1 A palo sa adava, o lafi e GOSPODESORO alo e Avramese ani vizija:

"Ma dara, Avrame,

me injum to štit.

Ti nagrada ka ovel but bari."

2 A o Avram phenđa: "GOSPODE, Devla, so ka de man? Nane man čhave, a sa akava so isi man ka ačhol mle slugase e Eliezerese oti Damask."

3 Hem pana phenđa: "Ače, na dinđan man potomstvo, pa mlo nasledniko ka ovel o robo kova bijando maje ano čher."

4 Tegani o GOSPOD phenđa: "Naka ovel ov to nasledniko, nego to čhavo, kova ka ikljol tutar, ov ka ovel to nasledniko."

5 Tegani ikalđa e Avrame avri hem phenđa lese: "Dikh upre ko nebo hem džen o čerenja, ako šaj te džene len. Edobor ka ovel to potomstvo."

6 O Avram poverujinđa e GOSPODESE, hem o GOSPOD uračuninđa lese adava ani pravednost.

7 O GOSPOD phenđa lese: "Me injum o GOSPOD, kova ikalđa tut taro Ur Haldejsko te dav tuće akaja phuv ano nasledstvo."

8 A o Avram phenđa: "GOSPODE, Devla, sar me ka džanav da ka nasledinav akaja phuv?"

9 O GOSPOD phenđa lese: "Ana maje guruvnja oto trin berš, buznja oto trin berš, ovno oto trin berš, jekha grlica hem jekhe terne golube."

10 O Avram anđa lese sa adava hem čhinđa len ko ekvaš, pa čhivđa len jekh premalo avereste. Samo e čirikljen na čhinđa. 11 Tegani o čiriklja save hana e mudarde životinjen lelje te napadinen o mas, a o Avram jurinđa len.

12 Kad lelja te raćol, e Avrame prelelja o zoralo sojba hem i bari strašno tomina ali upro leste.

13 Tegani o GOSPOD phenđa lese: "Šukar te džane da te potomci ka oven abanđije ki tuđo phuv. Ka oven robija hem zlostavime štaršel berš. 14 Ali me ka sudinav e narodose kase on ka robujinen, hem on palo adava adathar ka ikljoven bare barvalipnaja. 15 Tu ka živine but berša, ka pridružine tut te pradadenđe ano mir hem ka ove parume. 16 Tek palo štar generacije te potomci ka irinen pe akate, adalese so o greh e Amorejconengoro kola živinena ko akava than pana na pherđa pli mera sar te šaj kazninav len."

17 Kad lelja te raćol hem kad inele tomina, otojekhvar pojavinđa pe čaro e žaroja savo ćurini ine hem jagali baklja save nakhine maškaro čhinde kotora e životinjengere.

18 Adava dive o GOSPOD phandlja savez e Avrameja hem phenđa lese: "Te potomkonenđe dava akaja phuv, oti Egipatsko len sa đi ki bari len Eufrat – 19 i phuv e Kenejconengiri, e Kenižanengiri, e Kadmonconengiri, 20 e Hetitengiri, e Perižanengiri, e Refajconengiri, 21 e Amorejconengiri, e Hanaanconengiri, e Girgašanengiri hem e Jevusejconengiri."