1 ସାମା ଏ଼ ଜାକୁବ, ଆମ୍ବାଆସି ନିଙ୍ଗେ ଗା଼ଡ଼ି କିୟାତେସି,

ଏ଼ ଇସ୍ରାୟେଲ, ଆମ୍ବାଆସି ନିଙ୍ଗେ ରାଚି କିୟାତେସି,

ଏ଼ ପ୍ରବୁ ନୀଏଁ ଈ କାତା ଏଲେଇଞ୍ଜି ମାନେସି, ଆଜାଆନି,

ଇଚିହିଁ ନା଼ନୁ ନିଙ୍ଗେ ଗେଲ୍‌ପା ମାଞ୍ଜାଇଁ;

ନା଼ନୁ ନୀ ଦ଼ରୁ ଆସାହାଁ ନିଙ୍ଗେ ହା଼ଟାମାଞ୍ଜାଇଁ, ନୀନୁ ନା଼ ଲ଼କୁତି।

2 ନୀନୁ ଏ଼ୟୁ ବିତ୍ରାଟି ହାନି ବେ଼ଲା ନା଼ନୁ ନୀ ତ଼ଡ଼ୁ ଆୟାଇଁ କାଡାଟି ତା଼କିତିହିଁ,

ଏ଼ ବାରେ ନିଙ୍ଗେ ମୁସ୍ତେଏ; ନୀନୁ ହିଚୁ ବିତ୍ରାଟି ତା଼କିନି ବେ଼ଲା ୱେଅତି,

କି ହିଚୁ ଗୁଦ୍‌ୱା ନିଙ୍ଗେ ୱେୱି କିୟେଏ।

3 ଇଚିହିଁ ନା଼ନୁ ପ୍ରବୁତେଏଁ, ନୀ ମାହାପୂରୁ, ଇସ୍ରାୟେଲତି ଦାର୍ମୁଗାଟି ମାହାପୂରୁ,

ନିଙ୍ଗେ ଗେଲ୍‌ପାନାତେଏଁ;

ନା଼ନୁ ନୀ ଗେଲ୍‌ପାନି ଦାରା ଲେହେଁ ମିସର ଅ଼ଡ଼େ ନୀ ପିସ୍‌ପେ କୂସ

ଅ଼ଡ଼େ ସବା ଦେ଼ସା ହୀହାମାଞ୍ଜାଇଁ।

4 ନୀନୁ ନା଼ ନ଼କିତା ହା଼ରେକା ଦାରା ଅ଼ଡ଼େ ମା଼ନିଗାଟାତି ଆ଼ହାମାଞ୍ଜି

ଅ଼ଡ଼େ ନା଼ନୁ ନିଙ୍ଗେ ଜୀୱୁ ନ଼ହାମାଞ୍ଜାଇଁ;

ଏ଼ଦାଆଁତାକି ନା଼ନୁ ନୀ ପିସ୍‌ପେ ମାଣ୍‌ସିୟାଁଇଁ

ଅ଼ଡ଼େ ନୀ ଜୀୱୁତି ପିସ୍‌ପେ ବାରେ କୂଡ଼ା ହିୟାଇଁ।

5 ଆଜାଆନି; ଇଚିହିଁ ନା଼ନୁ ନୀ ତଲେ ମାଇଁ;

ନା଼ନୁ ୱେ଼ଡ଼ା ହ଼ପୁ ୱାକିଟି ନୀ କୂଲୁତି ତାଇଁ

ଅ଼ଡ଼େ ୱେ଼ଡ଼ା କୂଡ଼୍‌ନି ୱାକିଟି ନିଙ୍ଗେ କୂଡ଼ି କିୟାଇଁ;

6 ନା଼ନୁ ଟେ଼ବ୍ରି ୱାକିତାଣି ଏଲେଇଇଁ, ପିହ୍‌ମୁ ଅ଼ଡ଼େ ଟିଃନି ୱାକିତାଣି ଏଲେଇଇଁ,

ଆ଼ଙ୍ଗା ଇଟାଆନି; ନା଼ ମୀର୍‌କାଣି ହେକଟି

ଅ଼ଡ଼େ ନା଼ ମା଼ସ୍‌କାଣି ଦାର୍‌ତି ମୁଟ୍‌ପେଟି ତାଚା ହିୟାମୁ;

7 ନା଼ ଦ଼ରୁଟି ୱେ଼ଙ୍ଗାମାନେସି ଅ଼ଡ଼େ ଆମ୍ବାଆରାଇଁ ନା଼ନୁ ନା଼ ଗା଼ୱୁରମି ତାକି ଗା଼ଡ଼ି କିହାମାଇଁ,

ଇଲେତି ବାରେ ଲ଼କୁଣି ତାଦୁ; ନା଼ନୁ ଏ଼ୱାଣାଇଁ ଗା଼ଡ଼ି କିହାମାଇଁ;

ହାଅ, ନା଼ନୁ ଏ଼ୱାଣାଇଁ ରାଚି କିହାମାଇଁ।

8 କାନୁ ମାଞ୍ଜାହାଁ କା଼ଣା ଅ଼ଡ଼େ କିର୍ୟୁଁ ମାଞ୍ଜାହାଁ ବେ଼ରା,

ଈ ମାଣ୍‌ସିଇଁ ହ଼ପ୍‌ହା ତାଦୁ।

9 ବାରେ ଦେ଼ସାତି ଲ଼କୁ ରୁଣ୍ତା ଆ଼ପେରି ଅ଼ଡ଼େ ବାରେ କୂଡ଼ାତି ଲ଼କୁ ରଣ୍ତିଏ ତା଼ଣା ଆ଼ପେରି;

ଏ଼ୱାରି ବିତ୍ରାଟି ଆମ୍ବାଆସି ଈଦାଆଁ ୱେସାଲି ଆ଼ଡିନେସି ଅ଼ଡ଼େ ନ଼କିତି କାତା ମାଙ୍ଗେ ତ଼ସାଲି ଆ଼ଡାନେସି ?

ଏ଼ୱାରି ଦ଼ହ ହିଲାଆଗାଟାରି ଆ଼ହାଲି ତାକି ଜାହା ଜାହାରା ସା଼କିୟାଁ ତାପେରି;

ଆ଼ଆତିଁ ଏ଼ୱାରି ୱେଞ୍ଜାହାଁ ଈଦି ସାତା ଇଞ୍ଜିଁ ଇନାପେରି।

10 ପ୍ରବୁ ଏଲେଇଞ୍ଜି ମାନେସି, "ମୀରୁ ଏ଼ନିକିଁ ପୁଞ୍ଜାହାଁ ନା଼ ତା଼ଣା ନାମିଦେରି

ଅ଼ଡ଼େ ନା଼ନୁ ଏ଼ୱାତେଏଁ ଇଞ୍ଜିଁ ତେଲ୍‌ହିଦେରି,

ଏ଼ଦାଆଁତାକି ମୀରୁ ନା଼ ସା଼କି ଅ଼ଡ଼େ ନା଼ ଆ଼ଚିତି ହ଼ଲିୟାଙ୍ଗାତେରି।

ନା଼ ନ଼କେଏ ଆମିନି ମାହାପୂରୁ ରାଚି ଆ଼ହାହିଲେଏ

ଅ଼ଡ଼େ ନା଼ ଡା଼ୟୁ ଆ଼ହାଲି ଆ଼ଡେଏ।

11 ନା଼ନୁଏ ପ୍ରବୁତେଏଁ ଅ଼ଡ଼େ ନା଼ ପିସ୍‌ପେ ଗେଲ୍‌ପିନାସି ହିଲଅସି।

12 ନା଼ନୁ ୱେସିମାଇଁ, ନା଼ନୁ ଗେଲ୍‌ପାମାଇଁ ଅ଼ଡ଼େ ନା଼ନୁ ତ଼ସାମାଇଁ,

ଅ଼ଡ଼େ ମୀ ବିତ୍ରା ଏ଼ନି ଏଟ୍‌କା ଦେ଼ସାତି ପେ଼ନୁ ହିଲାଆତେ;

ଏ଼ଦାଆଁତାକି ପ୍ରବୁ ଏଲେଇଞ୍ଜି ମାନେସି,

ମୀରୁ ନା଼ ସା଼କିତେରି ଅ଼ଡ଼େ ନା଼ନୁ ମୀ ମାହାପୂରୁତେଏଁ।"

13 "ହାଅ, ନା଼ନୁଏ ମାହାପୂରୁତେଏଁ ଅ଼ଡ଼େ ଆମ୍ବାଆସି ନା଼ କେୟୁଟି ଗେଲ୍‌ପାନାସି ହିଲଅସି;

ନା଼ନୁ କାମା କିଇଁ, ଅ଼ଡ଼େ ଆମ୍ବାଆସି ସାପି କିୟାନେସି ?"

14 ମିଙ୍ଗେ ଗେଲ୍‌ପାନି ଇସ୍ରାୟେଲତି ଦାର୍ମୁଗାଟି ପ୍ରବୁ ଈ କାତା ଏଲେଇଞ୍ଜି ମାନେସି,

"ନା଼ନୁ ମିଙ୍ଗେ ତାକି ବାବିଲତା ଲ଼କୁଣି ପାଣ୍ତାମାଇଁ

ଅ଼ଡ଼େ ନା଼ନୁ ଏ଼ୱାରାଇଁ ହଣ୍‌ପି ଆ଼ତାରି ଲେହେଁ ତାଇଁ;

ଅ଼ଡ଼େ କଲ୍‌ଦିୟ ଲ଼କୁଣି ଜିକେଏ ଏ଼ୱାରି ରା଼ହାଁଟି ପା଼ଚିନି ଡଂଗତା ତାଇଁ।

15 ନା଼ନୁ ପ୍ରବୁ ମୀ ଦାର୍ମୁଗାଟି ଇସ୍ରାୟେଲଇଁ ଗା଼ଡ଼ିକିତି,

ନା଼ନୁ ମୀ ରାଜାତେଏଁ।"

16 ଆମ୍ବାଆସି ସାମ୍‌ଦୁରି ଅ଼ଡ଼େ ହା଼ରେକା ଏ଼ୟୁ ମାନି ତା଼ଣା ଜିରୁ କିନେସି;

17 ଆମ୍ବାଆସି ରାତା ଅ଼ଡ଼େ ଗ଼ଡ଼ା, ରିଜାରି କ଼ସ୍‌କା ଅ଼ଡ଼େ ବା଼ଡ଼୍‌ୟୁ ଗାଟାରାଇଁ ହ଼ପ୍‌ହା ତାନେସି;

ଏ଼ୱାରି ରହେଁଏ ଡ଼଼ଇ ରିହାଁ ଅ଼ଡ଼େ ନିଙ୍ଗଅରି,

ଏ଼ୱାରି ଡ଼ୀଞ୍ଜିନି ୱାତି ଲେହେଁ ଡୁମ୍ବା ହାନେରି,

ଏ଼ ପ୍ରବୁ ଈ କାତା ଏଲେଇଞ୍ଜି ମାନେସି।

18 ମୀରୁ ତଲିତି କାତା ବାରେ ଅଣ୍‌ପାଆଦୁ,

ଅ଼ଡ଼େ ପ୍ଣାଃଇ କାତା ବାରେ ମ଼ନତା ଅ଼ଆଦୁ।

19 ମେହ୍‌ଦୁ ନା଼ନୁ ର଼ ପୁଃନି କାମା କିଇଁ;

ଏ଼ଦି ନୀଏଁ ନେୟିଁନେ; ମୀରୁ କି ଏ଼ଦାଆଁ ପୁନଅତେରି ?

ଅ଼ଡ଼େ ନା଼ନୁ ପା଼ଡ଼ୁ ଜା଼ଡ଼ାତା ଜିରୁ ଅ଼ଡ଼େ ବାଃଲି ବୂମିତା କାଡା କିଇଁ।

20 ଜା଼ଡ଼ାତି ଜ଼ନ୍ତ ନାକାୟାଁ ଅ଼ଡ଼େ ଊଟୁ ପଟାୟାଁ ନା଼ ଗା଼ୱୁରମି କିନୁ;

ଇଚିହିଁ ନା଼ନୁ ନା଼ ଆ଼ଚାମାନି ଲ଼କୁ ଗସାଲି ତାକି ପା଼ଡ଼ୁ ଜା଼ଡ଼ାତା ଏ଼ୟୁ

ଅ଼ଡ଼େ ବାଃଲି ବୂମିତା କାଡା ହୀଇଁ;

21 ଏ଼ ଲ଼କୁଣି ନା଼ନୁ ନା଼ ସାମ୍ବ୍ରମି ୱେ଼କ୍‌ହାଲି ତାକି ଗା଼ଡ଼ି କିହାମାଇଁ।

22 ଆ଼ତିଜିକେଏ ଏ଼ ଜାକୁବ ନୀନୁ ନା଼ ନ଼କିତା ପ୍ରା଼ତାନା କିହାହିଲଅତି;

ଏ଼ ଇସ୍ରାୟେଲ ନୀନୁ ନା଼ ତାକି ୱା଼ହାମାଞ୍ଜି।

23 ନୀନୁ ନୀ ହିଚୁତା ହୂଡିନି ମେ଼ଣ୍ତା ନା଼ ତା଼ଣା ତାଚା ହିଲଅତି;

କି ନୀନୁ ନୀ ପୂଜା ତଲେ ନାଙ୍ଗେ ରା଼ହାଁ କିହା ମାଞ୍ଜଅତି।

ନା଼ନୁ ପୂଜା ତାକି ନିଙ୍ଗେ ହ଼ଲିୟା କାମା କିୱି କିହାମାଞ୍ଜଅଁ;

କି ଦୁପ୍‌ଣି ତାକି ନିଙ୍ଗେ ୱା଼ହିକିହା ମାଞ୍ଜଅଁ।

24 ନୀନୁ ୱେଣ୍ତି ଟାକା ହୀହାଁ ନା଼ ତାକି ଦୁପ୍‌ଣି କଡା ହିଲଅତି,

କି ନୀ ପୂଜାତି କଡ଼୍‌ୱାତା ନାଙ୍ଗେ ସାରି କିହାମାଞ୍ଜଅତି;

ସାମା ନୀନୁ ନୀ ପା଼ପୁ ତଲେ ନାଙ୍ଗେ ହ଼ଲିୟା କାମା କିୱି କିହାମାଞ୍ଜାଦି,

ନୀନୁ ନୀ ହା଼ରେକା ଲାଗେଏ କାମାତା ନାଙ୍ଗେ ୱା଼ହି କିହାମାଞ୍ଜାଦି।

25 ନା଼ନୁ ନା଼ ଦ଼ରୁ ତାକି ନୀ ବାରେ ଲାଗେଏତି କାମା ମ୍ଣେକ୍‌ହି ମାଞ୍ଜାଇଁ

ଅ଼ଡ଼େ ନୀ ପା଼ପୁ ବାରେ ନା଼ନୁ ଅଣ୍‌ପଅଁ।

26 ନାଙ୍ଗେ ଅଣ୍‌ପି କିୟାଦୁ; ମା଼ର ରଅତୱି ରଅଣି ବିଚାରା କିନ;

ନୀନୁ ଦ଼ହ ହିଲାଆଗାଟାତି ଆ଼ହାଲି ତାକି ନୀ କାତା ଜ଼ଲାମୁ।

27 ନୀ ମୂଲୁତି ମାଣ୍‌ସି ପା଼ପୁ କିତେସି

ଅ଼ଡ଼େ ମୀ ମାଦିତାରି ନା଼ କ଼ପାଟି ଲାଗେଏ କିହାମାନେରି।

28 ଈଦାଆଁତାକି ନା଼ନୁ ସୁଦୁ ଟା଼ୟୁତି କାଜାରାଇଁ ଲାଗେଏ କିଇଁ,

ନା଼ନୁ ଜାକୁବକି ବା଼କା ଅ଼ଡ଼େ ଇସ୍ରାୟେଲଇଁ ନିନ୍ଦା ଗାଟାୟି କିଇଁ।