ପ୍ରବୁଦି ବାଦ୍ଲୁଅନି ଦିନ୍
1 ଇଦମଦାନ୍ ରଙ୍ଗ୍ତି ଆଙ୍ଗିଁସକା ଆରାଜି ବସ୍ରାଦାନ୍ ଇକାନ୍ ଜେ ୱାଜିନାନ୍, ୱାନ୍ ଏନ୍ ? ନିଜେଦି ଆରାତିମାନି ଆଙ୍ଗିଁଦାନ୍ ଗୌରବ୍ ମାରି ନିଜେଦି ସାକ୍ତିଦାନ୍ ୱାଜିନାନ୍ ଜେ ୱାନ୍ ଏନ୍ ? ନାନ୍ ଜେ ଦାର୍ମୁଦିକାନ୍ ମାରି ରକିୟା କିଦେଙ୍ଗ୍ ଆଟ୍ନା ।
2 ନିନୁ ଆରାତି ମାନି ଆଙ୍ଗିଁ ଏରାନିକା ମାରି ଗୁଟାଦୁ ଅଙ୍ଗୁର୍ ମାଟ୍ନି ଲୋକା ଆଙ୍ଗିଁ ୱାଜା ଏନ୍ଦା ?
3 ନାନୁ ଅରେନ୍ ଅଙ୍ଗୁର୍ରସ୍ କିଜିନା ମାରି ଲୋକା ଲୋଇରାନ୍ ମା ୱାଲେ ଏନ୍ ସିଲେଣ୍ଡା ମାର୍ହାର୍; ମାପୁ ନିଜେଦି ରିସାଦାନ୍ ୱାରିଙ୍ଗ୍ ମାଟ୍ତା ମାରି ନିଜେଦି ରିସାଦାନ୍ ୱାରିଙ୍ଗ୍ ପିରିତାପ୍; ଆଦେଙ୍ଗ୍ ୱାରି ନେତେର୍ କାଣ୍ଡେକ୍ ମା ଆଙ୍ଗିଁଦୁ ତୁଲିତାତ୍ ମାରି ମା ନିଜେଦି ଆରାତି ଆଙ୍ଗିଁ ୱିଜୁ ଦାଗ୍ କିତାମାନା । 4 ଇରିଙ୍ଗ୍ ବାଦ୍ଲୁ ଅନି ଦିନ୍ ମା ଜିବନ୍ତୁ ମାର୍ହାତ୍ ମାରି ମା ମୁକୁଡ଼ାତି ଲୋକା ବାର୍ସେକ୍ ଇଗା ୱାତାତ୍ । 5 ମାରି, ନାନ୍ ସୁଡ଼ୁତା, ମାରି ସାହାଜ୍ୟ କିଦେଙ୍ଗ୍ ଏନ୍ବା ସିଲେନ୍ ମାରି ସାକା ଆଦେଙ୍ଗ୍ ଏନ୍ବା ସିଲେତିଙ୍ଗ୍ ନାନ୍ କାବା ଆତା; ଇୟା ଉଣ୍ତିଙ୍ଗ୍ ନା ନିଜେ କିୟୁ ନା ଲାକ୍ତୁ ରକିୟା ତାତାତ୍ ମାରି ନା ରିସା ନାଙ୍ଗି ସାହାଜ୍ୟ କିତାତ୍ । 6 ମାରି, ନାନ୍ ନିଜେଦି ରିସାଦାନ୍ ଲୋକାଙ୍ଗ୍ ମାଟ୍ତା ପୋକ୍ତା ମାରି ନା ରିସାଦାନ୍ ୱାରିଙ୍ଗ୍ ସୋସ୍ପିସ୍ କିତା, ମାରି ବୁମିଦୁ ୱାରି ଜିବନ୍ତି ନେତେର୍ ବୁମିଦୁ ୱାକ୍ତା ପୋକ୍ତା ।
ଇସ୍ରାଏଲ ଉଣ୍ତିଙ୍ଗ୍ ପ୍ରବୁଦି ଦୟା
7 ମାପୁ ପ୍ରବୁଦି ଜିବନ୍ନୋନି ଦୟା ୱିଜୁ ପାଟା ପାର୍ନାଟ୍ ମାରି ପ୍ରବୁ ମା ଆମାୱିଜୁ ନେଗିକା କିତା ମାନାନ୍,
ମାରି ନିଜେଦି ୱିଜୁ ଦୟା
ମାରି ନାଣ୍ଡ୍ ଲାଡ୍ତି ଦୟା ଇସାବ୍ଦାନ୍ ଇସ୍ରାଏଲ କୁଟୁମ୍ଦି ଆମା ନାଣ୍ଡ୍ ନେଗିକା କିତାମାନାନ୍,
ଇୟା ଇସାବ୍ଦାନ୍ ମାଡ୍ ପ୍ରବୁଦି ପ୍ରସଂସା ୱେଡ଼ିକା କିନାଟ୍ ।
8 ଇରିଙ୍ଗ୍ ୱାନ୍ ଇର୍ହାନ୍, ସତ୍ନେ ୱାନ୍ ମା ଲୋକୁ, ଆମାକାର୍ ଟକେ କିନିକା ବ୍ୟବ୍ଆର୍ କିଏର୍, ଇୟାୱାଜା କଡ଼ର୍ ମାନାର୍; ଆଦେଙ୍ଗ୍ ୱାନ୍ ୱାରି ରକିୟାକିନିକାନ୍ ଆତାନ୍ । 9 ୱାରି ୱିଜୁ ଦୁକ୍ତୁ ୱାନ୍ ଦୁଃକ୍ ଆତାନ୍ ମାରି ୱାନି ମୋକମ୍ ୱାଜା ଦୁତ୍ ୱାରିଙ୍ଗ୍ ରକିୟା କିତାତ୍; ୱାନ୍ ନିଜେଦି ଜିବନ୍ନୋଜି ମାରି ନିଜେଦି ଦୟାଦାନ୍ ୱାରିଙ୍ଗ୍ ମୁକୁଡ଼ା କିତାନ୍ ମାରି ପୁର୍ବେ କାଡ଼ାଦି ୱିଜୁଦିନ୍ ୱାରିଙ୍ଗ୍ ଜାତୁନ୍ କିତାନ୍ । 10 ମାତର୍ ୱାର୍ ବିରୁଦ୍ ଆତାର୍ ମାରି ୱାନି ପବିତ୍ର ଆତ୍ମାଦିଙ୍ଗ୍ ଆଡ଼୍ବିସ୍ କିତାନ୍; ଇୟାଉଣ୍ଡିଙ୍ଗ୍ ୱାନ୍ ଡ଼େସି ୱାରି ସତ୍ରୁ ଆତାର୍ ମାରି ନିଜେ ୱାରି ତରଟାନ୍ ଆଜି ଜୁଦ୍ କିତାନ୍ ।
11 ନାସ୍ତିୱାଲେ ୱାର୍ ପୁର୍ବେ କାଡ଼ାଦି, ମୋସା ମାରି ନିଜେଦି ଲୋକାଙ୍ଗ୍ ଏତ୍କିଜି ଇର୍ହାନ୍, "ଆମାକାନ୍ ନିଜେଦି ମାନ୍ଦାଦି ରକ୍ୟାକିନି ଲୋକା ୱାଲେ ୱାରିଙ୍ଗ୍ ସାମ୍ଦୁର୍ ନାପିସ୍ କିଜି ତାତାନ୍, ୱାନ୍ ଏମେ ? ଆମାକାନ୍ ୱାରିଙ୍ଗ୍ ଜିବନ୍ତୁ ନିଜେଦି ପବିତ୍ର ଆତ୍ମା ଇଟ୍ତାନ୍, 12 ଆମାକାନ୍ ମୋସାଦି ଉଣି କିୟୁ ତରନ୍ ନିଜେଦି କାବାଆନି ସାକ୍ତି ବୁଲା କିତାନ୍, ଆମାକାନ୍ ନିଜେଦି ଉଣ୍ତିଙ୍ଗ୍ ଏସେଙ୍ଗ୍ୱିଜ୍ଇ ଦରୁ ଇଡ୍ଦେଙ୍ଗ୍, ୱାରି ଆଗ୍ଡ଼ି ଏରୁଦିଙ୍ଗ୍ ରୁଣ୍ତି ବାଗ୍ କିତାନ୍, 13 ଆମାକାନ୍ ଗରକାଣି ବାଟାବାଇଲୁଦୁ ବୁଲାନି ଗଡ଼ା ୱାଜା ନିରିଇ ସାମ୍ଦୁରତୁ ୱାରିଙ୍ଗ୍ ବୁଲାକିତାନ୍ ମାରି ୱାର୍ ତାକାଏତାର୍, ୱାନ୍ ଏମେ ? 14 ଗରତାନ୍ ରେସି ସୋନି ଜାତୁ ୱାଜା ପ୍ରବୁଦି ଆତ୍ମା ୱାରିଙ୍ଗ୍ ରୋମିସ୍ କିତାତ୍; ଇୟାୱାଜା ନିନ୍ ନିଜେଦି ଉଣ୍ତିଙ୍ଗ୍ ଉନ୍ଡ୍ରି ଗୌରବ୍ ଦରୁ ଇଡ୍ନି ଉଣ୍ତିଙ୍ଗ୍ ନିଜେଦି ଲୋକାଙ୍ଗ୍ ବୁଲା କିତାନ୍ ।"
ଦୟା ନି ସାହାଜ୍ୟ ଉଣ୍ତିଙ୍ଗ୍ ପାର୍ତନା
15 ଇଲେଇ ମୁସ୍କୁପୁରୁତାନ୍ ସୁଡ଼ୁଆ, ମି ପବିତ୍ରଦି ମାରି ମିର୍ ଜାୟ୍ ବାସାତିମାନି ବାଡିଦାନ୍ ସୁଡ଼ୁଦୁ; ମି ୱେଡ଼ିକା ମାରି ମି ସାକ୍ତିଦି ପାଣି ୱିଜୁ ଏମେ ? ମି ଜିବନ୍ତି ଦୁଃକ୍ ମାରି ମି ଜିବନ୍ନୋନିକା ନା ଉଣ୍ତିଙ୍ଗ୍ ବନ୍ଦ୍ ଆତାମାନାତ୍ । 16 ମାରିବା ଅବ୍ରହାମ ମାଙ୍ଗିଁ ନେସ୍ଏନ୍ ମାରି ଇସ୍ରାଏଲ ମାଙ୍ଗିଁ ମାନାଏତ୍, ମାରିବା ନିନ୍ ତ ମା ବୁବା; ଏ ପ୍ରବୁ, ନିନୁ ମା ବୁବା; ପୁର୍ବେ କାଡ଼ାଦାନ୍ ମା "ମୁକୁଡ଼ାକିନିକାନ୍" ଇଜି ନି ଦରୁ ମାନାତ୍ । 17 ଏ ପ୍ରବୁ, ମାଙ୍ଗିଁ ନି ସାରିଦାନ୍ ଏନ୍ଦା ବେମ୍ରି କିଜିନି ମାରି ନିଙ୍ଗିଁ ତିଲାନି ମାଣାନ୍ ମା ଜିବନ୍ତୁ ଆଟ୍ୱା କିଜିନି ? ନିଜେଦି ଦାସ୍ରି, ନିଜେଦି ଅଦିକାର୍ ୱାଜା କୁଟୁମ୍ତି ଉଣ୍ତିଙ୍ଗ୍ ଡ଼େସି ରାଆ ।
18 ନି ପବିତ୍ର ଲୋକୁ କେବଲ ଉଣା ଦିନ୍ ସାନ୍ଦି ଆକା ଅଦିକାର୍ କିତାନ୍; ମା ସାତ୍ରୁରୁ ନି ପବିତ୍ର ପାଦାମ୍ ଆଡ୍ଗି ମାଟ୍ତା ମାନାର୍ । 19 ଆମାୱାରି ମୁସୁକୁ ନିନ୍ ଏସେଙ୍ଗ୍ ସାସନ୍ କିଇ, ଆମାକାର୍ ନି ଦରୁଦାନ୍ ଏସେଙ୍ଗ୍ ୱିଙ୍ଗିଁଏର୍ ମାର୍ହାର୍, ଇୟାୱାଜା ଲୋକା ୱାଜା ମାପ୍ ଆତାମାନାପ୍ ।
/images/a/a0208299-6f37-40a0-66e1-2576b9435f00)
/images/a/Tcg2NiV7ce24OT6kCIQGR)