1 Iri ni ryo jambo ryatumwe kuri Yeremiya rivuye k’Uhoraho, rivuga riti: 2 "Manuka uje ku nzu y’umubumvyi, aho ni ho nzogira ico ndakubwiye." 3 Nuko ndamanuka ku nzu y’umubumvyi, maze nsanga ariko arabumba. 4 Ariko inkono yariko arabumbamwo iryo bumba yononekarira mu ntoke ziwe; maze wa mubumvyi aca yongera kuribumbamwo iyindi nkono, ayigira uko yagomba.

5 Maze Uhoraho ambwira ijambo ati: 6 "Yemwe ab’inzu ya Isirayeli, mbega sinoshobora kubagira nk’uko uwo mubumvyi yagize?" ni ko Uhoraho avuze. "Nk’uko ibumba rimera mu ntoke z’umubumvyi, ni ko mumeze mu kuboko kwanje, yemwe ab’inzu ya Isirayeli. 7 Ninamenyesha ko ihanga canke ubwami bugiye kurandurwa, gusamburwa no gusangangurwa, 8 maze iryo hanga naburiye niryihana rikava mu bibi vyaryo, nzokwigarura sindabateze ivyago nari nateguye kubahanisha. 9 Kandi ikindi gihe ninamenyesha ko nzokwubaka ngashinga ihanga canke ubwami, 10 maze iryo hanga rigakora ibibi mu nyonga zanje ntirinyumvire, nuko nanje nzoreka kubashitsako ivyiza nari nabagereye.

11 Nuko rero bwira abantu b’i Buyuda n’ababa i Yerusalemu uti: ‘Uku ni ko Uhoraho avuze: Raba! Nateguye icago kuri mwebwe kandi nateguye kubagirira nabi. Nuko nimureke inzira zanyu mbi, umwe wese, maze mugaruke mu nzira nziza mureke n’ibikorwa vyanyu bibi.’ 12 Ariko bazokwishura bati: ‘Oya na mba. Tuzokwibandaniriza mu migambi yacu; umwe wese azokwibandaniriza mu gukomantara kw’umutima wiwe mubi.’ "

13 None rero uku ni ko Uhoraho avuze:

"Nimubaze mu mahanga:

ni nde yigeze yumva ikintu nk’ico?

Hariho ikintu c’ubuyobe cakozwe

n’umukobwa wanje Isirayeli!

14 Mbega shelegi y’i Libani

murigera mubona yavuye ku gitandara yiberako?

Amazi akanye ava muri yo

arigera areka gutemba?

15 Ariko abantu banje baranyibagiye;

baturirira ibimota neza imana zitagira ikimazi,

bituma batsitara mu ngendo zabo

no mu nzira zabo za kera.

Bituma baca mu nzira zidaharuye

no mu miharuro itubatse.

16 Nzohindura igihugu cabo amatongo,

ahantu abantu bavugiriza agahwa;

abazohaca bose bazotangara

kandi bazozunguza imitwe.

17 Nk’uko umuyaga uhuha uvuye mu buseruko,

nzobasanzaza imbere y’abansi babo;

nzobatera umugongo ndabahishe mu nyonga hanje

ku musi w’ivyago vyabo."

18 Baravuze bati: "Nimuze, tugire imigambi yo kugwanya Yeremiya; kuko umuherezi ntazoreka kwigisha ivyagezwe, umunyabwenge ntazoreka gutanga impanuro, canke abavugishwa ngo bareke gushikiriza ijambo. Nimuze rero, tumugwanye mu kumuvuga nabi kandi ntitwumvirize ikintu na kimwe avuga."

19 Nyumviriza, yewe Uhoraho;

niwumve ivyo abanyagiriza bariko bavuga!

20 Mbega iciza cokwishurwa ikibi?

Ariko banyimbiye ikinogo.

Wibuke ko nahagaze imbere yawe

nkabavugira

kugira ngo uhwamike uburake bwawe bubaveko.

21 Nuko rero reka abana babo bicwe n’ikigoyi;

batange babe musi y’ubushobozi bw’inkota.

Abagore babo nibabe ingumba n’abapfakazi;

abagabo babo nibicwe,

abahungu babo bicwe n’inkota mu ntambara.

22 Amaborogo niyumvikane mu mazu yabo

aho uzozana giturumbuka abo kubatera,

kuko bimvye ikinogo ngo ndakigwemwo

kandi banteze imitego yo mu mpisho.

23 Ariko wewe Uhoraho, urabizi

inama bangira zo kunyica.

Ntubaharire ibibi vyabo

canke ngo uhanagure ivyaha vyabo imbere yawe.

Nibatsitarire imbere yawe;

ubagwanye mu gihe c’uburake bwawe.