Salmos 92

ጋላታ ማዝሙርያ

ማዝሙርያ፥ ሳምባታ ጋላሳዉ የጽያዋ.

1 መና ጎዳ ጋላትያዌ ሎአ።

አቤት ኡባፐ ቂያ ጾሳዉ፥

ነ ሱን ሳቢያዌ ሎአ።

2 ዎንታን አገና ነ ሲቁዋ፥

ቃማን ነ አማነትያዋ ግድያዋ አዋይያዌ ሎአ።

3 ታሙ ባቀን ዋጸቴዳ ዲነ፥

ማስንቁዋን ዲጽያዌ ሎአ።

4 አያዉ ጎፐ፥ አቤት መና ጎዳዉ፥

ነ ዎልቃማ ኦሱዋን

ታና ናሸቼዳ ድራዉ፥

ነ ኩሽያ ኦሱዋ ድራዉ፥

ታን ናሸቻዉ የጻይ።

5 አቤት መና ጎዳዉ፥ ነ ኦሱ አይ ኬሻ ግቴ!

ነ ቆፋይ አይ ኬሻ ጪሜ!

6 ኤያ አሳይ ኤራናዉ ዳንዳየና፤

ዶንጭሌዳ አሳይካ አኬካናዉ ዳንዳየና።

7 ሄዌነ፥ ኢታቱ ማታዳን ድጮፐካ፥

ኢታ ኦያ ኡባቱ ዳሾፐካ፥

ኡንቱንቱ መናዉ ያና።

8 ሽን አቤት መና ጎዳዉ፥

ኔን መናዉ ኡባፐ ቃ።

9 አቤት መና ጎዳዉ፥ ነ ሞርከቱ ያናዋነ

ኢታ ኦያ ኡባቱ ትስክ ጋናዋ ኑን ኤረቶ።

10 ታ ካጭያ ባዙዋ መን ካጭያዳን ቂሳዳ፤

ሎኦ ዛይትያ ታና ኦካዳ።

11 ታ ሞርከቱ ጾነቴዳዋ ታ አይፍያን በኣድ፤

ታ ኢታ ሞርከቱዋ ዋሱዋ ታ ሀይን ስሳድ።

12 ጽሎቱ ዛምባዳን ዳሻና፤

ቃይ ሊባኖሳ ዝጋዳን ድጫና።

13 ኡንቱንቱካ መና ጎዳ ዳባባን ቶከቴዳ ም ማላ፤

ኡንቱንቱ ኑ ጾሳ ጌሻ ጎልያን ዳሻና።

14 ኡንቱንቱ ኤጪደካ አይፋና፤

ኡንቱንቱ መናዉ እርጻነ ፓጻ።

15 ኡንቱንቱ፥ "መና ጎዳይ ሱረ፤

እ ታዉ ዎጋ ዛላ፤ ኢታተ አን ባዋ" ያጋና።