1 ଆୟା ନାଣ୍ତିଙ୍ଗ୍‌ ମିର୍‌ ଇନିଦେର୍‌, "ଏ ସଦାପ୍ରବୁ, ନାନ୍‌ ନି ଦନ୍ୟବାଦ୍‌ କିନା; ଇରିଙ୍ଗ୍‌ ନିନ୍‌ ମା ଉଣ୍ତିଙ୍ଗ୍‌ ରିସାଦାନ୍‌ ମାର୍ହି, ନି ରିସା ସାନ୍ତି ଆତାମାନାତ୍‌ ମାରି ନିନ୍‌ ମାଙ୍ଗିଁ ସାନ୍ତି ସିତିମାନି । 2 ସୁଡ଼ୁଆ, ମାପୁରୁ ମା ରକିୟା କିନିକାନ୍‌; ମାଡ୍‌ ବିସ୍‌ବାସ୍‌ କିନାଟ୍‌ ମାରି ତିଲାଏଟ୍; ଇରିଙ୍ଗ୍‌ ଜିହୋବା ସଦାପ୍ରବୁ ମା ସାକ୍ତି ମାରି ବୁଦି; ମାରି, ୱାନ୍‌ ମାଙ୍ଗିଁ ମୁକୁଡ଼ା କିତାମାନାନ୍‌ ।" 3 ଇୟାଉଣ୍ଡିଙ୍ଗ୍‌ ମିର୍‌ ୱେଡ଼ିକାଦି ରକିୟାକିନି କୁଇକାଲ୍‌ଦାନ୍‌ ଏରୁ ରେନିଦେର୍‌ ।

4 ମାରି, ଆୟା ନାଣ୍ତିଙ୍ଗ୍‌ ମିର୍‌ ଇନିଦେର୍‌, "ସଦାପ୍ରବୁଦି ଦନ୍ୟବାଦ୍‌ କିଦୁ, ୱାନି ଦର୍‌ତାନ୍‌ ପାର୍‌ତନା କିଦୁ, କୁଟୁମ୍‌ଦି ଲୋଇରାନ୍ ୱାନି କିତି ପାଣି ୱିଜୁ ପ୍ରଚାର୍‌ କିଦୁ, ୱାନି ଦରୁ ୱିଙ୍ଗିଁତ୍‌ ଇଜି ୱେର୍‌ତୁ । 5 ସଦାପ୍ରବୁଦି ଉଦେସ୍‌ଦାନ୍‌ ପାଟା ପାର୍‍ଦୁ; ମାତର୍‌ ୱାନ୍‌ ମହିମାଦି ପାଣି କିତାମାନାନ୍‌; ଆକା ୱିଜୁ ଦୁନିଆ ନେସ୍‌ତି । 6 ଏ ସିୟୋନଦି ଲୋକୁ, ମିର୍‌ ନାଣ୍ତ ଆଉଲି ଆଜି ୱେଡ଼ିକାଦାନ୍‌ ୱେଡ଼ିକା କିଦୁ; ଇରିଙ୍ଗ୍‌ ଏନ୍‌ ଇସ୍ରାଏଲଦି ଦାର୍ମୁଦିୱାଜା, ୱାନ୍‌ ମି ଲୋଇ ପେରିକାନ୍‌ ଆନାନ୍‌ ।"