Isaías 66

परमेशरो जातिया-जातिया रा न्याय करना

1 यहोवा ईंयाँ बोलोआ, "सर्ग मेरा सिंहासन ओर तरती मेरे पैरा री चौकी ए; तुसा माखे केड़ा मईल बनाणा ओर मेरे रामो री जगा कुणजी ऊणी?*66:1 प्रेरि. 7:48-50, मत्ती 5:34,35 2 यहोवे री ये बाणी ए, कि यो सारी चीजा मेरे ई आथो रिया बणाई रिया ए, ईंयाँ ये सब ऊआ। पर मां तेसरी तरफा खे ई नजर करनी जो शरीफ ओर दु:खी मनो रा ओ ओर मेरा वचन सुणी की डरोआ।*66:2 पज. 34:18, मत्ती 5:3 3 बल़दो खे बलि करने वाल़ा, माणूंए खे काणे जेड़ा ए; जो पेडा खे चढ़ाणे वाल़ा ए, से तेस जेड़ा ए जो कुत्ते रा गल़ा बाडोआ; जो नज्जो री बलि चढ़ाओआ, से मानो सूंअरा रा खून चढ़ाणे वाल़े जेड़ा ए ओर जो लोबान बाल़ोआ, से तेस जेड़ा ए जो मूर्तिया खे तन्य बोलोआ। इने सबी आपणी-आपणी बाट टोल़ी दी ए ओर तिना रे मन घिनौनी चीजा साथे खुश ओए। 4 इजी री खातर मां बी तिना खे सजा रिया गल्ला काडणिया ओर जिना गल्ला ते सेयो डरोए सेयो ई मां तिना पाँदे ल्याऊणिया; कऊँकि जेबे मैं सेयो बुलाए, तेबे किने नि ज्वाब नि दित्तेया; ओर जेबे मैं तिना साथे गल्ला कित्तिया, तेबे तिने मेरी नि सुणी; पर जो मेरी नजरा दे बुरा था, सेयो तेड़ा ई करदे रये ओर जो माखे बुरा लगो था, सेई तिने अपनाया।" 5 तुसे लोक जो यहोवे रा वचन सुणी की डरोए, यहोवे रा वचन सुणो: "तुसा रे जाति पाई जो तुसा साथे दुश्मणी राखोए ओर मेरे नाओं रिया बजा ते तुसा खे लग करी देओए तिने बोलेया, यहोवे री इज्जत तो बढ़ो, जेते कि आसे तुसा री खुशी देखी सकूँ; पर तिना खे ई शर्मिंदा ऊणा पड़ना।"*66:5 2 थिस्स. 1:12

सजा ओर नऊई जाति

6 सुणो, यरूशलेम शईरो ते आल्ला सुणना, मन्दरो ते ए आवाज सुणने लगी री! ये यहोवे री आवाज ए, से आपणे दुश्मणा खे तिना री करनिया रा फल़ देणे लगी रा!*66:6 प्रका. 16:1,17 7 मेरा पवित्र शईर तेसा जवाणसा जेड़ा ए जो जम्मणे री पीड़ा लगणे ते पईले ई बच्चे खे जन्म देई देओई; तेसा खे पीड़ा लगणे ते पईले ई तेसे पाऊए खे जन्म दित्तेया।*66:7 प्रका. 12:2,5 8 एड़ी गल्ल किने बी कदी सुणी? किने कदी एड़ी गल्ल देखी? क्या कोई देश एक ई दिनो दे पैदा ऊई सकोआ? क्या एक जाति दूई कड़िया रेई पैदा ऊई सकोई? कऊँकि सिय्योनो री पीड़ा शुरू ऊई थी कि तिना ते ल्वाद पैदा ऊई गी। 9 यहोवा पूछोआ, "क्या मां से जमाणे रे बखतो तक लई जाई की नि जमाणा?" तेरा परमेशर पूछोआ, "आऊँ जो गर्भ देऊँआ, तो क्या आऊँ कोख बन्द करुँ?" 10 भविष्यबक्ता लोका ते बोलोआ, "ओ यरूशलेम शईरो रे लोका साथे सब प्यार राखणे वाल़ेयो, तिना साथे खुशी मनाओ ओर तिना रिया बजा ते मगन ओ; ओ तिना रे बारे दे सब दु:ख करने वाल़ेयो, तिना साथे खुश ओ!" 11 जेतेते तू तेसा रा दूद शान्तिया साथे पी-पी की सन्तुष्ट ओआ; ओर दूद पी कि तेसारी महिमा साथे बऊत ज्यादा सुखी ओ। 12 कऊँकि यहोवा ईंयाँ बोलोआ, "देखो, मां तिना री वैभवो री नदिया जेड़ी ओर जातिया-जातिया रा तअन नदिया री बाढ़ी जेड़ा बाह्यी देणा ओर तुसा तेते ते पीणा, जिंयाँ माये आपणे बच्चे खे सम्बाल़ोई, तिंयाँ ई मां बी यरूशलेम शईरो रे लोक सम्बाल़ने। 13 जिंयाँ माये आपणे बच्चे खे शान्ति देयो ई, तिंयाँ ई मां बी तुसा खे शान्ति देणी; तुसा खे यरूशलेम शईरो रेई शान्ति मिलणी। 14 तुसा ये देखणा ओर खुश ऊणे, तुसा रिया आड्डिया काओ जेड़िया अरिया ऊणिया ओर यहोवे रा आथ तेसरे दासा खे प्रगट ऊणा ओर तेसरे दुश्मणा पाँदे तेसरा रोष पड़कणा।*66:14 यूह. 16:22 15 कऊँकि देखो, यहोवा आगी साथे आऊणा ओर तेसरे रथ तूफानो जेड़े ऊणे, जेते कि से आपणे रोषो खे जल़नी साथे ओर आपणी चतौणिया खे आगी री लूपिया साथे प्रगट करो।"*66:15 2 थिस्स. 1:8 16 कऊँकि यहोवे सबी रा न्याय आगी साथे ओर आपणियां तलवारी साथे करना ओर यहोवे रे मारे दे बऊत ऊणे। 17 यहोवा बोलोआ, "जो लोक मूर्तिया री पूजा करने खे आपू खे पवित्र ओर शुद्ध करोए कि बगीचे रे जाओ ओर केसी पीछे खड़े ऊई की सूंअर या चूए रा मास ओर बाकी घिनौनी खाणे रिया चीजा खाओए, सेयो लोक कट्ठे ई नाश ऊणे, यहोवे री येई बाणी ए।" 18 कऊँकि आऊँ देशा रे लोका रे काम ओर तिना री योजना दुँईं खे ठीक टंगो दे जाणूंआ ओर से बखत आऊणा जेबे मां सब जातिया ओर लग-लग पाषा बोलणे वाल़े कट्ठे करने ओर तिना आई की मेरी महिमा देखणी। 19 मां तिना लोका बीचे एक नशाण प्रगट करना; ओर तिना रे बचे रे लोक मां तिना जातिया गे पेजणे जिने ना तो मेरा सन्देश सुणेया ओर ना मेरी महानता देखी राखी, मतलब तर्शीशिया गे ओर धनुष चलाणे वाल़े पूलिया, लूदिया, तूबली, यूनानी ओर दूर द्धीपो रे रणे वाल़ेया गे बी पेजणे ओर तिना जातिया-जातिया बीचे मेरी महिमा रे बारे दे बताणा। 20 जिंयाँ इस्राएली लोक नज्जो री बलिया खे साफ पांडे रे राखी की यहोवे रे मन्दरो रे ल्याओए, तिंयाँ ई तिना तुसा रे सब इस्राएली साथी, कोड़े, रथ, पालकी, खच्चर ओर साँड़णिया पाँदे चढ़ाई-चढ़ाई की मेरे पवित्र पाह्ड़ यरूशलेम शईरो पाँदे यहोवे री पेंटा खे ल्याऊणे, यहोवे रा येई वचन ए। 21 ओर तिना बीचा ते कुछ लेवी ओर पुरोईता रे पदो खे बी चूणी लणे, यहोवे री येई बाणी ए।

नवां सर्ग ओर नवीं तरती

22 कऊँकि जिंयाँ नवां सर्ग ओर नवीं तरती जेतेखे आऊँ बनाणे वाल़ा ए, मां सामणे बणी री रणी, तिंयाँ ई तुसा रा कुल ओर तुसा रा नाओं बी बणेया रा रणा; यहोवे री येई बाणी ए।*66:22 2 पत. 3:13, प्रका. 21: 1 23 तेबे एड़ा ऊणा कि हर नवें चाँदो रे त्योआरो रे दिने, ओर हर रामो रे दिने, हर देशो रे लोका यरूशलेमो दे मेरी पूजा करनी; यहोवे रा येई वचन ए। 24 तेबे मेरे लोक यरूशलेमो ते बारे निकल़ी जाणे तिना बगावत करने वाल़ेया लोका रिया लाशा पाँदे नजर करनी, कऊँकि तिना बीचे पड़े रे कीड़े कदी बी खत्म नि ऊणे, तिना री आग कदी नि बिजणी ओर सारे माणूंआ खे तिना ते बऊत नफरत ऊणी।*66:24 मर. 9:48