1 ये कताब आमोसो रे पाऊ यशायाह रे दर्शणो रे बारे दे बताओई। यहूदा और यरूशलेम शईरो रे जो कुछ ऊणे वाल़ा था, तेतेरे बारे दे परमेशरे यशायाह खे दखाया था। यशायाहे यो गल्ला तेबे देखिया थिया जेबे उज्जियाह, योताम, आहाज ओर हिजकिय्याह यहूदा प्रदेशो पाँदे राज करो थे।

2 ओ स्वर्ग सुण, ओर ओ तरती त्यान लगाई की सुण, कऊँकि परमेशर बोलोआ, "मैं बाल-बच्चेया रा पालण-पोषण कित्तेया ओर से बढ़ाए बी, पर तिने मा साथे बगावत कित्ती। 3 बल़द तो आपणे मालको खे ओर गह्दा आपणे मालको रिया गवाईणी खे पछयाणोआ, पर इस्राएल माखे नि जाणदा, मेरी प्रजा सोच-बचार नि करदी।" 4 हाय, ये जाति पापो साथे केड़ी परी री! ये समाज बुरे कामो साथे केड़ा लादी रा! एस कुलो रे लोक केड़े कुकर्मी ए, यो बाल-बच्चे केड़े बिगड़े रे ए! इने यहोवा छाडीता रा, इने इस्राएलो रा पवित्र परमेशर तुच्छ जाणी राखेया! यो पराये बणी की दूर ऊईगे रे। 5 तुसे बगावत करी-करी की जादा मार कऊँ खाणा चाओए? तुसा रा सिर जख्मा साथे परी गा ओर तुसा रा मन दु:खो साथे परी रा। 6 सिरो ते लई की पैरो तक कोई बमारी नि ए, बस बूड़ने रे ओर कोड़े री मारा रे नशाण ओर सड़े रे जख्म ए, जो ना दबाए, ना बाने और ना जैतूनो रा तेल लगाई की नरम कित्ते। 7 तुसा रे यहूदा प्रदेशो री जमीन उजाड़ पड़ी री, तुसा रे शईर फूखी गे रे, तुसा रे डोरूआ खे परदेशी तुसा सामणे ई निगल़ने लगी रे, से परदेशिया ते नाश कित्ते रे देशो जेड़ा उजाड़ ए। 8 ओर सिय्योनो री बेटी अंगूरा रे बगीचे री चूँगड़िया जेड़ी छाडी ती री, या काकड़िया रे डोरूआ री चूँगड़ी या केरे रे शईरो जेड़ी कल्ली खड़ी री। 9 जे सेना रा यहोवा म्हारे थोड़े जे लोका खे बचायी की नि राखदा, तो आसे सदोम ओर गमोरा* जेड़े खत्म ऊई जाणे थे।* 10 ओ सदोम शईरो रे न्यायियो, परमेशरो रा वचन सुणो! ओ गमोरा री प्रजा, म्हारे परमेशरो री शिक्षा पाँदे त्यान देयो। 11 परमेशर बोलोआ, "तुसा रे बऊत सारे मेलबलि मेरे किजी कामो रे ए?" आऊँ तो खाडूआ री होमबलिया ते ओर पाल़े रे डांगरा री चर्बिया ते परेशान ऊईगा रा, आऊँ बाच्छूआ ते, पेडा रे बच्चे या बाकरेया रे खूनो ते खुश नि ऊँदा। 12 तुसे जेबे आपणे मूँ माखे दखाणे खे आओए, तेबे ये कुण चाओआ कि तुसे मेरे आँगणो खे पैरा साथे केसो? 13 बेकारो दे नज्जो री बलि दुबारा नि ल्याओ, माखे तूपो ते नफरत ई। नये चाँद ओर रामो रा दिन मानणा ओर सभा रा प्रचार करना, ये माखे बुरा लगोआ। बड़ी सभा साथे-साथे अनर्थ काम करना आऊँ सयीन नि करी सकदा। 14 तुसा रे नये चाँद और ठराए रे त्योआर मानणे ते आऊँ जिऊए ते बैर राखूँआ, सेयो सब माखे बोज जे लगोए, आऊँ तिना खे सयीन करदा-करदा थकी गा रा। 15 जेबे तुसे मेरी तरफा खे प्रार्थना करने खे आथ फैलाओ, तेबे मां तुसा ते मूँ फेरी लणा, तुसे चाए कितणी बी प्रार्थना करो, तेबे बी मां तुसा री नि सुणनी, कऊँकि तुसा रे आथ बेकसूर माणूंए रे खूने की रंगी रे जो तुसा रे जरीये मरी रा।* 16 आपू खे तोई की पवित्र करो, मेरिया आखी रे सामणे ते आपणे बुरे काम दूर करो, आगो खे बुराई करना छाडी दो,* 17 पलाई करना सीखो, अच्छाईया साथे न्याय करो, उपद्रविये खे सुदारो, अनाथो खे न्याय दलाओ, बिदुआ रा साथ देयो। 18 परमेशर बोलोआ, "आओ, आसे आपू बीचे बईस करूँए, तुसा रे पाप चाए लाल रंगो रे ओ, तेबे बी सेयो बर्फा जेड़े सफेद ऊई जाणे ओर चाए सेयो गूड़े लाल रंगो रे ओ, तेबे बी सेयो ऊना जेड़े सफेद ऊई जाणे। 19 जे तुसे आज्ञाकारी ऊई की मेरी मानो, 20 तो तुसा एस देशो रिया अच्छे ते अच्छिया चीजा जो जमीन पैदा करोई खाणिया ओर जे तुसे मानोगे नि ओर बगावत करोगे, तो तुसे तलवारी साथे मरने, परमेशरो रा येई वचन ए।"

21 जो यरूशलेम शईर विश्वासो जोगा था से केड़ा व्याभिचारी ऊई गा रा! तिदे न्याय ओ था ओर तिदे तर्म ओ था, पर एबे तिदे अत्यारे ई रओए। 22 तेरा चाँदी कूड़े जेड़ा ऊईगा रा, तेरे अंगूरा रा रस पाणी ऊईगा रा। 23 तेबे परदान टीठ ओर चोरा साथे मिले दे ए। सेयो सारे के सारे रिश्वत खाणे वाल़े ओर पेंटा रे लाल़ची ए। सेयो अनाथा रा न्याय नि करदे ओर ना बिदुआ रा मुकद्दमा लणा पसन्द करोए। 24 इजी बजा ते प्रभु सेना रे परमेशर, इस्राएलो रे शक्तिमानो री ये बाणी ए, "सुणो, मां आपणे दुश्मण दूर करी की शान्ति पाणी ओर आपणे बैरिया ते बदला लणा। 25 मां तुसा पाँदे आथ बढ़ाई की तुसा री धातुआ रा मैल पूरी तरअ ते फूकी देणा ओर तुसा री अशुद्धता पूरी तरअ ते दूर करी देणी। 26 मां तुसा बीचे पईलके जेड़े न्यायी ओर पुराणे बखतो जेड़े मंत्री फेर राखणे। तिजी ते बाद ताखे तर्मो रा ओर विश्वासो जोगा शईर बोलेया जाणा।" 27 सिय्योन न्याय रे जरीये ओर जो तिदे फिरने सेयो तर्मो रे जरीये छुड़ाई लणे। 28 पर बगावत करने वाल़ेया रा ओर पापिया रा कट्ठे नाश ऊणा ओर जिने परमेशर यहोवा छाडी राखेया, तिना रा अन्त ऊई जाणा। 29 कऊँकि जिना पवित्र बाँजा रे डाल़ा री आराधना करने ते तुसे खुश ओए, तीजी खे करने ते तुसे शर्मिंदा ऊणे ओर जिना पवित्र बगीचेया दे तुसे मूर्तिया री पूजा करोए, तिना री बजा ते तुसा रे मूँ काल़े ऊणे। 30 कऊँकि तुसे बाँजो रे डाल़ो रे मुरझाए रे पत्ते ओर बिना पाणिए रे बगीचे जेड़े ऊई जाणे। 31 तुसारे तागतबर परदान सूकिया लकड़िया रे छोटे-छोटे टुकड़ेया जेड़े ऊई जाणे ओर तिना लोका काम करना, सेयो एड़े चिलुआ जेड़े ऊणे जिना ते आग लगी जाओई। सेयो तागतबर लोक ओर तिना रे काम बल़ने लगणे ओर कोई बी माणूं एड़ा नि ऊणा जो तेसा आगी खे रोकी सको।