1 ତି ଆଡିନ୍ନା ପ୍ରବୁନ୍‌ ଏର୍ନିର୍‌ସୋୟମନ୍‌, ସୋଡ଼ା ଆରି ବୋର୍ସା କଡ଼ିବନ୍‌ ବାତ୍ତେ ଅପ୍ପୁଡ୍‌ ଆଲଜିର୍ତେନ୍‌ ଆ ଜାଆଡ୍‌ ଲିବିଆତନ୍‌ଆଡଙ୍‌ ଆରି ଏଡେଡ୍‌ଉଡୁଡ୍‌ ଆଜିର୍ତେନ୍‌ ଆ ଜାଆଡ୍‌ ବିଲିଆତନନ୍‌ଆଡଙ୍‌ ପବ୍‌ରଡ୍‌ତେ; ଆରି ଆନିନ୍‌ ସମେଁୟ୍‌ଣ୍ଡ୍ରାଲୋଙନ୍‌ ଡକୋନ୍‌ ଆ ସୋଡ଼ା ଜାଆଡ୍‌ଆଡଙ୍‌ ରବ୍ବୁତେ ।

2 ତି ଆଡିନ୍ନା ଅବୟ୍‌ ମନଙ୍‌ ଦ୍ରାକ୍ୟା କୋତ୍ତାନ୍‌ ଡକୋ, ଆମ୍ୱେନ୍‌ ତି ଆସନ୍‌ କନନ୍‌ନାବା, 3 "ଞେନ୍‌ ସଦାପ୍ରବୁ ତି ଆତେ ଡୋବ୍‌ତାୟ୍‌; ଞେନ୍ ତି ଆତେ ଏଅଡ଼୍‌କୋ ଡିନନ୍ ରୁଡାତାୟ୍‌; ଆନ୍ନିଙ୍‌ ଏଙ୍ଗାଲେ କେନ୍‌ ଆତେ ଅଃନବ୍‌ମୋସ୍ସାଏ, ତିଆସନ୍‌ ଞେନ୍‌ ତମ୍ୱା ତଗଲ୍‌ ତିଆତେ ଡୋବ୍‌ତାୟ୍‌ । 4 ଅମଙ୍‌ଞେନ୍‌ ବନ୍‌ଡ୍ରାବନ୍‌ ଅବୟ୍‌ତଡ୍‌; ଅସମୟ୍‌ କାନ୍ତେସିନୁବନ୍‌ ଡ ଅବ୍ବାନୁବନ୍‌ ଅଡ଼୍‌କୋନ୍‌ ଅଲ୍‌ଜୁଜ୍ଜେଲୋଙନ୍‌ ଅମଙ୍‌ଗଡ୍‌ଞେନ୍‌ ଏନ୍ନେଲିଞ୍ଜିଡେନ୍‌! ଏତ୍ତେଲ୍‌ଡେନ୍‌ ଞେନ୍‌ ତି ଅଡ଼୍‌କୋନ୍‌ ଅବ୍‌ଗେଗେଲେ ତଗୋଲୋଙନ୍‌ ସୟ୍‌ଲେ ସେତାୟ୍‌ । 5 ଇଜ୍ଜାଡେନ୍‌ ଆନିଞ୍ଜି ରନପ୍ତିଞେନ୍‌ ଞମେତଜି; ଆନିଞ୍ଜି ଞେନ୍‌ ସରିନ୍‌ ସନବ୍‌ୟୁନ୍‌ ଏମ୍ମେଏତଜି, ଓଓ, ଆନିଞ୍ଜି ଞେନ୍‌ ସରିନ୍‌ ସନବ୍‌ୟୁନ୍‌ ଅମ୍ମେଏତଜି ।" 6 ତିକ୍କି ଆ ଓୟୋଙ୍‌ ଜାକୁବନ୍‌ ଆଜଡ୍‌ତନେ; ଇସ୍ରାଏଲନ୍‌ ଲେଡେଙ୍‌ତେ ଡ ତାର୍ବାତେ; ଆରି ଅଜଡାଲେ ଅଡ଼୍‌କୋ ପୁର୍ତିନ୍‌ ବରିୟ୍‌ତେ । 7 ଆ ତିତିଡ୍‌ମର୍‌ଆଡଙ୍‌ ଆନିନ୍‌ ଏଙ୍ଗାଲେ ତିଡେନ୍‌, ତି ଅନ୍ତମ୍‌ ଆନିନ୍‌ ଆନିନ୍‌ଆଡଙ୍‌ ତିଡେନ୍‌ ପଙ୍‌ ଅଡ଼େ, ଆନିନ୍‌ ବାତ୍ତେ ଆରବ୍ବୁମରଞ୍ଜି ଅନ୍ତମ୍‌ ଆନିନ୍‌ ରବ୍ବୁଏନ୍‌ ପଙ୍‌ । 8 ଆମନ୍‌ ଆନିନ୍‌ଆଡଙ୍‌ ଅରମ୍‌ଡୁଙେନ୍‌ ଆଡିଡ୍‌ ଅନୁର୍‌ ବରନ୍‌ ଆସନ୍‌ ଆନିନ୍‌ ସରିନ୍‌ ଏଗୋଡ଼େତନେ; ଆନିନ୍‌ ଡରୁଙ୍‌ୟୋଙ୍‌ଗଡ୍‌ ଆ ରିଙ୍ଗେନ୍‌ଆଜିର୍ରାତନ୍‌ ଆଡିଡ୍‌ ଆନିନ୍‌ଡମ୍‌ ଆ ସୋଡ଼ାରିଙନ୍‌ ବାତ୍ତେ ଆନିନ୍‌ଆଡଙ୍‌ ଅବ୍‌ଡେନେଏନ୍‌ । 9 ତିଆସନ୍‌ କେନ୍‌ ବାତ୍ତେ ଜାକୁବନ୍‌ ଡୋସା କେମାନ୍‌ ଡେତେ ଡ ଆନିନ୍‌ ଆ ଇର୍ସେନ୍‌ କେମାନ୍‌ ଆସନ୍‌ ଅଡ଼୍‌କୋନ୍‌ ଆ ଜଅ କେନ୍‌; ଅଙ୍ଗାଆଡିଡ୍‌ ଆନିନ୍‌ ତନମ୍ପିଲ୍‌ ଅରେଙନ୍‌ ଅଡ଼୍‌କୋନ୍‌ ପାତୁଅରନ୍‌ ଅନ୍ତମ୍‌ ଅବ୍‌ରଡ଼ିତେ, ଆସେରାନ୍‌ ଆକୁଣ୍ଡାୟ୍‌ ଡ ଓୟୋଙ୍‌ କୁଣ୍ଡାୟନ୍‌ ଅଡ଼୍‌କୋନ୍‌ ଆରି ଅସେଡ୍‌ତଜି । 10 ଇନିଆସନ୍‌ଗାମେଣ୍ତେନ୍‌ ରଡୋ କିନ୍ତାଲ୍‌ ଗଡ଼ାନ୍‌ ମନ୍‌ରାତଡନ୍‌ ଅନ୍ତମ୍‌ ଆରିଙ୍‌ରିଙ୍‌, ମନ୍‌ରାନ୍‌ ରିଙ୍‌ରିଙ୍‌ତେ ଡ ଆନୁମ୍‌ରେଙ୍‌ ଡରକୋନେନ୍‌ ଅନ୍ତମ୍‌ ଡେଏନ୍‌; ତି ଆ ଡରକୋନେଲୋଙ୍‌ ଆଅନ୍ତାଙନ୍‌ କୋର୍‌କୋର୍‌ଗାବ୍‌ଲନ୍‌ ଲୋଡ୍‌ତଜି, ଆରି ଅରାନୁବନ୍‌ ଆକେଣ୍ତାର୍‌ ଅଡ଼୍‌କୋନ୍‌ ଜୋମ୍‌ଲେ ସେତ୍ତେ । 11 ଆକେଣ୍ତାରନ୍‌ ଅଡ଼୍‌କୋନ୍‌ ଅସରେନ୍‌ଡେନ୍‌ ଅନଲ୍‌ଡୋବନ୍‌ ଡେତେ; ଆଇବଜଞ୍ଜି ଇୟ୍‌ଲେ ତେତ୍ତେ ତଗୋନ୍‌ ସୟ୍‌ତଜି; ଇନିଆସନ୍‌ଗାମେଣ୍ତେନ୍‌ ତି ଆମନ୍‌ରାଞ୍ଜି ବୁଡ୍ଡିଜିତଡ୍‌; ତିଆସନ୍‌ ଆନା ଆନିଞ୍ଜିଆଡଙ୍‌ ତୁବେନ୍‌, ଆନିନ୍‌ ଆନିଞ୍ଜିଆଡଙ୍‌ ଅଃସାୟୁମେଜି ଆରି ଆନା ଆନିଞ୍ଜିଆଡଙ୍‌ ତୁବେନ୍‌, ଆନିନ୍‌ ଆନିଞ୍ଜିଆଡଙ୍‌ ସନାୟୁମନ୍‌ ଅଃନବ୍‌ଗିୟ୍‌ତାଏ । 12 ତି ଆଡିନ୍ନା ପ୍ରବୁନ୍‌ ଆପ୍ରେତନ୍‌ ପରାତ୍‌ ଅଲନ୍‌ ସିଲଡ୍‌ ମିସର୍‌ ଡେସାନ୍‌ ଆଲ ଜାୟ୍‌ ଆଜନ୍‌ ତିଡ୍‌ରାତେ, ଆରି ଏ ଇସ୍ରାଏଲନ୍‌ ଆଅଞ୍ଜି, ଆମ୍ୱେଞ୍ଜି ତଙ୍‌ବୟ୍‌ ତଙ୍‌ବୟ୍‌ନେ ତନର୍ତୁମନ୍‌ ଡେତବେନ୍‌ । 13 ଆରି ତି ଆଡିନା, ଅବୟ୍‌ ସୋଡ଼ା ପନେଡନ୍‌ ପେଡ୍‌ତଜି ଆରି ଅସୁରନ୍‌ ଡ ମିସରଲୋଙନ୍‌ ଆବଣ୍ଡିମରଞ୍ଜି ଅଡ଼୍‌କୋନ୍‌ ଇସ୍ରଏଲ ଡେସାନ୍‌ ୟର୍ତନାଜି । ଆରି ଆନିଞ୍ଜି ଜିରୁସାଲମନ୍‌ ଆ ମଡ଼ିର୍‌ ବରୁବାନ୍‌ ପ୍ରବୁନ୍‌ଆଡଙ୍‌ ସେନ୍‌ପୁର୍‌ତଜି ।