራናዳናነ

ኡንቱንቱካ ባረንቱ ናናቶ ኦዳናዳና።

7 ያትና፥ ሄ ናናቱ ጾሳን አማነታናዳን፤

እ ኦዳባካ ዶገናዳንነ

አ አዛዙዋ ናጋናዳና።

8 ኡንቱንቱ ካሰ ባረንቱ አዎቱዋዳን ዎዛና ሙመነ

ማካላንቻ አሳ ግደናዳንነ

ጾሳን ኤቀናነ አማነተና የለታ ግደናዳና።

9 ኤፍሬማ አሳቱ፥ ኦላዉ፥

ዎንዳፍያና ፖ ጊግሲደ፥

ኦላ ጋላስ ጉየ ስሜድኖ።

10 ኡንቱንቱ ጾሳ ጫቁዋ ናግበይክኖ፤

አ ህግያዳን ሀመተናን እጼድኖ።

11 ኡንቱንቱ እ ኦዳ ዎልቃማ ኦሱዋነ

ኡንቱንታ እ በሴዳ ማላታ ዶጌድኖ።

12 እ ኡንቱንቱ አዎቱዋ ስንን ግብጼ ቢታን፥

ጾኣነ ደምባን ማላታ ኦዳ።✝78:12 ከሳ 7:8—12:32

13 አባ ሻኪደ፥ ግዱዋና ኡንቱንታ ፕንዳ፤✝78:13 ከሳ 14:21-22

እ ሃ ሻኪደ፥

ያነ ሃነ ሻኪደ ጎዳዳን ኤሴዳ።

14 እ ኡንቱንታ ጋላስ ሻርያን፥✝78:14 ከሳ 13:21-22

ቃማ ታማ ፖኡዋን ካለዳ።

15 እ ባዙዋን ዛላ ጳልቂደ፥✝78:15-16 ከሳ 17:1-7፤ ፓይ. 20:2-13

ጪሙዋፐ ዳሮ ሃ ኡንቱንታ ኡሼዳ።

16 ዛላፐ ሃ ፑልትሲደ፥

ሻፋዳን ዱገ ጎግሴዳ።

17 ሽን ኡንቱንቱ አ ቦላ ናጋራ ኦሱዋ ገደ ጉጄድኖ፤

ኡባፐ ቂያ ጾሳ ቦላ፥

ባዙዋን ማካሌድኖ።

18 ባረንቱ አሞቴዳ ቁማ ኦችያዋን

ጾሳ ኤሪደ ፓጬድኖ።✝78:18-31 ከሳ 16:2-15፤ ፓይ. 11:4-23፣ 31-35

19 ኡንቱንቱ ጾሳ ቦላ ሀዋዳን ያጊደ ሃሳዬድኖ፤

"ባዙዋን ጾሳይ ኑዉ ቁማ አናዉ ዳንዳዪ?

20 ዛላ ሾጭና፥ ፑልቱ ከሲደ፥

ሻፋይ ጎጌዳ፤

ሽን ኡክ እ ኑዉ እማናዉ ዳንዳዪ?

ዎይ ባረ አሳዉ አሹዋ እማናዉ ዳንዳዪ?" ያጌድኖ።

21 መና ጎዳይ ሄዋ ስሴዳ ዎደ፥

ኡንቱንቱ ቦላ ዳሮ ሀንቀቴዳ።

ያቆባ ዛራቱዋ ቦላ ታማይ ኤጼዳ፤

እስራኤልያ ቦላ አ ሀንቁ ዳር ዳር ቤዳ።

22 አያዉ ጎፐ፥ ኡንቱንቱ ጾሳን አማንበይክኖ፤

ዎይ እ አሽያዋን አማነትበይክኖ።

23 ግዶፐነ፥ እ ቦላ ሳሉዋ አዛዚደ፥

ሳሉዋ ፐንግያ ዶዬዳ።

24 ኡንቱንቱ ማናዉ፥ ኡንቱንቶ ማና ቡክሴዳ፤✝78:24 ዮሃ. 6:31

ሳሉዋ ቁማ ኡንቱንቶ እሜዳ።

25 ኪታንቻቱዋ ኡክ አሳይ ሜዳ፤

ጾሳይ ኡንቱንቶ ቁማ ዳርሲደ እሜዳ።

26 አዋይ ዶልያ ባጋ ጫርኩ ጫርካናዳን ኦዳ፤

ባረ ዎልቃን ገድሳ ባጋ ጫርኩዋ ደንዳ።

27 እ አሳዉ አሹዋ ባና ኬሻ ኪቴዳ፤

ፓልያ ካፎቱዋ አባ ዶና ሻፍያ ኬሻ ቡክሴዳ።

28 ኡንቱንቱ ደእያ ሳን፥

ዱንካንያ ዩሹዋን ዎድኖ።

29 ኡንቱንቱ አሞቴዳዋ ኡንቱንቶ እሜዳ፤

ኡንቱንቱ ሚደ፥ ባረንቱ ጋንጅያ ኩንድኖ።

30 ሽን ኡንቱንቱ ባረንቱ አሞቴዳ አሹዋ ካለናን ደእሺን፥

አሹ ኡንቱንቶ ብሮ ዶናን ደእሺን፥

31 ጾሳ ሀንቁ ኡንቱንቱ ቦላ ዎዳ፤

ኡንቱንቱ ግዶፐ ምኖ አሳቱዋነ

እስራኤልያፐ ያላጋ አሳቱዋ ዎዳ።

32 ሀዌ ኡባይ ሀንናካ፥

ኡንቱንቱ ናጋራ ኦያዋ አግበይክኖ።

ባረ ማላታ ኡባ ኦናካ፥ አማንበይክኖ።

33 ሄዋ ድራዉ፥ እ ኡንቱንቱ ጋላሳቱዋ ጫርኩዋዳን፥

ኡንቱንቱ ላይቱዋካ አኬከናን ይሴዳ።

34 ጾሳይ ኡንቱንቱፐ ዎያ ዎደ፥

አቴዳዋንቱ ናጋራ ፓጺደ፥

ጾሳ ምን ኮዬድኖ።

35 ኡንቱንቱ ጾሳይ ኡንቱንቶ ዛላ ግዴዳዋነ

ኡባፐ ቂያ ጾሳይ፥

ኡንቱንታ ዎዝያዋ ግዴዳዋ ሀሳዬድኖ።

36 ሽን ኡንቱንቱ ባረንቱ እንጻርሳን አዉ ዎርዶቲደ፥

ባረንቱ ዶናን ጭሜድኖ።

37 ኡንቱንቱ ዎዛናይ ጾሳን ኤቀና፤

እ ኡንቱንቱና ጫቀቴዳ ጫቁዋ አማነትክኖ።

38 ሽን እ ኡንቱንታ ማርያዌ፤

ኡንቱንቱ ኢታተ አቶ ጌዳ።

ኡንቱንታ ይስቤና፤ ዳሮ ገደ ባረ ሀንቁዋ ተኤዳ፤

ባረ ሀንቁዋ ኡላ ኡባና ኡንቱንቱ ቦላ የድቤና።

39 አያዉ ጎፐ፥ ኡንቱንቱ አሹዋ ጻላላ ግድያዋነ

ያ ጫርኬዳሳፐ ሃ ስመና፥

ጫርኩዋ ማላ ግድያዋ ሀሳዬዳ።

40 ኡንቱንቱ ባዙዋን አ ቦላ አፑ ገደ ማካሌድኖ!

መላ ባዙዋን አፑ ገደ ላንጭሴድኖ!

41 ኡንቱንቱ ዛር ዛሪደ፥ ጾሳ ፓጬድኖ፤

እስራኤልያ ጌሻ ሀንቀድኖ።

42 ኡንቱንቱ አ ዎልቃባ ዶጌድኖ፤

እ ኡንቱንቱ ሞርከቱዋፐ ዎዜዳ ጋላሳ፥

43 እ ግብጼ ቢታን ማላታ፥

ጾኣነ ደምባን ማላልስያባ፥

ኦዳ ዎድያ ሀሳይበይክኖ።

44 ኡንቱንቱ ሻፋ ሃቱዋ ሱዉ ላሜዳ፤✝78:44 ከሳ 7:17-21

ሄዋ ድራዉ፥ ግብጼ አሳቱ፥

ሄ ሻፋቱዋፐ ኡሻናዉ ዳንዳይበይክኖ።

45 ኡንቱንታ ዋይስያ ኡዱንጸቱዋነ

ኡንቱንቱ ቢታ ባይዝያ ሸቱዋ ኪቴዳ።✝78:45 ከሳ 8:1-6፣ 20-24

46 ኡንቱንቶ ዶሌዳ ካ ጎንዶ፥✝78:46 ከሳ 10:12-15

ኡንቱንቱ ኦደ ዳቡሬዳዋ ቦልያዉ እሜዳ።

47 ኡንቱንቱ ዎይንያ ቱራ ሻቻን፥

ኡንቱንቱ ባላስያ ግያ ምካ ጫርኩዋን ይሴዳ።✝78:47-48 ከሳ 9:22-25

48 ኡንቱንቱ ሚዛቱዋ ሻቻን ዎዳ፤

ኡንቱንቱ ዶርሳ ዉድያ፥

ቂያ ዋልቃንን መሬስ ዉርሴዳ።

49 ኡንቱንቱ ቦላ ባረ ሱልያ ሀንቁዋ፥

ላንጭያነ እጹዋ፥

ባይዝያ ኪታንቻቱዋ ጩጉዋን የዴዳ።

50 ባረ ሀንቁዋ አ የዴዳ።

ኡንቱንታ ኢታ ሀርግያዉ አደ እሜዳፐ አትና፥

ሀይቁዋፐ አሽቤና።

51 ግብጼን የለቴዳ ባይራ ናናቱዋ ኡባ ዎዳ።✝78:51 ከሳ 12:29

ካማ ዱንካንያን ደእያ ኮይሮ ናናቱዋ ኡባ ዉርሴዳ።

52 ሽን እ ባረ አሳ ዶርሳዳን ከሴዳ፤✝78:52 ከሳ 13:17-22

ዉድያዳን ባዙዋን ሄሜዳ።

53 እ ኡንቱንታ ሳሩዋን ካለዳ፤

ሄዋ ድራዉ፥ ኡንቱንቱ ያይበይክኖ፤

ሽን ኡንቱንቱ ሞርከቱዋ አባይ ሙኬዳ።✝78:53 ከሳ 14:26-28

54 ያቲደ እ ኡንቱንታ ባረ ጌሻ ቢታ፥

ባረ ኡሸቻ ኩሽያን ጾኔዳ ደርያ አሄዳ።✝78:54 ከሳ 15:17፤ ኢያሳ 3:14-17

55 እ ኡንቱንቱ ስንፐ ካዉተቱዋ ላጊደ፥

ኡንቱንቱ ቢታ ሻኪደ፥✝78:55 ኢያሳ 11:16-23

እስራኤልያ ዛረቶ ግሼዳ።

ባረ አሳ ኡንቱንቱ ጎልያን ዎዳ።

56 ግዶፐነ፥ ኡባፐ ቂያ ጾሳ ቦላ ማካሊደ፥

አ ፓጬድኖ።✝78:56 ዳና. 2:11-15

አ አዛዙዋካ ናግበይክኖ።

57 ኡንቱንቱ ባረንቱ አዎቱዋዳን፥

ማካላንቻቱዋነ ካዳንቻቱዋ ግዴድኖ።

ጌላ ቶራዳን ዎራ ዎድኖ።

58 ኡንቱንቱ ባረንቱ ጎይንያ ቃ ሳአቱዋን አ ይሎዬድኖ፤

ባረንቱ ኤቃቱዋን አ ቃናትሴድኖ።

59 ያትና፥ ጾሳይ ሀዋ ስሲደ ሀንቀቴዳ፤

እስራኤልያ ሙለካ ካዳ።

60 ሴሎን እ ደኤዳ ሳኣ፥

አሳ ግዶን እ ደኤዳ ባረ ዱንካንያ አጌዳ።✝78:60 ኢያሳ 18:1፤ ኤር. 7:12-14፤ 26:6

61 ጾሳ ዎልቃዉነ ቦንቾ፥ ማላታ ግዴዳ፥

ታቦታ ሞርከቱዋ ኩሽያን አደ ኦሞድሴዳ።✝78:61 1 ሳሜላ 4:4-22

62 እ ባረ አሳዉ ሀንቀቴዳ፤

እ ኡንቱንታ ማሻዉ አደ እሜዳ።

63 ኡንቱንቱ ዎዳላቱ ኡባይ ኦላን ሀይቄድኖ፤

ያትና፥ ኡንቱንቱ ዎዶሮቱ አስና ገለናን አቴድኖ።

64 ኡንቱንቱ ቄሳቱ ማሻን ዉሬድኖ።

ግዶፐነ፥ ኡንቱንቱ ማቼቱ፥

ባረንቱ አስናቶ ዬከናዳን ድገቴድኖ።

65 ሄዋፐ ጉይያን፥ ጎዳይ ገምእሹዋፐ

ዎይ ዎይንያ ኤሳ ማዋፐ ቤጎትያ አሳዳን ቤጎቴዳ።

66 እ ባረ ሞርከቱዋ ጉየ ዛሪደ ሾጬዳ፤

ኡንቱንታ መናዉ ዬላዬዳ።

67 ዮሴፎ ዱንካንያ ካዳ፤

ኤፍሬማ ዛርያ ዶርቤና።

68 ሽን እ ይሁዳ ዛርያነ

ሲቅያ ጽዮነ ደርያ ዶሬዳ።

69 ሄዋን እ ባረ ጌሻ ጎልያ ሳሉዋዳን ቃን ኬጼዳ፤

ሳኣዳን መናዉ ኤሴዳ።

70 ባረ ቆማ ዳዊታ ዶሪደ፥

ዶርሳ ዉድያ ሄምያ ሳፐ አኬዳ።✝78:70-71 1 ሳሜላ 16:11-12፤ 2 ሳሜላ 7:8፤ 1 ኦዱዋ 17:7

71 ዶርሳ ሄምሽን፥ ባረ አሳ ያቆባ፥

ባረ ቡዙዋ እስራኤልያ ሄንናዉ አኪደ አሄዳ።

72 ያትና፥ ዳውት ኡንቱንታ ሱረ ዎዛናፐ ሄሜዳ፤

ቃይ ባረ ሂላ ኩሽያን ካለዳ።