1 एक दिन हिजकिय्याह एड़ा बमार ऊआ कि से मरने वाल़ा था। तेबे आमोसो रे पाऊ यशायाह नबीए तेसगे जाई की बोलेया, "यहोवा ईंयाँ बोलोआ कि आपणे कअरो दे सब कुछ ठीक करी दे, कऊँकि तूँ नि बचणा, बल्कि मरी ई जाणा।" 2 तेबे राजा हिजकिय्याहे कांदा रिया तरफा खे मूँ फेरी की यहोवे ते प्रार्थना करी की बोलेया, 3 "ओ यहोवा, आऊँ प्रार्थना करूँआ कि आऊँ सच्चाई ओर खरे मनो साथे आपू खे तां सामणे जाणी की चलदा आई रा ओर जो तेरी नजरा दे ठीक था, सेई करदा आई रा।" ओर हिजकिय्याह ईंकी-ईंकी की रोणे लगेया। 4 तेबे यहोवे रा ये वचन यशायाह गे पऊँचेया, 5 "जाई की हिजकिय्याह रे नेड़े जा ओर तेसखे बोल कि तेरे मूलमर्द दाऊदो रा परमेशर यहोवा ईंयाँ बोलोआ कि मैं तेरी प्रार्थना सुणी ओर तेरे आसू देखे, सुण, मां तेरी उम्र पंद्रा साल ओर बढ़ाई देणी। 6 अश्शूरो रे राजे रे आथो ते आऊँ तेरी ओर एस यरूशलेम शईरो री रक्षा करी की बचाऊँगा।" 7 यहोवा जो बोली राखेया से तेस पूरा करना, 8 ओर यहोवे रिया तरफा ते एसा गल्ला रा ये नशाण ऊणा कि तूपा री छांए जो राजा आहाजो रे जरीये बणाई दी पैड़िया पाँदे, यहोवे छांए दस कदम पीछे लई जाणी। तेबे से छांए जो दश कदम पीछे चली गी थी वापस ऊई गी।

9 यहूदा रे राजा हिजकिय्याह रा से लेख जो तिने लिखेया, जेबे से बमार ऊई की ठीक ऊईगा था से ये आराधना रा गीत था: 10 मैं आपणे मनो दे बोलेया, "आपणी उम्रा रे बीचे ई मां अधलोको रे बड़े द्वारा दे जाणा; कऊँकि मेरी बाकी उम्र कम करी ती री।"* 11 मैं बोलेया कि मां यहोवा जिऊँदेया री जमीना दे फेर नि देखी सकणा, एसा दुनिया रे माणूं मां फेर नि देखी सकणे। 12 मेरा कअर गवाल़े रे तम्बूए जेड़ा चकी ता रा, मैं जुलाहे जेड़ी आपणी जिन्दगी लपेटी ती री, तेस आऊँ ताँता ते बाडी की लग करी देणा, तां एक ई दिनो दे मेरा अन्त करी देणा। 13 मैं प्यागा तक सोच बचार कित्तेया; परमेशर शेरो जेड़ा मेरे सारे आड्ड तोड़ोआ; तां एक ई दिनो दे मेरा अन्त करी देणा। 14 आऊँ ककराखा जेड़ा ओर सारसो जेड़ा च्यूं-च्यूं करदा ओर कबूतरो जेड़ा रोंदा रएया। मेरी आखी ऊबे देखदिया-देखदिया थकी गी रिया। ओ यहोवा, मां पाँदे अन्देर ऊणे लगी रा, तूँ मेरा सआरा ओ! 15 आऊँ क्या बोलूँ? यहोवे ई माखे बोलेया ओर पूरा बी कित्तेया। मां पूरी जिन्दगी दु:खो साथे आऊल़े-आऊल़े चलदे रणा। 16 ओ प्रभु, इना ई गल्ला साथे लोक जिऊँदे ए ओर इना सबी साथे मेरी आत्मा खे जिन्दगी मिलोई। तूँ माखे ठीक कर ओर जिऊँदा राख! 17 देख, शान्तिया खेई माखे बऊत दु:ख ऊआ; पर तैं प्यार करी की आऊँ नाशो रे गड्डे ते निकयाल़ी राखेया, कऊँकि तैं मेरे सारे पाप आपणी पीठी पीछे सेटी ते रे। 18 कऊँकि अधलोको ते आऊँ तेरा तन्यवाद नि करी सकदा, ना मरने ते बाद आऊँ तेरी स्तुति करी सकदा; जो कब्रा दे पड़ी गे रे सेयो तेरी सच्चाईया री उम्मीद नि राखी सकदे। 19 सेओ लोक जो जिऊँदे, आ जिऊँदे ई तेरा तन्यवाद करोए, जेड़ा आऊँ आज करने लगी रा; बाओ तेरी सच्चाईया रा सन्देश आपणे पाऊआ खे देयोआ। 20 यहोवे मेरा उद्धार करना, इजी बजा ते आसा पूरी जिन्दगी यहोवे रे मन्दरो दे तार वाल़े बाजे साथे आपणे बणाए रे गाणे गांदे रणा। 21 यशायाहे राजे रे कर्मचारिया ते बोलेया था, "हिजकिय्याह रे फोड़े पाँदे दाऊगल़े री एकी टिक्की रा लेप लगाणा, तेबे से बचणा।" 22 तेबे हिजकिय्याहे यशायाह ते पूछेया, "इजी रा क्या नशाण ऊणा कि आऊँ यहोवे रे मन्दरो दे फेर जाई सकणा?"