1 ଦାର୍ମୁ ଲ଼କୁ ନା଼ସା ଆ଼ହିମାନେରି ଅ଼ଡ଼େ ଏ଼ କାତାତା ଆମ୍ବାଆସି ମ଼ନ ହୀହି ହିଲଅରି; ଇଞ୍ଜାଁ, ଏ଼ ଲ଼କୁ ଅ଼ୱିଆ଼ହି ମାନେରି, ଦାର୍ମୁଗାଟାରି ୱା଼ହିମାନି ବା଼ଦାଟି ଅ଼ୱିଆ଼ହି ମାନେରି, ଈଦାଆଁ ଆମ୍ବାଆରି ଅଣ୍‌ପି ହିଲଅରି। 2 ଏ଼ୱାସି ହିତ୍‌ଡ଼ିତା ତା଼କିନେସି ତୀର୍‌ପୁ ଜିରୁଟି ତା଼କିନାରି ବାରେ ଜାହା ଜାହାରା ପା଼ସ୍‌ପନିତା ଜ଼ମିନେରି।

3 ଏ଼ ଗାର୍‌ଡ଼ି ଗାଟାରି ମୀର୍‌କା, ଦା଼ସାରି ଅ଼ଡ଼େ ଦା଼ରେଣିସିକା ମୀର୍‌କା ମୀରୁ ଡାଗେ ୱା଼ଦୁ। 4 ମୀରୁ ଆମ୍ବାଆରାଇଁ କିଜୱି କିହିମାଞ୍ଜେରି ? ମୀରୁ ଆମ୍ବାଆରି ୱାକି ଗୂତି ଏ଼କ୍‌ହାଁ ଜ଼ଲି ମାଞ୍ଜେରି ? ମୀରୁ କି ଲାଗେଏତି ମୀର୍‌କା ଅ଼ଡ଼େ ମିଚି କୂଡ଼ାତେରି ଆ଼ଏ ? 5 ମୀରୁ ଅଲନ୍‌ ମା଼ର୍‌କା ବିତ୍ରା, ବାରେ ହିତ୍‌ଡ଼ି ମା଼ର୍‌କା ଡ଼଼ଇ ପେ଼ଣ୍‌କା ତାକି କାମା କିହାଲି ଅ଼ଡ଼େ ଜଲାୟାଁଣା ଅ଼ଡ଼େ ପା଼କା ପାରୁତା ମୀର୍‌କାଣି ପା଼ୟି ହିଲଅତେରି ? 6 ଜଲାୟାଁତି ଡ଼ୂସ୍‌ପା ୱାଲ୍‌କା ବିତ୍ରା ମୀ ବା଼ଗା, ଏ଼ ବାରେ ମୀ ଅଦିକାରା; ଅ଼ଡ଼େ ଏ଼ୱାସିକା ତାକି ମୀରୁ ଗହ୍‌ନି ପୂଜା ୱା଼କ୍‌ହାଁ ପୂଜା ହେର୍‌ପି ମାଞ୍ଜେରି। ଈ ବାରେ ତାକି ନା଼ନୁ କି ପାଲେଏ ଡ଼ୟିଇଁ ? 7 ର଼ କାଜା ପାଡାଆ଼ତି ହ଼ରୁତା ନୀନୁ ନୀ ପା଼ସ୍‌ପନି ପା଼ସାମାଞ୍ଜି; ଏ଼ ଟା଼ୟୁତା ଜିକେଏ ନୀନୁ ପୂଜା ହେର୍‌ପାଲି ହାଜାମାଞ୍ଜି। 8 ଇଞ୍ଜାଁ, ଦା଼ରା ଅ଼ଡ଼େ ଦୁୱେରି ବନ୍ଦୁ ଡା଼ୟୁୱାକି ନୀନୁ ନୀ ସିନା ଇଟାମାଞ୍ଜି; ଇଚିହିଁ ନୀନୁ ନା଼ ପିସ୍‌ପେ ଜାହାରାଇଁ ଏଟ୍‌କାତାରି ତା଼ଣା ତ଼ସାଲି ତାକି ଲାକ ହ଼ଚାମାଞ୍ଜି; ନୀନୁ ନୀ ପା଼ସ୍‌ପନି ଅ଼ସାରା କିହାଁ ଏ଼ୱାରି ତଲେ ରା଼ଜିମା଼ନା କିହାମାଞ୍ଜି; ନୀନୁ ଆମ୍ବିୟା ଏ଼ୱାରି ପା଼ସ୍‌ପନି ମେସ୍ତି ଏ଼ଦାଆଁ ଜୀୱୁ ନ଼ହାମାଞ୍ଜି। 9 ଇଞ୍ଜାଁ, ନୀନୁ ନିୟୁଁ ଆସାହାଁ ମଲେକ୍‌ ପେ଼ନୁ* ତା଼ଣା ହାଜାମାଞ୍ଜି ଅ଼ଡ଼େ ନୀ ଗାନ୍ଦା ନିୟୁଁ ଗାଡି କିହାମାଞ୍ଜି, ଅ଼ଡ଼େ ନୀ କାବ୍ରୁ ୱେହ୍‌ନାଣାଇଁ ହେକ ଦେ଼ସାତା ପାଣ୍ତାମାଞ୍ଜି ଅ଼ଡ଼େ ତା଼ଡ଼େପୂରୁ ପାତେକା ଜାହାରାଇଁ ଊଣା କିହାମାଞ୍ଜି। 10 ନୀନୁ ନୀ ଲାମ୍ବା ଜିରୁ ତାକି ୱା଼ହାହାଜା ମାଚି, ଆ଼ତିଜିକେଏ ନୀନୁ ବା଼ର୍ସୁ ହିଲେଏ ଇନାଆତି; ନୀ ବା଼ଡ଼୍‌ୟୁ ପାଡାଆ଼ତେ ଇଞ୍ଜିଁ ଅଣ୍‌ପିତି, ଏ଼ଦାଆଁତାକି ନୀନୁ ୱା଼ହାଆତି।

11 ଇଞ୍ଜାଁ ଆମ୍ବାଆରି ତାକି ନୀନୁ ଇଲେକିଁ ଆଜାମାଞ୍ଜି ଅ଼ଡ଼େ ମିଚି ଜ଼ଲିମାଞ୍ଜି ଅ଼ଡ଼େ ନାଙ୍ଗେ ଅଣ୍‌ପାମାଞ୍ଜଅତି କି ଏମ୍ବାଆଁ ନୀ ମ଼ନ ହୀହା ହିଲଅତି ? ନା଼ନୁ କି ହା଼ରେକା କା଼ଲା ପାଲେଏ ଡ଼ୟାହିଲଅଁ ? ଈଦାଆଁତାକି ନୀନୁ ନାଙ୍ଗେ ଆଜିମାଞ୍ଜଅତି ? 12 ନା଼ନୁ ନୀ ଦାର୍ମୁ ବାରେ ୱେ଼କ୍‌ଇଁ; ଇଞ୍ଜାଁ, ନୀ କାମା ବାରେ ନୀ ସା଼ୟେମି ଆୟେଏ। 13 ନୀନୁ ଏମିନି ବମାୟାଁ କୂଡ଼ି କିହାମାଞ୍ଜି, ନୀନୁ ଡ଼ୀନିବେ଼ଲା ଏ଼ୱି ନିଙ୍ଗେ ଗେଲ୍‌ପାପୁ; ସାମା ଗା଼ଲି ଏ଼ୱାସିକାଣି ଊପ୍‌ହା ଅ଼ନେ ର଼ ଦେବାତି ଊକ୍‌ଅଡ଼ି ଏ଼ ବାରେତି ଊପ୍‌ହା ଅ଼ନେ; ସାମା ଆମିନି ମାଣ୍‌ସି ନା଼ ତା଼ଣା ୱା଼ନେସି ଏ଼ୱାସି ଦେ଼ସା ଅଦିକାରା କିନେସି ଅ଼ଡ଼େ ନା଼ ସୁଦୁ ହ଼ରୁତି ଅଦିକାରା ଆ଼ନେସି।

14 ଅ଼ଡ଼େ ଏ଼ୱାସି ଏଲେଇନେସି, "ମୀରୁ ପାଡିକିଦୁ, ପାଡିକିଦୁ, ଜିରୁ ତିୟାରା କିଦୁ, ମା଼ ଲ଼କୁ ଜିରୁଟି କସ୍ତ ହେକ କିଦୁ।"

15 ଇଚିହିଁ ଆମ୍ବାଆସି କା଼ଲେଏ ବାସା କିନାସି, ଆମ୍ବାଆରି ଦ଼ରୁ ସୁଦୁ, ଏ଼ କାଜା ପାଡାଆ଼ତି ମାଣ୍‌ସି ଈ କାତା ଏଲେଇନେସି; "ନା଼ନୁ ଲାକ ଅ଼ଡ଼େ ସୁଦୁ ଟା଼ୟୁତା ବାସା କିଇଁ, ଅ଼ଡ଼େ ତୀର୍‌ପୁ ଲ଼କୁତି ଜୀୱୁ ଇଞ୍ଜାଁ ଡ଼ୀକିଗାଟି ଲ଼କୁତି ହିୟାଁ ୱେଣ୍ତେ ଜୀୱୁ କିଇଁ ଅ଼ଡ଼େ ଏ଼ୱାରି ତଲେ ବାସା କିଇଁ। 16 ଇଚିହିଁ ନା଼ନୁ କା଼ଲେଏ ଏ଼ୱାରି କ଼ପାଟି ଦାୱା କିଅଁ ଅ଼ଡ଼େ କା଼ଲେଏ କାର୍‌ବି ଆ଼ଅଁ; କିତିହିଁ ଜୀୱୁ ଅ଼ଡ଼େ ନା଼ କେ଼ପିତି ବାରେ ଜୀୱୁ ଗାଟାଇ ନା଼ ନ଼କିତା ବା଼ଡ଼୍‌ୟୁ ହିଲାଆଗାଟାଇ ଆ଼ନୁ। 17 ନା଼ନୁ ତାନି ଜୂପ୍‌କାତି ଦ଼ହ ତାକି କାର୍‌ବି ଆ଼ହାଁ ଦୁକୁ ହୀହାମାଚେଏଁ, ଅ଼ଡ଼େ ଜାହାରା ମୂମ୍ବୁ ଡ଼ୁକ୍‌ହାଁ କାର୍‌ବି ଆ଼ତେଏଁ, ଏଚେଟିଏ ଏ଼ୱାସି କାତା ଆହ୍‌ଆନା ଜାହାରା ମ଼ନତି ଜିରୁତା ତା଼କିତେସି।"

18 ନା଼ନୁ ଏ଼ୱାଣି ତା଼କୁ ମେସାମାଇଁ ଅ଼ଡ଼େ ଏ଼ୱାଣାଇଁ ନେହିଁ କିଇଁ; ଅ଼ଡ଼େ ନା଼ନୁ ଏ଼ୱାଣାଇଁ ଜିରୁ ତା଼କି କିଇଁ, ଇଞ୍ଜାଁ ଏ଼ୱାଣାଇଁ ଅ଼ଡ଼େ ତାମି ଦୁକୁତି ଲ଼କୁଣି ଦୁକୁ ଡୂକ୍‌ଇଁ। 19 ନା଼ନୁ ଗୂତିତି ପା଼ଡ଼େୟି ଗା଼ଡ଼ି କିଇଁ; ପ୍ରବୁ ଏଲେଇଞ୍ଜି ମାନେସି, "ହେକ ଅ଼ଡ଼େ ଡାଗେତି ଲ଼କୁ ତାକି ହିତ୍‌ଡ଼ି, ହିତ୍‌ଡ଼ି ଆ଼ପେ ଅ଼ଡ଼େ ନା଼ନୁ ଏ଼ୱାଣାଇଁ ନେହିଁ କିଇଁ।" 20 ସାମା ଲାଗେଏତାରି ସାମ୍‌ଦୁରିତି ଉଣ୍ତା ଲେହେଁ, ଇଚିହିଁ ଏ଼ଦି ତୀରି ଆ଼ହାଁ ଡ଼ୟାଲି ଆ଼ଡେଏ, ଅ଼ଡ଼େ ଏମ୍ବାତି ଏ଼ୟୁ ତଲେ ଲିପିଲିପି ଅ଼ଡ଼େ କା଼ଦ ଆ଼ନେ। 21 ମା଼ ମାହାପୂରୁ ଏଲେଇନେସି "ଲାଗେଏତାରାକି ଇଚାୟି ହିତ୍‌ଡ଼ି ହିଲେଏ।"