1 Iri ni ryo jambo ryatumwe kuri Yeremiya rivuye k’Uhoraho ku ngoma ya Yehoyakimu mwene Yosiya umwami w’i Buyuda, rivuga riti: 2 "Genda ku muryango wa Rekabu ubatumire ngo baze mu cumba kimwe co mu Ngoro y’Uhoraho ubahe umuvinyu banywe."

3 Nuko ngenda kurondera Yazaniya mwene Yeremiya, mwene Habaziniya, n’abavukanyi biwe n’abahungu biwe, umuryango wose w’Abarekabu. 4 Ndabazana mu Ngoro y’Uhoraho, mu cumba ca bene Hanani mwene Igidaliya umuntu w’Imana. Cari i ruhande y’icumba c’abatware, cakurikirana n’ica Mayaseya mwene Shalumu umurinzi w’irembo. 5 Maze nzana imibindi yuzuye umuvinyu n’ibikombe imbere y’Abarekabu nca ndababwira nti: "Nimunywe uwu muvinyu."

6 Ariko barishura bati: "Ntitunywa umuvinyu, kuko sogokuruza wacu Yonadabu mwene Rekabu yadutegetse ati: ‘Yaba mwebwe canke uruvyaro rwanyu ntimuze munywe umuvinyu. 7 Kandi vyongeye ntimuze mwigere mwubaka inzu, ngo mubibe imbuto canke ngo mutere inzabibu; ntimuze mukore na kimwe muri ivyo, ariko muze mugume mwibera mu mahema. Ni ho muzorambira mu gihugu murimwo nk’ingenzi.’ 8 Twumviye ikintu cose Sogokuruza Yonadabu mwene Rekabu yadutegetse. Baba twebwe, baba abagore bacu, abahungu bacu canke abakobwa bacu, ntitwigeze tunywa umuvinyu 9 canke ngo twubake amazu yo kubamwo canke ngo dutere imizabibu, tugire imirima canke ivyimburwa. 10 Twabaye mu mahema kandi twumviye ivyo sogokuruza wacu Yonadabu yadutegetse. 11 Ariko igihe Nebukadineza umwami w’i Babiloni yatera iki gihugu, twaravuze tuti: ‘Nimuze, tugende i Yerusalemu kugira ngo dukire ingabo z’Abanyababiloni n’Abanyaramu.’ Nuko twagumye i Yerusalemu."

12 Maze ijambo ry’Uhoraho rica ritumwa kuri Yeremiya, riti: 13 "Uku ni ko Uhoraho Mushoboravyose, Imana ya Isirayeli, avuze: Genda ubwire abantu b’i Buyuda n’ab’i Yerusalemu uti: ‘Ntimuriga icigwa ngo mwumvire amajambo yanje?’ Ni ko Uhoraho avuze. 14 ‘Yonadabu mwene Rekabu yategetse abahungu biwe ngo ntibanywe umuvinyu kandi ico cagezwe baracitondeye. Gushika uwu musi ntibanywa umuvinyu, kuko bubahirije icagezwe ca sekuruza wabo. Jewe navuganye namwe kenshi, ariko ntimwanyumviye. 15 Ni kenshi natumye abasavyi banje navugisha kuri mwebwe. Bakavuga bati: Umwe wese nave mu nzira ziwe mbi ahindure ibikorwa vyiwe; ntimukurikire izindi mana ngo muzisabe. Ni ho muzoba mu gihugu nabahaye mwebwe na ba sogokuruza banyu. Ariko ntimwanteze ugutwi canke ngo munyumvire. 16 Uruvyaro rwa Yehonadabu mwene Rekabu bagumye bitondera icagezwe yabahaye, ariko aba bantu ntibanyumviye.’

17 Ni co gituma, Uhoraho Imana Mushoboravyose, Imana ya Isirayeli, avuze ati: ‘Nimwumve! Ngiye kuzana ku Bayuda no ku baba i Yerusalemu ivyago vyose nabagereye ko nzobateza. Navuganye na bo, ariko ntibumva; narabahamagaye, ariko ntibitaba.’ "

18 Maze Yeremiya abwira umuryango w’Abarekabu ati: "Uku ni ko Uhoraho Mushoboravyose, Imana y’Abisirayeli, avuze: ‘Mwitondeye icagezwe ca sogokuruza wanyu Yonadabu, mwumvira ivyo yategetse vyose kandi mukora ivyo yababwiye vyose.’ 19 Nuko rero, uku ni ko Uhoraho Mushoboravyose, Imana y’Abisirayeli, avuze: ‘Yonadabu mwene Rekabu ntazokwigera abura umuntu wo kunkorera.’ "