18 Tegani o GOSPOD o Devel phenđa: "Nane šukar zako manuš te ovel korkoro. Ka ćerav lese pomoćnica koja ka priličini lese."
19 O GOSPOD o Devel oti phuv oblikujinđa sa e životinjen hem sa e čirikljen, pa anđa len anglo manuš, te dikhel save anava o manuš ka del len. Hem sar god o manuš vičinđa nesave dživde biće – ađahar ulo lesoro anav. 20 Ađahar o manuš dinđa anava sa e stokenđe, e čirikljenđe hem sa e divljone životinjenđe.
Ali zako Adam na arakhlja pe pomoćnica koja priličini lese. 21 Adalese o GOSPOD o Devel muklja zoralo sojba upro manuš. Kad o manuš zasuća, o Devel ikalđa lestar jekh rebro hem adava than pherđa maseja. 22 Oto rebro savo ikalđa e manušestar, o GOSPOD o Devel ćerđa e đuvlja hem anđa la anglo manuš.
23 A o manuš phenđa:
"Ače, napokon kokalo mle kokalendar
hem telo mle telostar!
Nek vičini pe ‘đuvli’,
adalese so lelja pe e manušestar."
24 Adalese o manuš ka ačhaj pe dade hem pe daja hem ka ovel jekh pe romnjaja, hem on duj ka oven jekh telo.
/images/a/WG5FS9VaSWVnVmV3VI8yP)
/images/a/Tcg2NiV7ce24OT6kCIQGR)