1 ମା଼ କାବ୍ରୁ ଆମ୍ବାଆସି ନାମାମାନେସି ?

ଅ଼ଡ଼େ ପ୍ରବୁତି ବାହା ଆମ୍ବାଆରି ତା଼ଣା ତ଼ଞ୍ଜା ଆ଼ହାମାନେ ?

2 ଇଚିହିଁ ଏ଼ୱାସି ଏ଼ୱାଣି ନ଼କିତା ପା଼ଲା ଲେହେଁ ଅ଼ଡ଼େ ୱା଼ୟିତି ବୂମିତା ନେୟିଁତି ଡାକି ଲେହେଁ ପାଡାଆ଼ତେସି; ଏ଼ୱାଣି ୱା଼ଣା କି ଅ଼ଜୁ ହିଲେଏ;

ଏ଼ୱାଣାଇଁ ମେସ୍ତିସାରେ ମା଼ର ରା଼ହାଁ କିନାୟି, ତାନି ଇଲେତି ଅ଼ଜୁ ହିଲେଏ।

3 ଏ଼ୱାସି ହୀଣି ଅ଼ଡ଼େ ମାଣ୍‌ସି କୂତାସି;

ଦୁକୁତି ମାଣ୍‌ସି ଅ଼ଡ଼େ ଡ଼ୀକି ତ଼ଞ୍ଜା ଆ଼ହିମାନାସି,

ଇଞ୍ଜାଁ ମାଣ୍‌ସିୟାଁ ଆମ୍ବାଆରି ନ଼କିତା ମୂମ୍ବୁ ଡ଼ୁକ୍‌ନେରି,

ଇଲେତି ଲ଼କୁ ଲେହେଁ ଏ଼ୱାସି ହୀଣି ଆ଼ତେସି,

ଅ଼ଡ଼େ ମା଼ର ଏ଼ୱାଣାଇଁ ମା଼ନି କିଆତାୟି।

4 ସାତେଏ ଏ଼ୱାସି ମା଼ ର଼ଗ ଅ଼ହାମାନେସି,

ଅ଼ଡ଼େ ମା଼ ନ଼ନାଣି ଡେ଼କାମାନେସି।

ଆ଼ତିଜିକେଏ ମା଼ର ଏ଼ୱାଣାଇଁ ମାହାପୂରୁ ତା଼ଣାଟି ମା଼ଡା ବେଟାଆ଼ହାଁ ଦୁକୁତା ମାନେସି ଇଞ୍ଜିଁ ଅଣ୍‌ପିତାୟି।

5 ସାମା ଏ଼ୱାସି ମା଼ ଦ଼ହ ତାକି ରା଼ଣାରାକା ଆ଼ତେସି,

ଅ଼ଡ଼େ ମା଼ ଲାଗେଏତି କାମା ତାକି ନା଼ସା ଆ଼ତେସି;

ମା଼ ହିତ୍‌ଡ଼ିତି ସା଼ସ୍ତି ଏ଼ୱାଣି ଲାକ ୱା଼ତେ ଅ଼ଡ଼େ ଏ଼ୱାଣି ମା଼ଡା ତାକି ମା଼ର ନେହିଁ ଆ଼ତାୟି।

6 ମା଼ର ବାରେ ମେ଼ଣ୍ତାୟାଁ ଲେହେଁ ଏଟ୍‌କା ଜିରୁ ହାଜିମାନାୟି;

ମା଼ର ବାରେ ଜାହା ଜାହାରା ଜିରୁ ୱାକି ୱେଣ୍ତାମାନାୟି;

ଅ଼ଡ଼େ ପ୍ରବୁ ମା଼ ବାରେତି ଦ଼ହ ଏ଼ୱାଣି ଲାକ ଏକ୍‌ହାମାନେସି।

7 ଏ଼ୱାସି ସା଼ସ୍ତି ବେଟାଆ଼ତେସି, ଆ଼ତିଜିକେଏ ଏ଼ୱାସି ଜାହାରାଇଁ ଊଣା କିହାଁ ତାନି ଗୂତି ଏ଼କ୍‌ଆତେସି;

ଏ଼ନିକିଁ ପା଼ୟିନି ତା଼ଣା ଅ଼ୱିଆ଼ନି ବକ୍‌ଡ଼ା ମେ଼ଣ୍ତା ଅ଼ଡ଼େ ବା଼ଣାୟାଁ ରାତ୍‌ନାରି ନ଼କିତା ପାଲେଏ ଡ଼ୟିନି ମେ଼ଣ୍ତା ଲେହେଁ ଆ଼ହାଁ ଏ଼ୱାସି ତାନି ଗୂତି ଏ଼କ୍‌ଆତେସି।

8 ସା଼ସ୍ତି ହୀହାଁ ଅ଼ଡ଼େ ବିଚାରାତା ଦ଼ହ କିହାଁ ଏ଼ୱାଣାଇଁ ଅ଼ତେରି;

ଏ଼ୱାସି ଜୀୱୁଗାଟି ଲ଼କୁ ଦେ଼ସାଟି ହେକ ଆ଼ତେସି, ଈଦାଆଁ ତାମି ବେ଼ଲାତି ଲ଼କୁ ବିତ୍ରା ଆମ୍ବାଆସି ଅଣ୍‌ପିତେସି ?

ମା଼ ଲ଼କୁତି ଦ଼ହ ତାକି ଏ଼ୱାସି ମା଼ଡା ବେଟାଆ଼ତେସି।

9 ଇଞ୍ଜାଁ ଏ଼ୱାସି ଏ଼ନି ଲାଗେଏ କିଆତି ଜିକେଏ ଅ଼ଡ଼େ ତାନି ଗୂତିତା ଏ଼ନି ନା଼ଡ଼ିକିନାୟି ହିଲାଆତି ଜିକେଏ,

ଲ଼କୁ ଲାଗେଏତାରି ତଲେ ଏ଼ୱାଣି ମାହ୍‌ଣିମାଣ୍ତା ତୀରି କିତେରି,

ଅ଼ଡ଼େ ହା଼କିତା ଏ଼ୱାସି ବାତ୍‌କୁ ଗାଟାରି ତ଼ଡ଼ୁ ଆ଼ତେସି।

10 ଆ଼ତିଜିକେଏ ଏ଼ୱାଣାଇଁ କୁଟୁକୁଟା କିହାଲି ପ୍ରବୁତି ଅଣ୍‌ପୁ ଆ଼ତେ;

ଏ଼ୱାସି ଏ଼ୱାଣାଇଁ ଦୁକୁ କିହାମାନେସି; ମୀରୁ ଏ଼ୱାଣି ଜୀୱୁତି ପା଼ପୁତି ପୂଜା କିତିହିଁ,

ଏ଼ୱାସି ତାନି କୂଲୁ ମେହ୍‌ନେସି, ଏ଼ୱାସି ହା଼ରେକା ଦିନା ନୀଡା ଡ଼ୟିନେସି;

ଅ଼ଡ଼େ ଏ଼ୱାଣି କେୟୁତା ପ୍ରବୁତି ଇଚା ପୂରା ଆ଼ନେ।

11 ଏ଼ୱାସି ତାନି ଜୀୱୁତା ଦୁକୁ ବେଟାଆ଼ହାଁ ଏ଼ଦାଆଁ ମେହ୍‌ନେସି,

ଅ଼ଡ଼େ ରା଼ହାଁ ଆ଼ନେସି; ନା଼ ଦାର୍ମୁଗାଟି ହ଼ଲେଏସି ତାନି ବୁଦି ତଲେ ହା଼ରେକା ଲ଼କୁଣି ଦାର୍ମୁ କିନେସି;

ଅ଼ଡ଼େ ଏ଼ୱାସି ଏ଼ୱାରି ଦ଼ହ ତା଼ନୁଏ ଡେ଼କିନେସି।

12 ଈଦାଆଁତାକି ନା଼ନୁ ଏ଼ୱାଣାଇଁ ହା଼ରେକା କାଜାରି ତଲେ ଏ଼ୱାଣାକି ବା଼ଗା ହୀଇଁ,

ଅ଼ଡ଼େ ଏ଼ୱାସି ବା଼ଡ଼୍‌ୟୁ ଗାଟାରି ତଲେ ଦୂହିତାଣି ବା଼ଗା କିହା ଅ଼ନେସି;

ଇଚିହିଁ ଏ଼ୱାସି ତାନି ଜୀୱୁତି ହା଼କିତି ଗୂତିତା ହେର୍‌ପିତେସି;

ଅ଼ଡ଼େ ଦ଼ହଗାଟାରି ତଲେ ଲେକା ଆ଼ତେସି;

ଆ଼ତିଜିକେଏ ଏ଼ୱାସି ହା଼ରେକା ଲ଼କୁତି ପା଼ପୁତି ବ଼ଜୁ ଡେ଼କିତେସି,

ଅ଼ଡ଼େ ଦ଼ହଗାଟାରି ତାକି ପ୍ରା଼ତାନା କିତେସି।