1 "ଆମାକାର୍‌ ନା ବିସୟ୍‌ ୱେନ୍‌ବାଏତାର୍‌, ୱାରିମାଣାନ୍‌ ନାନ୍‌ ପୟାଜିନା; ଆମାକାର୍‌ ନାଙ୍ଗି ରେବାଏତାର୍‌, ୱାର୍‌ ନାଙ୍ଗି ପଇଜିନାର୍‌; ଆମା ଦେସ୍‌ତି ଲୋକୁ ନା ଦର୍‌ତିଙ୍ଗ୍‌ ନେସ୍‌ଏର୍‌ ମାର୍ହାର୍‌, ୱାରିଙ୍ଗ୍‌, ନାଙ୍ଗି ସୁଡ଼ୁଦୁ, ନାଙ୍ଗି ସୁଡ଼ୁଦୁ ଇଜି ନାନ୍‌ ଇର୍ହା । 2 ଆମାକାର୍‌ ନିଜେ ନିଜେଦି ବଦାଦାନ୍‌ ସେଇ ସାରିଦୁ ବୁଲାନାର୍‌, ଇୟାୱାଜା ବିରୁଦ୍‌ କିନି ଲୋକା ଉଣ୍ତିଙ୍ଗ୍‌ ନାନ୍‌ ୱେଡ଼୍‌ୱେଡ଼ାରୁ ନିଜେଦି କିୟୁ ପେର୍‌ତା ମାନା; 3 ଆୟା ଲୋକୁ ଡଡିଦୁ ପୁଜା ସିଜି ମାରି ଏସ ଇଟା ମୁସୁକୁ ଦୁପ୍‌ଣି କାସିସ୍‌ କିଜି ନା ମକମ୍‌ ଆଗ୍‌ଡ଼ି ଦିନାମି ନାଙ୍ଗି ରିସା କିନାର୍‌; 4 ୱାର୍‌ ଦୁକିଦି ମୁସ୍‌ତିବାଡିଦୁ ବାସ୍‌ନାର୍‌ ମାରି ଏର୍‌ ନେସ୍‌ଇବାନୁ ବାସା କିନାର୍‌; ୱାର୍‌ ପାଣ୍ତ୍ରିକାଣ୍ଡା ତିନାର୍‌ ମାରି ୱାରି ସାଟିଦୁ କାଡ଼ିତି କାଣ୍ଡାଦି କାଡ଼ି ତେବାନେ; 5 ମାରି ୱାର୍‌ ଆଇ ଲୋକାଙ୍ଗ୍‌ ଇନାର୍‌, ନିଜେଦି ବାଡିଦୁ ନିଲ୍‌ଦୁ, ମା ଲାକ୍‌ତୁ ରାମାଟ୍‌, ଇର୍ରିଙ୍ଗ୍‌ ମାପ୍‌ ମି ମାଣାନ୍‌ ପବିତ୍ର; ଇୟାକାର୍‌ ନା ମୁଜିଦୁ ଦାର୍ମୁ ୱାଜା, ୱେଡ଼ାରୁ କାସ୍‌ନି ସିସୁ ୱାଜା ।"

6 ସୁଡ଼ୁଦୁ, ନା ଆଗ୍‌ଡ଼ି ଇକା ରାସାତା ମାନାତ୍‌; "ନାନ୍‌ ଆଲେଜି ମାନ୍‌ଏ, ମାତର୍‌ ଦଣ୍ତ୍‌ ସିନା, ହୁଁ, ନାନ୍‌ ୱାରି ଜିବନ୍‌ତୁ ଦଣ୍ତ୍‌ ସିନା," 7 ପ୍ରବୁ ଇଜିନାନ୍‌, "ଗରକା ମୁସୁକୁ ଦୁପ୍‌ଣି କାସିସ୍‌ତି ମାନିଦେର୍‌ ମାରି ଇସ୍ରିଗରକା ମୁସୁକୁ ନାଙ୍ଗି ନିନ୍ଦା କିତିମାନିଦେର୍‌ ଜେ ମିର୍‌, ମି ପାପ୍‌ ମାରି ମି ପୁର୍ବେଦି ଡକ୍‌ରାଦାଦାରି ପାପ୍‌ଦିୱିଜୁ ଦଣ୍ତ୍‌ ନାନ୍‌ ଅର୍‌ସେ ସିନା; ଇୟାଉଣ୍ଡିଙ୍ଗ୍‌ ନାନ୍‌ ଆଗ୍‌ଡ଼ି ୱାରି ପାଣିଦି ଇସାବ୍‌ କିଜି ୱାରି କଡ଼ରିଙ୍ଗ୍‌ ସିନା ।"

8 ପ୍ରବୁ ଇୟା ମାଟା ଇନାନ୍‌, ଅଙ୍ଗୁର୍‌ ଜୁପାଦୁ ଆମାଜାକୁ ପୁନି ଅଙ୍ଗୁର୍‌ ରସ୍‌ ପୁଟ୍‌ନାତ୍‌ ମାରି ଲୋକୁ ଇନାର୍‌, ଇକା ନାସ୍ଟୁ କିମାଟ୍‌, ଇର୍ରିଙ୍ଗ୍‌ ଇବେନୁ ଆର୍ସିବାଦ୍‌ ମାନାତ୍‌; ଆୟାୱାଜା ନାନ୍‌ ନିଜେଦି ଦାସ୍‌ରି ଉଣ୍ତିଙ୍ଗ୍‌ କିନା, ନାନ୍‌ ୱିଜେରିଙ୍ଗ୍‌ ସାପିସ୍‌ କିଏ । 9 ମାରି, ନାନ୍‌ ଜାକୁବଦି ମାଣାନ୍‌ ଉଣ୍ତ୍ରି କୁଟୁମ୍‌ ମାରି ଜିହୁଦାଦି ମାଣାନ୍‌ ନା ଗରକାଣି ଉନ୍‌ଡ୍ରି ଅଦିକାର୍‌ ସପ୍‌ନା ମାରି ନା ବାସେକିତି ଲୋକୁ ଆକା ଅଦିକାର୍‌ କିନାର୍‌ ମାରି ନା ଦାସର୍‌ ଆବେନୁ ବାସାନାର୍‌ । 10 ମାରି, ନା ଆମା ଲୋକୁ ନାଙ୍ଗି ରେବାତା ମାନାର୍‌, ୱାରି ଉଣ୍ତିଙ୍ଗ୍‌ ସାରଣ ଉନ୍‌ଡ୍ରି ମେଣ୍ଡେଙ୍ଗା ସାଡ଼ା ମାରି ଆକୋର୍‌ ଗରତି ଜଲା କଡିଙ୍ଗାଣି ଗୁରୁନି ବାଡି ଆନାତ୍‌ ।

11 ମାତର୍‌ ପ୍ରବୁଙ୍ଗ୍‌ ଡ଼ିସିନିଦେର୍‌, ନା ପବିତ୍ର ଗରତିଙ୍ଗ୍‌ ବାଣାଜିନିଦେର୍‌, ଗାଦ୍ ଦେୟାମ୍‌ଦି ଉଦେସ୍‌ତାନ୍‌ କାଦି ସିଜିନିଦେର୍‌ ମାରି ମେନି ଦେୟାମ୍‌ତି ଉଦେସ୍‌ତାନ୍‌ ମିସାତି ଅଙ୍ଗୁର୍‌ରସ୍‌ ବର୍ତି କିଜିନିଦେର୍‌ ଜେ ମିରୁ, 12 ମିଙ୍ଗିଁ ନାନୁ କାଣ୍ତା ଉଣ୍ତିଙ୍ଗ୍‌ ତିଆର୍‌ କିନା ମାରି ମିର୍‌ ୱିଜେରେ ସାନି ବାଡିଦୁ ପାଡ଼ିଗିନିଦେର୍‌; ଇର୍ରିଙ୍ଗ୍‌ ନାନୁ କୁକ୍‌ତି ୱାଲେ ମିର୍‌ ୱାର୍‌ଗିଇତିଦେର୍‌; ନାନ୍‌ ୱାର୍‌ଗିତି ୱେଡ଼ାଦୁ ମିର୍‌ ୱେନ୍‌ଇତିଦେର୍‌; ମାତର୍‌ ନା ଆଗ୍‌ଡ଼ି ଆମାକା ସେଇକା, ଆକାନେ ନେ ମିର୍‌ କିତିଦେର୍‌ ମାରି ଆମାବାନୁ ନାନ୍‌ ୱେଡ଼ିକା ସିଲେ, ଆକା ନେ ବାସେ କିତିଦେର୍‌ । 13 ଇୟାଉଣ୍ଡିଙ୍ଗ୍‌ ପ୍ରବୁ ଇୟା ମାଟା ଇଜିନାନ୍‌, "ସୁଡ଼ୁଦୁ, ନା ଦାସର୍‌ ଉଣାର୍‌, ମାତର ମିର୍‌ ବାଙ୍ଗାଁ ଆନିଦେର୍‌; ସୁଡ଼ୁଦୁ, ନା ଦାସର୍‌ ଉଣାର୍‌, ମାତର ମିର୍‌ ଏର୍‌କିଆନିଦେର୍‌; ସୁଡ଼ୁଦୁ, ନା ଦାସ୍‌ର ୱେଡ଼ିକା କିନାର୍‌, ମାତର ମିର୍‌ ସେମାର୍‌ ଆନିଦେର୍‌; 14 ସୁଡ଼ୁଦୁ, ନା ଦାସର୍‌ ମନ୍‌ତି ସୁକ୍‌ ଉଣ୍ତିଙ୍ଗ୍‌ ପାଟା ପାର୍‌ନାର୍‌, ମାତର୍‌ ମିର୍‌ ମନ୍‌ତି ଦୁଃକ୍‌ ଉଣ୍ତିଙ୍ଗ୍‌ ଆଡ଼୍‌ବାନିଦେର୍‌ ମାରି ଆତ୍ମାଦି ରିସାଦି ଉଣ୍ତିଙ୍ଗ୍‌ ଆଡ଼୍‌ବାନିଦେର୍‌ । 15 ମାରି, ମିର୍‌ ନା ଆସ୍‌କିତି ଲୋକା ଲାକ୍‌ତୁ ମି ଦରୁ ଆନାଦୁରିଆ ୱାଜା ଇଡ୍‌ନାନ୍‌ ମାରି ମାପୁରୁ, ପ୍ରବୁ ମିଙ୍ଗିଁ ସାପିସ୍‌ କିନାନ୍‌; ମାରି, ୱାନ୍‌ ନିଜେଦି ଦାସ୍‌ରିଙ୍ଗ୍‌ ଆଇ ଦର୍‌ତାନ୍‌ ୱେଙ୍ଗିସ୍‌ନାନ୍‌; 16 ଆବେନୁ ଆମା ଲୋକୁ ଦୁନିଆଦୁ ନିଜେଦିଙ୍ଗ୍‌ ଆର୍ସିବାଦ୍‌ କିନାନ୍‌, ୱାନ୍‌ ସତ୍‌ ମାପୁରୁଦି ମାଣାନ୍‌ ନିଜେଦିଙ୍ଗ୍‌ ଆର୍ସିବାଦ୍‌ କିନାନ୍‌ ମାରି ଆମାଲୋକୁ ଦୁନିଆଦୁ ପାର୍‌ମାଣ୍‌ କିନାନ୍‌, ୱାନ୍‌ ସତ୍‌ ମାପୁରୁଦି ମାଣାନ୍‌ ପାର୍‌ମାଣ୍‌ କିନାନ୍‌; ଏନ୍ଦାଇର୍ରିଙ୍ଗା ପୁର୍ବେ କାଡ଼ାଦି ସେଇକାୱିଜୁ ବାଣାଇ ଆତାମାନାତ୍‌ ମାରି ଆକାୱିଜୁ ନା ଆଗ୍‌ଡ଼ି ମାରାଗିତାମାନାତ୍‌ ।"

17 ଇର୍ରିଙ୍ଗ୍‌ ସୁଡ଼ୁଦୁ, ନାନ୍‌ ପୁନି ବାଦଡ଼୍‌ୱିଜୁ ମାରି ପୁନି ଦୁନିଆ ତିଆର୍‌ କିନା ମାରି ପୁର୍ବେ କାଡ଼ାଦି ବିସୟ୍‌ୱିଜୁ ଏତ୍‌ କିଆୟ୍‌ ଆଏତ୍‌, କି ମନ୍‌ତୁ ରେଏତ୍‌ । 18 ମାତର୍‌ ନାନ୍‌ ଆମାକା ତିଆର୍‌ କିନା, ମିର୍‌ ୱିଜୁୱେଡ଼ାଦୁ ଆବେନୁ ୱେଡ଼ିକା ଆଜି ୱେଡ଼ିକା କିଦୁ; ଇର୍ରିଙ୍ଗ୍‌ ସୁଡ଼ୁଦୁ, ନାନ୍‌ ଜିରୁସାଲମତିଙ୍ଗ୍‌ ୱେଡ଼ିକା ୱାଜା ମାରି ଆବେଣି ଲୋକାଙ୍ଗ୍‌ ୱେଡ଼ିକାଦି ଲୋକୁ କିଜି ତିଆର୍‌ କିନା । 19 ମାରି, ନାନ୍‌ ଜିରୁସାଲମତୁ ୱେଡ଼ିକା କିନାଟ୍‌ ମାରି ନା ଲୋକା ଲାକ୍‌ତୁ ୱେଡ଼ିକା କିନାଟ୍‌; ମାରି, ଆୟା ଲୋଇ କତାଜି ଆଡ଼୍‌ବାନି ଆଉଲି, କି ଆଡ଼୍‌ବାନିକା ୱେନାଇଆଏତ୍‌ନି । 20 ଆୟାୱେଡ଼ାଦାନ୍‌ ଆବେନୁ ଇସ୍ରି କଡ଼ ମାରି ନାଣ୍ଡ ଡକ୍ରା ଲୋକୁ ମାନ୍‌ଏର୍‌; ଇରିଙ୍ଗ୍‌ କଡ଼ର୍‌ ସହେ ବାର୍ସେକ୍‌ତାନ୍‌ ସାନାନ୍‌ ମାରି ପାପି ଲୋକୁ ସହେ ବାର୍ସେକ୍‌ତୁ ଅବିସାପ୍‌ ପଇନାନ୍‌ । 21 ମାରି, ଲୋକୁ ଇଲୁ ତିଆର୍‌ କିଜି ଆବେନୁ ବାସା କିନାର୍‌ ମାରି ୱାର୍‌ ଅଙ୍ଗୁର୍‌ରସ୍‌ ତିଆର୍‌ କିଜି ଆବେନୁ ପଲ୍‌ ପଇନାର୍‌ । 22 ୱାର୍‌ ତିଆର୍‌ କିତିଙ୍ଗା, ଆଇକାର୍‌ ଆବେନୁ ଏର୍‌ ବାସାକିଏର୍‌; ୱାର୍‌ ଉର୍‌ତିଙ୍ଗା, ଆଇକାର୍‌ ଏର୍‌ ପଲ୍‌ ତିନ୍‌ଏର୍‌; ଇର୍ରିଙ୍ଗ୍‌ ନା ଲୋକା ବୟସ୍‌ ମାରାତି ବୟସ୍‌ ୱାଜା ଆନାତ୍‌ ମାରି ନାନ୍‌ ଆସ୍‌କିତି ଲୋକୁ ନାଣ୍ଡ ବାର୍ସେକ୍‌ ସାନ୍ଦି ନିଜେ କିତି କାର୍ମୁଦି ପଲ୍‌ ପଇନାର୍‌ । 23 ୱାର୍‌ ଆର୍‌ଏ ପାଣି କିଏର୍‌, କି ବାଦାଦି ଉଣ୍ତିଙ୍ଗ୍‌ ଜନମ୍‌ କିଏର୍‌; ଇର୍ରିଙ୍ଗ୍‌ ୱାର୍‌ ମାରି ୱାରିୱାଲେ ୱାରି କଡ଼ର୍‌, ପ୍ରବୁଦି ଆର୍ସିବାଦ୍‌ତି କୁଟୁମ୍‌ ଆନାର୍‌ । 24 ମାରି, ଇକା ଗଟାନାତ୍‌ ଜେ, ୱାର୍‌ କୁକୁନି ଆଗ୍‌ଡ଼ି ନାନ୍‌ ଇନା ମାରି ୱାନ୍‌ ମାଟା ଇନ୍‌ବୁ ଇନ୍‌ବୁ ନାନ୍‌ ୱେନା । 25 ଗଦଡୁରୁକା ମାରି ମେଣ୍ଡାପିଲା ଅର୍‌ସେ ସାରାନେ ମାରି ପାର୍ଟାନରେସ୍‌ କଡି ୱାଜା ସାରା ତିନାତ୍‌; ମାରି, ଦୁଡ଼ି ସାରାସୁଦି କାଦି ଆନାତ୍‌ । ୱାକ୍‌ ନା ପବିତ୍ର ଗରତି ଏମେବା ବାଡିଦୁ ନାଣ୍ତରିସା କି ସାପିସ୍‌ କିଏନ୍‌, ପ୍ରବୁ ଇକା ଇଜିନାନ୍‌ ।