1 Palo nesavo vreme o Devel testirinđa e Avraame.

Vičinđa le: "Avraame!"

A o Avraam phenđa: "Akate injum."

2 O Devel phenđa: "Le te čhave e Isaake, te mangle čhave kole volineja, hem dža ki phuv Morija. Adari prinosin le sar žrtva paljenica ki jekh oti planina zaki savi me ka mothovav će."

3 O Avraam uštino rano sabale, čhivđa o sedlo upro her hem lelja peja duje slugen hem ple čhave e Isaake. Kad čhinđa kašta zaki žrtva paljenica, lelja te džal nakoro than savestar o Devel vaćerđa lese.

4 A ko trito dive o Avraam vazdinđa plo šero hem dikhlja adava than odural, 5 pa phenđa ple slugenđe: "Ačhoven akate uzalo her, a me hem o čhavoro ka dža adari te poklonina amen e Devlese, pa ka irina amen kora tumende."

6 O Avraam lelja o kašta zaki žrtva paljenica hem čhivđa len upro dumo e Isaakesoro, a ov lelja peja žaro zaki jag hem i čhurik, pa on duj lelje te džan zajedno.

7 O Isaak phenđa ple dadese e Avraamese: "Dade!"

A o Avraam phenđa: "Vaćer, mlo čhavo?"

O Isaak phenđa: "Ače, o žaro hem o kaštai akate, ali kaj o bakroro zaki žrtva paljenica?"

8 O Avraam phenđa: "O Devel korkoro ka pobrinini pe zako bakroro zaki žrtva paljenica, mlo čhavo."

Ađahar on duj nastavinde o drom.

9 Kad resle đi ko than savestar o Devel vaćerđa lese, o Avraam ćerđa žrtveniko hem upro leste složinđa o kašta. Onda phandlja ple čhave e Isaake hem čhivđa le ko žrtveniko upro kašta, 10 pa pružinđa plo vas hem lelja i čhurik te mudari ple čhave.

11 Ali o anđeo e GOSPODESORO vičinđa le taro nebo: "Avraame! Avraame!"

A o Avraam phenđa: "Akate injum."

12 O anđeo phenđa: "Ma vazde to vas upro čhavoro. Ništa ma te ćere lese! Akana džanav da daraja e Devlestar, adalese so na uskratinđan maje te čhave, te mangle čhave."

13 Tegani o Avraam vazdinđa plo šero, i eče, palo leste o ovno ple šingencar zaglavime ano grmo! Ov dželo, dolinđa le hem prinosinđa le sar žrtva paljenica umesto ple čhave. 14 O Avraam vičinđa adava than "O GOSPOD ka pobrinini pe." Adalese hem đi avdive phenela pe: "Ki planina kaj o GOSPOD ka pobrinini pe."

15 O anđeo e GOSPODESORO palo dujto puti vičinđa e Avraame taro nebo, 16 pa phenđa lese: "Hava sovli korkoro mancar – vaćeri o GOSPOD – adalese so ćerđan adava hem so na uskratinđan maje te čhave, te mangle čhave, 17 izobilno ka blagoslovinav tut hem ka umnožinav to potomstvo, pa ka ovel edobor but sar o čerenja ko nebo hem sar i pošik ki obala e moresiri. To potomstvo ka osvojini o dizja ple neprijateljengere 18 hem prekalo to potomstvo ka oven blagoslovime sa o narodija ki phuv adalese so injanle maje poslušno."

19 Tegani o Avraam ple čhaveja irinđa pe koro ple sluge, pa sare zajedno lelje te džan nakori Beer Ševa. I o Avraam ačhilo te živini ani Beer Ševa.

20 Palo nesavo vreme, e Avraamese phende da i Milka bijanđa čhaven lesere phralese e Nahorese: 21 o najphureder inele o Uc, lesere phralja o Buz, o Kemuel, o dad e Aramesoro, 22 o Kesed, o Haz, o Pildaš, o Jidlaf hem o Betuel. 23 O Betuel inele e Revekakoro dad. Akale oftone čhaven i Milka bijanđa e Avraamesere phralese e Nahorese. 24 A e Nahoresiri romni ropkinja, koja vičinđa pe Reuma, bijanđa lese čhaven: e Tevahe, e Gahame, e Tahaše hem e Maahe.