1 Kunnise Duuchchi Woddike Goottixxi anga anjirate haru’mitabaan

mansha isixinna gophphabaan.

2 Yaane kinni balleessa ha’nooxxi

Mageno ha’nookenaa’n ha’noo foote’een;

cubbo ha’nooxxi alba isika ha’noonaa’n shoxxe’een;

Tennexxee isi laqabaan.

3 Anguwwa ha’nooxxi mundeti munde

qubbuwwa ha’nooxxinna balleessati balleessate kadde’een;

Afo’i ha’nook dhara haaso’edheen;

arabi ha’nookinna fuggoxxa yaane laqiseen.

4 Dhugaati ye’a’neek ayyinna hedhebaan

yaada ifika qajeelummati shiqisha’neek hedhebaan;

Insa’ne woyi fuldabaaxxe yaane addante; dharakanna haasonne;

rakko siila’wineexxi fuggotanna ille.

5 Bofiinke quuphe’n kabbine;

magenjooletika haadanna sunqe;

Konnechchuwwika quuphphuwwanna itaakiir reyaa;

quuphphikinna enqemeexxa yanna dhudhdhuufi fulaa.

6 Haadi magenjooletikinna seemmatee kadabaan

hujjaaxxe yaanuwwanna biso ifika buqecca dandetabaan;

Huje insa’neexxi fuggoxxe;

anga insa’neexxinna xaqarotixxi huje wo’mite’een.

7 Lekka insa’neexxinna cubbotiba’a gongita;

balleessa beloxxa mundenna dunatee wiinandaan;

Insa’ne hendaak fuggoke yaada;

balleessatanna diiga insa’neek orike beesisaken.

8 Nage’inka ora egennebaan;

ora insa’neeke’n dhugaa assa hexxebaan;

Ora ifika midaamiddichchake assine’een;

ookkonna me’aak nage’a afebaan.✝59:8 Rom. 3:15-17.

9 Tennexxee dhugaa assa no’onaa’n bayyate;

qullummatinna no’obaa daggabaan

Ifa halsinenne, yaane kinni dukkana calla kadde;

wa’a hiyyeeka ifa halsinennen, me’inaanne kinni dimma dukkana’nite.

10 Dalla’ake’n balla’iinsha ganemmenne;

me’inji no’okinna ille affammabaakishsha qaqqaphphate kadde;

Bogi siphphi siphphi hiyyammaa wodda kaddammashsha barra saafo’a timmi timmi hinenne;

jajjabbuwwi giddo rensha manna kandenne.

11 No’o duuchchiingi dibi hiyyemaake biniichishsha hamuummantenne;

guugenjotishshanna yuu hina’n oo’nenne;

dhugaa assa halsine; yaane kinni anfebo’no;;

anjirensha hansenne yaane kinni no’onaa’n bayyate.

12 Balleessa no’oxxi ati edo birasaxxe’een;

cubbo no’oxxinna no’on dhugaa kulde’een;

Balleessa no’oxxi no’onaa’n gargar higgebaan

qarumma no’oxxanna egenneenne.

13 Duuchchi Woddike Gootta’n jalline’enne; dhara haasonnenne;

Mageno no’oka hordofatenaa’n ille iima hingenne;

Xaqaronna seeri beloxxa assa haasonnenne;

qalbe no’oxxi siila’witeeka dhara haasonnenne.

14 Tennexxee dhugaa assa no’onaa’n bayyate;

qullummatinna bayya urrite;

Dhugaa orake’n guggufateen;

qajeelummatinna e’ya dandeettebaan.

15 Dhugaa habanna afendabaan

fuggoxxenaa’n bayyataak wele manni’a gacifachchotike kadaan.

Duuchchi Woddik Gootti uude;

dhugaa assanna hedha gophphemmaxxee yaade.

16 Ayyinna hedhebaaxxa afe;

isiba’a gurura’aak hedha gophemaxxee mancira hiyye;

Tennexxe ifixxi hirre isi’a anjira iyyedagge;

qullumma ifixxinna isoo kiphphe abidde.✝59:16 Isa. 63:5. 17 Qullumma seemmuffa oddo’we;

anjiratixxa gullenna umo ifike’n uggudhdhe;

halo fulatixxa seemmanna oddo’we;

hana lebende oddo’wendammaxxe seemmashsha hinaafe hana lephphe oddo’we.✝59:17 Efe. 6:14, 17; 1 Tes. 5:8.

18 Insa’neexxe hujexxe qixxe’n

ifixxa aare ifike diinuwwa’n

Ifixxa halo fulanna fike naaphuwwa’n iittanni hira insa’ne’a uwwaan;

giddichchuwwateenna insa’neexxe anga’ninxe hujeshanni uwwaan.

19 Dhidhimake’n hedheekiir Duuchchi Wooddike Goottika summa sodaata

arishsho fuldamma darre’n hedheekiir ulfinna isike hirema;

Duuchchi Woddike Goottik hafuuri kofeme’e

wo’meeke lola’ishsha dagaan.

20 «Anjiralli Tsiyooniba’a

cubbo ifixxa aadde aageeke Ya’iqoobike ardiba’a dagaan»

Hiyya’neen Duuchchi Woddik Gootti.✝59:20 Rom. 11:26.

21 Duuchchi Woddiki Gootti hiyya’nee qici, «Insa’ne’a aagennexxi kako; ta’anaa’n duuchchiin woddi’a ha’no’ni hedheeki anki Hafuuri afo’o ha’nooke’n uggeenneki anki hiyyichchi ha’nooke afo’onaa’n oose ha’nooxxike afo’uwwinaa’ninna ha’nooxxe oosexxe oose afo’uwwinaa’n ta’anaa’n duuchchin woddi’a iboqqe hiyya’neen Duuchchi Woddiki Gootti» hiyye.