Gênesis 6

O manuša ule bišukar

1 Sar o manuša lelje te množinen pe hem te širinen pe ki phuv, bijandile lenđe čhaja. 2 O čhave e Devlesere dikhle dai o čhaja e manušengere šuže, pa lelje len romnjenđe, kas god mangle.

3 Tegani o GOSPOD phenđa: "Mlo duho, kova dela dživdipe, naka ačhol zauvek ano manuš, adalese soi o manuš telesno. Adalese, o manuš naka živini više oto šelu biš berš."

4 Ano adava vreme, a hem kasnije, ki phuv živinde o Nefilimija,*6,4 Nefilimija Akava lafi zvučini sar o jevrejsko vaćeriba zako: "okola kola pele". adalese so o čhave e Devlesere suće e manušengere čhajencar hem on bijande lenđe čhaven. On inele ratnici, prešunde manuša pana taro purano vreme.

5 O GOSPOD dikhlja kobori baro e manušesoro bišukaripe ki phuv hem dai o mislija lesere vilesere stalno irime samo nakoro bišukaripe. 6 O GOSPOD pokajinđa pe so stvorinđa e manušen ki phuv hem ano lesoro vilo inele bari dukh.

7 Adalese o GOSPOD phenđa: "Ka uništinav ki phuv e manušen kolen stvorinđum, zajedno e životinjencar hem okolencar so lazinena phuvjaja hem e čirikljencar savei ko nebo, adalese so pokajinđum man so stvorinđum len."

8 Ali o Noje arakhlja milost anglo GOSPOD.

O Noje hem i priprema zako potop

9 Akavai o zapis oto Noje:

O Noje inele pravedno manuš, bizi mana maškaro manuša kola živinde lese ano vreme, hem ćerđa okova soi pali e Devlesiri volja.