1 Iri ni ryo jambo ryatumwe kuri Yeremiya rivuye k’Uhoraho, rivuga riti: 2 "Nimwumve ibiri muri iri sezerano kugira ngo mubibwire abantu b’i Buyuda n’ababa i Yerusalemu. 3 Ubabwire uti: ‘Uku ni ko Uhoraho, Imana ya Isirayeli, avuze: Aravumwe umuntu atumvira ivyanditswe muri iryo sezerano, 4 ivyo nategetse ba sogokuruza banyu igihe nabakura muri Egiputa, mw’itanure rivugutira ivyuma.’ Navuze nti: ‘Munyumvire kandi mukore ivyo vyose ndabategetse, maze muzoba abantu banje, nanje nzoba Imana yanyu. 5 Ni ho nzoshitsa indahiro narahiye ba sogokuruza banyu, ko nzobaha igihugu gitemba amata n’ubuki, ico na co ni iki gihugu mubamwo uwu musi.’ "

Maze ndishura nti: "Amen, Uhoraho."

6 Uhoraho arambwira ati: "Menyekanisha aya majambo yose mu bisagara vy’i Buyuda no mu mabarabara y’i Yerusalemu, uti: ‘Nimwumve ibiri mu iri sezerano maze muvyitondere. 7 Kuva igihe nakuriye ba sogokuruza banyu muri Egiputa gushika uwu musi, narababuriye kenshi cane, mvuga nti: Nimunyumvire. 8 Ariko ntibanyumviye canke ngo banabibabare; ahubwo, bakurikiye ugukomantara kw’imitima yabo mibi. Ni co catumye ndabashitsako imivumo yose yari muri iryo sezerano nari nabahaye ngo baryitondere ariko bakarita.’ "

9 Maze Uhoraho arambwira ati: "Hari uguhuza inama mbi mu bantu b’i Buyuda n’ababa i Yerusalemu. 10 Basubiye mu vyaha vya ba sekuruza, banse kwumva amajambo yanje. Bakurikiye izindi mana ngo bazisabe. Baba abo mu nzu ya Isirayeli canke abo mu nzu ya Yuda bavuye mw’isezerano nagiranye na ba sekuruza. 11 Ni co gituma Uhoraho avuze ati: ‘Nzobateza icago badashobora kwikiza. Naho bazontakambira, sinzobumva. 12 Ibisagara vy’i Buyuda n’abantu b’i Yerusalemu bazogenda batakambire izo mana bazituririra ibimota neza, ariko ntizizobatabara na gatoya igihe icago kizoba kije. 13 Yemwe Bayuda, mufise imana zingana n’ibisagara vyanyu; kandi mwubatse ibicaniro vyo guturirirako ibimota neza iyo mana iteye isoni Bayali bingana n’amabarabara y’i Yerusalemu.’

14 Ntusabire aba bantu canke ngo unyambaze ku bwabo canke ngo ubingingire, kuko ntazokwumva nibantakambira mu gihe agatengo kabo kazoba kabafashe.

15 Mbega umukunzi wanje ariko akora iki mu Ngoro yanje

ko mbona we, n’abandi benshi bakora ibikorwa bibi?

Mbega inyama zejejwe zosubiza inyuma igihano muzohanwa?

Kandi iyo muri mu bibi vyanyu,

muranezerwa!"

16 Uhoraho yabita igiti gitotahaye ca Elayo

gifise ivyamwa bisa neza.

Ariko ukubomborana kw’igihuhusi gihambaye

kuzotuma gifatwa n’umuriro,

kandi amashami yaco azovunwa.

17 Uhoraho Mushoboravyose, ari we yaguteye, yakugeneye ikiza, kuko abo inzu ya Isirayeli n’inzu ya Yuda bakoze ibibi bakandatsa mu guturirira ibimota neza Bayali.

18 Kubera Uhoraho yampishuriye inama bangira, narayimenye, kuko muri ico gihe yanyeretse ivyo bariko barakora. 19 Nari nabaye nk’umwagazi w’intama ujanwa kubagwa; sinamenya ko bari bangiriye inama, bavuga bati:

"Reka duhonye igiti n’ivyamwa vyaco,

reka tumurandure tumukure mw’isi y’abazima

kugira ngo izina ryiwe ntirizosubire kwibukwa."

20 Yewe Uhoraho Mushoboravyose, ni wewe uca imanza zigororotse,

ugasuzuma imitima y’abantu ukamenya ivyo biyumvira.

Uze umpe kubona ingene uzobihora,

kuko ari wewe nashikirije urubanza rwanje.

21 Uku ni ko Uhoraho abwira abantu bo muri Anatoti barondera kukwica, bakavuga bati: "Reka kuvugishwa mw’izina ry’Uhoraho, bitari uko turakwica." 22 Nuko uku ni ko Uhoraho Mushoboravyose avuze: "Nzobahana. Abasore babo bazokwicwa n’inkota, abahungu babo n’abakobwa babo bicwe n’ikigoyi. 23 Nta n’umwe azorokoka. Nzorungikira ivyago abantu bo muri Anatoti mu mwaka wo guhanwa kwabo."