यशायाह 55

परमेशरो री दया सबी माणूंआ खे

1 यहोवा आपणे लोका खे बोलोआ, "ओ सारे त्याये लोको, पाणिए गे आओ ओर जिना गे पैसा नि ओ, तुसे बी आई की खाणा खरीदो ओर खाओ! शराब ओर दूद बिना पैसे ओर बिना दाम देई की आई की लई लो।*55:1 यूह. 7:37, प्रका. 21:6, प्रका. 22:17 2 जो खाणे रिया चीजा नि ए, तिजी खे तुसे कऊँ पैसा लगाओए ओर जेते कि पेट नि परदा तेतेखे कऊँ मईणत करोए, मेरी तरफा खे त्यान लगाई की सुणो, तेबे खरी चीजा खाई सकोए ओर तल़ी रिया चीजा खाई की सन्तुष्ट ऊई जाणे।" 3 ओ मेरे लोको, "जो कुछ आऊँ बोलूँआ त्यानो साथे सुणो ओर मांगे आओ, तेबे तुसे जिऊँदे रणे ओर मां तुसा साथे सदा री वाचा बानणी, मतलब दाऊदो पाँदली अटल़ करूणा री वाचा।*55:3 पज. 89:28, नसी. 4:20, प्रेरि. 13:34 4 सुणो, मैं दाऊद राज्य-राज्य रे लोका खे गवाह्, ओर परदान ओर आज्ञा देणे वाल़ा ठराई राखेया।*55:4 इब्रा. 2:10, इब्रा. 5:9, प्रका. 1:5 5 सुण, तां एड़ी जाति जेसा खे तूँ नि जाणदा बुलाणी ओर एड़ी जातिया जो ताखे नि जाणदिया तांगे दौड़ी की आऊणियां, तिना तेरे परमेशर यहोवा ओर इस्राएलो रे पवित्र परमेशरो रिया खातर ये करना, कऊँकि तिने तूँ इज्जतदार करी राखेया।" 6 जदुओ तक यहोवा मिली सकोआ, तदुओ तक तेसरी टोल़ा रे रओ, जदुओ तक से तेरे नेड़े ए, तदुओ तक तेसखे आका पाओ;*55:6 प्रेरि. 17:27