1 यहोवे बोलेया, पर एबे ओ मेरे दास याकूब, ओ मेरे चूणे रे इस्राएल, मेरी गल्ल सुणी लो! 2 ताखे बनाणे वाल़ा यहोवा, जो ताखे गर्भो तेई बणांदा आया ओर तेरी मताद करदा आई रा, से ईंयाँ बोलोआ, "ओ मेरे दास याकूब, ओ मेरे चूणे दे यशूरून, डर नि!* 3 कऊँकि त्याये लोका रिया तँईं मा पाणी बरसाणा। सूकिया जमीना दे खाड्डा बाह्णियां, मां तेरे बच्चेया पाँदे आपणी आत्मा ओर तेरी ल्वादा पाँदे आपणी आशीष लटणी।* 4 बच्चे तिना बियूँसा रे डाल़ा जेड़े बढ़ने जो पाणिए कनारे काओ बीचे ओए।" 5 लोका बीचा ते केसी बोलणा, "आऊँ यहोवे रा ए" केसी आपणा नाओं याकूब राखणा, केसी आपणे आथो दे लिखणा, "आऊँ यहोवे राए" ओर आपणे कुलो रा नाओं इस्राएली बताणा।

6 यहोवा इस्राएलो रा राजा ए, मतलब सेना रा यहोवा जो तेसखे छुड़ाणे वाल़ा ए, से ईंयाँ बोलोआ, "आऊँ सबी ते पईला ए ओर आऊँ ई अन्तो तक रणा; माखे छाडी की कोई परमेशर अया ई नि।* 7 जदुओ ते मैं पुराणे बखतो ते माणूं बणाए, तदुओ ते कुण ऊआ जो मां जेड़ा तिजी खे प्रचार करो या बताओ या मेरिया तँईं बणाओ या ऊणे वाल़िया गल्ला पईले तेई बताओ? 8 डरो नि ओर ना ई कबराओ; क्या मैं पईले तेई यो गल्ला तुसा गे नि सुणाईयां ओर तुसा सामणे ल्याईया नि? तुसे मेरे गवाह् ए। क्या माखे छाडी की ओर कोई देवता ए? ना, माखे छाडी की कोई चट्टान नि ए, आऊँ केसी ओरी खे नि जाणदा।"

9 जो लोक मूर्तिया कअड़ी की बणाओए, सेयो सारिया मूर्तिया बेकार ए ओर जिना चीजा दे सेयो खुशी टोल़ोए, तिना ते कोई फायदा नि ऊणा, तिना रे गवाह् ना तो आपू कुछ देखदे ओर ना कुछ जाणदे, इजी री खातर तिना खे शर्मिंदा ऊणा पड़ना। 10 किने देवता या बेकार मूर्तिया बणाईया? 11 देख, तेसरे सारे मूर्तिया खे बनाणे वाल़े कारीगर ओर पूजा करने वाल़ेया खे शर्मिंदा ऊणा पड़ना, मूर्तिया बनाणे वाल़े तो माणूं ईए, सेयो सारे के सारे कट्ठे ऊई की खड़े ओ; सेयो डरी जाणे; सेयो सारे के सारे शर्मिंदा ऊणे। 12 ल्वार एक बसूला फेऊआ पाँदे बणाओआ ओर थौड़ेया साथे कअड़ी की त्यार करोआ, से आपणी तागती साथे तिजी खे बणाओआ; तेबे से पूखा ऊई जाओआ ओर तेसरी तागत कम ऊई जाओई, से पाणी नि पींदा ओर थकी जाओआ। 13 मिस्त्री सूत लगाई की परकारा साथे सरेदा लगाओआ ओर छिणियाँ ओर रन्दे साथे काम करोआ, से तिजी रा आकार ओर माणूंए जेड़ी सुन्दरता बणाओआ ताकि लोक तिजी खे मन्दरो दे राखो। 14 लकड़िया दे नक्काशी करने वाल़ा देवदारा खे बाडोआ या बणो रे डाल़ा बीचा ते जातिया-जातिया रे बाँजो रे डाल़ चूणी की देख-भाल़ करोआ, से देवदारो रा एक डाल़ लगाओआ, जो बर्खा रे पाणिए साथे बढ़ोआ। 15 तेबे से माणूंआ रे बाल़ने रे कामे आओआ, से तिजी बीचा ते कुछ सुलगायी की तपाओआ, से तिजी खे बाल़ी की रोटी बणाओआ, तिजी साथे ई से देवता बणाई की तेस सामणे माथा टेकोआ, से मूर्ति बणाई की तिजी री आराधना करोआ। 16 से आदमी तिजी रा एक इस्सा तो से आगी दे बाल़ोआ ओर दूजे इस्से दे मास पकाई की खाओआ, से मास पूजी की खुश ओआ, तेबे सेकी की बोलोआ, "वा, आऊँ गर्म ऊईगा, मैं आग देखी राखी!" 17 ओर तिजी रे बचे रे इस्से खे लई की एक देवता, मतलब एक मूर्ति बणाओआ, तेबे से तिजी सामणे माथा टेकोआ ओर आराधना करोआ ओर तेसते प्रार्थना करी की बोलोआ, "माखे बचाई लो, कऊँकि तूँ मेरा देवता ए!"* 18 सेयो कुछ नि जाणदे, ना ई कोई समज राखदे; कऊँकि तिना रिया आखी एड़िया मिछी गी रिया कि सेयो देखी नि सकदे ओर तिना रा दमाक एड़ा कि सेयो कुछ समजी नि सकदे। 19 इना चीजा रे बारे दे ये लोक कोई त्यान नि देंदे ओर ना ई केसी खे इतणा ज्ञान या समज रंदी कि से बोली सको, "इजी रा एक इस्सा तो मैं फूकी ता ओर तिजी रे फेऊआ पाँदे रोटी बणाई ओर मास पूजी की खाई राखेया; तो क्या आऊँ इजी रे बचे रे इस्से खे बुरी चीज बणाऊँ? क्या आऊँ लक्कड़ो गे माथा टेकूँ?" 20 एड़ा मूर्ति बनाणे वाल़ा स्वा खाओआ, से सकेल़ी री बुद्धिया साथे पटकाई राखेया ओर से ना तो आपू खे बचाई सकदा ओर ना ये बोली सकदा, "क्या मेरे दाँणे आथो रे चूठ नि ए?"

21 यहोवे बोलेया, "ओ याकूब, ओ इस्राएल, इना गल्ला खे याद कर, तूँ मेरा दास ए, मैं तूँ बणाई राखेया; ओ इस्राएल, तूँ मेरा दास ए, मां तूँ नि पूलाणा। 22 मैं तेरे पाप काल़ी तूँईंयां जेड़े ओर तेरे पाप बादल़ो जेड़े मिटाईते रे; मेरी तरफा खे फेर वापस आओ, कऊँकि मैं तूँ छुड़ाई ला रा। 23 ओ सर्ग, जोरे की गा, कऊँकि यहोवे महान काम करी राखेया; ओ तरतिया री डूगी जगा, जयजयकार करो, ओ पाह्ड़ो, ओ बणो, ओ बणो रे सारे डाल़ो, गल़ा खोली की जोरे की गाओ! कऊँकि यहोवे याकूब छुड़ाई ला रा ओर इस्राएलो दे महान ऊणा।" 24 यहोवा, तेरा उद्धार करने वाल़ा, जो ताखे गर्भो ते ई बणांदा आई रा, ईंयाँ बोलोआ, "आऊँ यहोवा ई सबी खे बनाणे वाल़ा ए, जिने कल्ले ई सर्ग तणेया ओर तरती आपणी शक्तिया साथे फैलाई राखी। 25 आऊँ चूठे लोका रे बोले रे नशाणा खे बेकार करी देऊँआ ओर मरी री आत्मा साथे गल्ला करने वाल़ेया खे इस्साल करी देऊँआ; जो अक्लमंद माणूंए खे पीछे टाई देयोआ ओर तिना री अक्ला खे मूर्ख बणाई देयोआ।"* 26 ओर आपणे दासो रे वचना खे पूरा करूँआ ओर आपणे दूतो री योजना खे पूरा करूँआ, जो यरूशलेम शईरो रे बारे दे बोलोआ, "से फेर बसाई जाणी" ओर यहूदा रे शईरो रे बारे, सेयो फेर बणने ओर मां तिना रे खण्डहर सुदारने, 27 यहोवा डूग्गे पाणिए खे बोलोआ, "तूँ सूकी जा, मां तेरी नदिया सुकाई देणियां"* 28 आऊँ ई से माणूंआ जो फारसो रे राजा कुस्रूए रे बारे दे बोलोआ, "से मेरा ठराया रा ग्वाल़ा ए ओर तेस मेरी इच्छा पूरी करनी" यरूशलेम शईरो रे बारे दे बोलोआ, "से फेर बसणा ओर मन्दरो रे बारे दे कि तेरी निऊँ पड़नी।"*