1 ଏଚେଟିଏ ଜିସିତି ଡାକିଟି ର଼ ଗୱେଡ଼ି ଗା଼ଲ୍‌ନେ ଅ଼ଡ଼େ ତାନି ଡାକିଟି ର଼ କମା ଆ଼ହାଁ ପା଼ଡ଼େୟି ଆ଼ୟିନେ; 2 ଇଞ୍ଜାଁ, ପ୍ରବୁତି ଜୀୱୁ, ବୁଦି ଅ଼ଡ଼େ ଅଣ୍‌ପୁତି ଜୀୱୁ, ୱେହ୍‌ନାୟି ଅ଼ଡ଼େ ବା଼ଡ଼୍‌ୟୁତି ଜୀୱୁ, ବୁଦି ଅ଼ଡ଼େ ପ୍ରବୁତି କାତା ଆଜିନି ଜୀୱୁ ତାନି ତା଼ଣା ଡ଼ୟିନେ; 3 ପ୍ରବୁତି କାତା ଆଜିତଲେ ତାନି ରା଼ହାଁ ଆ଼ନେ; ଇଞ୍ଜାଁ, ଏ଼ୱାସି ତାନି କାନୁତି ମେହ୍‌ନି ଲେହେଁ ବିଚାରା କିଅସି, କି ତାନି କିର୍ୟୁଁ ବିତ୍ରା ୱେଞ୍ଜାମାନି ଲେହେଁ ଲା଼ଗଅସି, 4 ସାମା ଏ଼ୱାସି ଦାର୍ମୁ ତଲେ କାର୍ମା ଗାଟାରାଇଁ ବିଚାରା କିନେସି ଅ଼ଡ଼େ ଦାର୍‌ତିତି ସ଼ଜେତି ଲ଼କୁ ତାକି ନୀହାଁୟି ତଲେ ଲା଼ଗିନେସି; ଇଞ୍ଜାଁ, ଏ଼ୱାସି ତାନି ଗୂତି ହା଼ଡାତି ଡଣ୍ତ ତଲେ ଦାର୍‌ତିତି ୱେ଼ନେସି ଅ଼ଡ଼େ ତାନି ଲୂଡ଼ାତି ନେ଼ସ୍ତେରି ତଲେ ଲାଗେଏତାରାଇଁ ନା଼ସା କିନେସି।

5 ଦାର୍ମୁ ତାନି ଟେଡେଲିତି ଜାଟି ହିମ୍ବରି ଅ଼ଡ଼େ ନାମୁ ତାନି ଟେଡେଲିତି ବୁଡ଼୍‌ପାମା଼ଡ଼ା ଆ଼ନେ। 6 ଅ଼ଡ଼େ, ଗଦ କ୍ଡାଃନି ମେ଼ଣ୍ତା ଡା଼ଲୁ ତଲେ ବାସା କିନେ ଅ଼ଡ଼େ ତୀରିରେଙ୍ଗ୍‌ଣା ଗରି ଡା଼ଲୁ ତଲେ ଡୂରିନେ; କ଼ଡି ଡା଼ଲୁ, ସିହଁ କ୍ଡାଃନି ଅ଼ଡ଼େ ଆଙ୍ଗା ଆ଼ତି ଜ଼ନ୍ତ ରହେଁଏ ଡ଼ୟିନୁ; ଅ଼ଡ଼େ, ର଼ ଊଣା କକାସି ଏ଼ୱାସିକାଣି ଜାତ୍‌ନୁ କିନେସି। 7 ଇଞ୍ଜାଁ, କ଼ଡିୟାଁ ଅ଼ଡ଼େ ଅଃଅଡ଼ିୟାଁ ମେୟିଁନୁ; ଏ଼ୱାସିକା ଡା଼ଲ୍‌କା ବାରେ ରହେଁଏ ଡୂରିନୁ; ଅ଼ଡ଼େ, ସିହଁ କ୍ଡାଃନି କ଼ଡି ଲେହେଁ ପୀଚୁ ତିନେ। 8 ଇଞ୍ଜାଁ, ପା଼ଲୁ ଗସିମାନି କକାସି ବୀସାଗାଟି ରା଼ଚୁ ଗା଼ଡ଼୍‌ୟୁ ଲାକ କାହିନେସି ଅ଼ଡ଼େ ପା଼ଲୁ ପିସ୍ତି କକାସି ନା଼ଗା ରା଼ଚୁତି ଗା଼ଡ଼୍‌ୟୁତା କେୟୁ ଦନେସି। 9 ଏ଼ୱି ମା଼ ସୁଦୁ ହ଼ରୁତି ଏ଼ନି ଟା଼ୟୁତା ଡା଼ହାରା କି ନା଼ସା କିଉ; ଇଚିହିଁ ସାମ୍‌ଦୁରି ଏ଼ନିକିଁ ଏ଼ୟୁତଲେ ନେଞ୍ଜାମାନେ, ଦାର୍‌ତି ଏଲେକିହିଁଏ ପ୍ରବୁ କାତାତି ବୁଦି ତଲେ ନେଞ୍ଜିନେ।

10 ଅ଼ଡ଼େ, ଏ଼ ଦିନାତା କୂଡ଼ାତି ସିରେଲି ଗ଼ଞ୍ଜାମାନି ଲେହେଁ କେ଼ପିଆ଼ତି ଜିସିତି ଡାକି, ବାରେ ଦେ଼ସାତାରି ଏ଼ୱାଣାଇଁ ପାରିନେରି; ଅ଼ଡ଼େ, ତାନି ଜ଼ମିନି ଟା଼ୟୁ ଗା଼ୱୁରମି ଆ଼ନେ। 11 ଅ଼ଡ଼େ, ଏ଼ ଦିନା ପ୍ରବୁ ତାନି ଡ଼ୟାମାନି ଲ଼କୁଣି ଅସୁରଟି, ମିସରଟି ଅ଼ଡ଼େ ପତ୍ରସଟି, କୁସଟି, ଏଲମ୍‌, ସିନିୟରଟି ଅ଼ଡ଼େ ହମାତଟି ଅ଼ଡ଼େ ସାମ୍‌ଦୁରି ମାଦିତି ଟା଼ୟୁଟି ଗେଲ୍‌ପାହାଁ ତାଚାଲି ତାକି ଅ଼ଡ଼େ ୱେଣ୍ତେ ରୀ ପା଼ଲି ତାନି କେୟୁ ଦା଼ହ୍‌ନେସି। 12 ଇଞ୍ଜାଁ, ଏ଼ୱାସି ଏ଼ କୂଡ଼ା ତାକି ର଼ ସିରେଲି ଗ଼ଞ୍ଜାମାନାଣି ଲାକ ପେର୍‌ନେସି ଅ଼ଡ଼େ ଦାର୍‌ତିତି ସା଼ରି କନଟି ଇସ୍ରାୟେଲତି ପେ଼ର୍‌ୱି ଆ଼ତି ଲ଼କୁଣି କୂଡ଼ି କିନେସି ଅ଼ଡ଼େ ଜୀହୁଦାତି ସିନାସାତ୍ରା ଆ଼ତି ଲ଼କୁଣି କୂଡ଼ି କିନେସି। 13 ଅ଼ଡ଼େ ଇପ୍ରୟିମତି ଡା଼ହାରା ହେକ ଆ଼ନେ ଅ଼ଡ଼େ ଜୀହୁଦାତି ଲ଼କୁଣି ସା଼ସ୍ତି ହୀନାରି ନା଼ସା ଆ଼ନେରି; ଇପ୍ରୟିମ ଜୀହୁଦାତି ଏଚେଲା ବା଼ଦ୍ରି ଆ଼ଏ, ଅ଼ଡ଼େ ଜୀହୁଦା ଇପ୍ରୟିମତି ସା଼ସ୍ତି ହୀଏ। 14 ଇଞ୍ଜାଁ, ଏ଼ୱାରି ୱେ଼ଡ଼ା କୂଡ଼୍‌ନିୱାକି ପାଲେସ୍ତିୟ ବମି ଲାକ ଗେ଼ମ୍ବିନେରି; ଏ଼ୱାରି ରହେଁଏ ଆ଼ହାଁ ୱେ଼ଡ଼ାହ଼ପୁ ଦେ଼ସାତି ମୀର୍‌କା ଦିଣ୍‌ସୁ ଦୂହିନେରି; ଏ଼ୱାରି ଇଦମ ଅ଼ଡ଼େ ମୟାବ ଲ଼କୁ ଲାକ କେୟୁ ଦା଼ହ୍‌ନେରି ଅ଼ଡ଼େ ଅମ୍‌ମନତି ଲ଼କୁ ଏ଼ୱାରି କାତା ଆହ୍‌ନେରି। 15 ଇଞ୍ଜାଁ, ପ୍ରବୁ ମିସରତି ସାମ୍‌ଦୁରିତି ଏ଼ୟୁ ତୀରେ ତଲେ ୱା଼ୟିକିନେସି ଅ଼ଡ଼େ ତାନି ୱେ଼ହ୍‌ନି ଗା଼ଲି ତଲେ କାଡା ଲାକ ତାନି କେୟୁ ୱୀଟ୍‌ନେସି, ଅ଼ଡ଼େ ଏ଼ଦାଣି ୱେ଼ଚାନା ସା଼ତାଗଟା ଜାର୍‌ଣା କିନେସି ଅ଼ଡ଼େ ଲ଼କୁଣି ୱା଼ୟିତି ପାଃଆନାୟାଁ ତଲେ ଏ଼ ବିତ୍ରାଟି ତା଼କି କିନେସି। 16 ଇଞ୍ଜାଁ, ଇସ୍ରାୟେଲ ମିସର ଦେ଼ସାଟି ହ଼ଚା ୱା଼ତି ବେ଼ଲାତା ଏ଼ନିକିଁ ଏ଼ଦାଆଁ ତାକି ଆ଼ହାମାଚେ, ଏଲେକିହିଁ ତାନି ଡ଼ୟାମାନି ଲ଼କୁ ତାକି, ଇଚିହିଁ, ଅସୁର ଦେ଼ସାଟି ଡ଼ୟାମାନି ଲ଼କୁ ତାକି ର଼ କାଜା ପା଼ହେରି ଆ଼ନେ।