1 Mu kwezi kwa gatanu kw’uwo mwaka, umwaka ugira kane, mu misi ya mbere y’ingoma ya Zedekiya umwami w’i Buyuda, kamenyi Hananiya mwene Azuri, yava i Gibeyoni, arambwira turi mu Ngoro y’Uhoraho imbere y’abaherezi n’abantu bose ati: 2 "Uku ni ko Uhoraho Mushoboravyose, Imana ya Isirayeli avuze: ‘Nzovunagura ingogo y’umwami w’i Babiloni. 3 Mu myaka ibiri nzogarukana aha hantu ibikoresho vyose mu Ngoro y’Uhoraho ivyo Nebukadineza umwami w’i Babiloni yakuye ngaha akabijana i Babiloni. 4 Kandi nzogarukana aha hantu Yehoyakini mwene Yehoyakimu umwami w’i Buyuda n’abajanywe bose ari inyagano i Babiloni bakuwe i Buyuda,’ ni ko Uhoraho avuze, ‘kuko nzovunagura ingogo y’umwami w’i Babiloni.’ "

5 Maze umuvugishwa Yeremiya yishura uwo muvugishwa Hananiya bari imbere y’abaherezi n’abantu bose bari bahagaze ngaho mu Ngoro y’Uhoraho; 6 amubwira ati: "Amen! Icompa Uhoraho akabikora uko! Icompa Uhoraho agashitsa amajambo uvugishijwe akagarukana ibikoresho vyo mu Ngoro y’Uhoraho n’abajanywe ari inyagano i Babiloni bakagaruka hano. 7 Ariko rero, niwumve ivyo ngomba mvugire imbere yawe n’imbere y’abantu bose: 8 Kuva mu bihe vya kera abavugishwa bakwitangiye imbere na jewe twavugishijwe ivy’intambara, ikiza n’icago bizoba ku bihugu vyinshi n’ubwami bukomeye. 9 Ariko umuvugishwa avugishwa ivy’amahoro azomenyekana ko vy’ukuri yatumwe n’Uhoraho mu gihe ivyo yavugishijwe bizoba bishitse gusa."

10 Maze uwo muvugishwa Hananiya afata ya ngogo yari ku bitugu vy’uwavugishwa n’Imana Yeremiya arayivunagura, 11 aca avugira imbere y’abantu bose ati: "Uku ni ko Uhoraho avuze: ‘Uku ni ko nzovunagura ingogo y’umwami Nebukadineza umwami w’i Babiloni nkayikura ku bitugu vy’amahanga mu gihe kitarenze imyaka ibiri.’ " Avuze ivyo, uwavugishwa n’Imana Yeremiya aca arigira.

12 Inyuma y’igihe gitoya umuvugishwa Hananiya ahejeje kuvunagura ya ngogo ku bitugu vy’umuvugishwa Yeremiya, ijambo ry’Uhoraho ritumwa kuri Yeremiya riti: 13 "Genda ubwire Hananiya uti: ‘Uku ni ko Uhoraho avuze: Wavunaguye ingogo y’igiti, ariko mu gishingo cayo uzoronka ingogo y’icuma. 14 Uku ni ko Uhoraho Mushoboravyose, Imana ya Isirayeli avuze: Nzoshira ingogo y’icuma ku bitugu vy’aya mahanga ngo ndabahe gukorera Nebukadineza umwami w’i Babiloni, kandi bazomukorera. Mbere nzomuha no kuganza ibikoko vyo mw’ishamba.’ "

15 Maze uwavugishwa n’Imana Yeremiya abwira uwo muvugishwa Hananiya ati: "Umve, yewe Hananiya! Uhoraho ntiyagutumye, ariko wabwiye aba bantu ngo bizigire ibinyoma. 16 Kubera ivyo, uku ni ko Uhoraho avuze: ‘Ngiye kugukura kw’isi. Muri uwu mwaka nyene ugiye gupfa, kuko wigishije abantu kugarariza Uhoraho.’ "

17 Mu kwezi kw’indwi kw’uwo mwaka nyene, umuvugishwa Hananiya arapfa.