1 ଇୟାୱେନ୍‌କା ଜିସିଦି ମୋଦଲତାନ୍‌ ଉନ୍‌ଡ୍ରି ମାରାନ୍‌ ଆନାତ୍‌ ମାରି ଆୟା ମଦଲତାନ୍‌ ଉଣ୍ତ୍ରି କମା ଆଜି ପଲ୍‌ ଆସ୍‌ନାତ୍‌; 2 ମାରି, ପ୍ରବୁଦି ଆତ୍ମା, ଗ୍ୟାନ୍‌ ମାରି ସିନ୍ତାକିନି ଆତ୍ମା, ଉପାୟ୍‌ ମାଟା ମାରି ସାକ୍ତିଦି ଆତ୍ମା, ପିର୍‌ନିକା ମାରି ପ୍ରବୁଦି ବିସୟ୍‌ଦି ତିଲାନି ଆତ୍ମା ୱାନିମାନୁ ତେବାନାତ୍‌; 3 ସଦାପ୍ରବୁ ବିସୟ୍‌ଦାନ୍‌ ତିୟେଲ୍‌ଦାନ୍‌ ୱାରି ୱେଡ଼ିକା ଆନାତ୍‌; ମାରି, ୱାନ୍‌ ନିଜେଦି କାଣାଗାଦି ସୁଡ଼ୁନି ଇସାବ୍‌ଦାନ୍‌ ବିସାର୍ କିଏନ୍‌, ମାରିବା ନିଜେଦି ଗିତଣିଦାନ୍‌ ୱେନ୍‌ଜି ଇସାବ୍‌ଦାନ୍‌ ମାଟା ୱେର୍‌ଏନ୍‌, 4 ମାତର୍‌ ୱାନ୍‌ ଦାର୍ମୁଦି ସିଲିସାତି ଲୋକାଙ୍ଗ୍‌ ବିସାର୍‌ କିନାନ୍‌ ମାରି ଦୁନିଆଦି ସାନ୍ତି ଲୋକା ଉଣ୍ତିଙ୍ଗ୍‌ ନିୟାଇ କିନାନ୍‌; ମାରି, ୱାନ୍‌ ନିଜେଦି ୱେୟୁଦାନ୍‌ ମାଟାଦି ଦଣ୍ଡ ଦାନ୍‌ ଦୁନିଆଦିଙ୍ଗ୍‌ ଡାକ୍‌ନାନ୍ ମାରି ନିଜେଦି ୱେୟୁଦି ପୁଣ୍ଡାଦାନ୍‌ ତାଗ୍‌ଇ ଲୋକାଙ୍ଗ୍‌ ସାପିସ୍ କିନାନ୍‌ । 5 ଦାର୍ମୁ ମାରି ବିସ୍‌ବାସ୍‌ତି ୱାନି ଜୁକିଦୁ ତରାନି ବେଲୁଟୁ ଆନାତ୍‌ ।

6 ମାରି, ଗଦଡୁରୁକା ମେଣ୍ଡାପିଲାଦି ୱାଲେ ବାସାନାତ୍‌ ମାରି ଚିତା ନରେସ୍‌ ଗରିଆ ପିଲାଦି ୱାଲେ ଡର୍‍ନାତ୍‌; ବାଚିପିଲା, ପାର୍ଟାନରେସ୍‌ ମାରି ପସା କିନି ଜାତୁଦି ୱାଲେ ଅର୍‌ସେ ତେବାନେ; ମାରି, ଅରେନ୍‌ ଇସ୍‌ରି କୋଡ଼ ୱାନିକାଙ୍ଗ୍‌ ସାରାକିନାନ୍‌ । 7 ମାରି, ପାଡା ମାରି ଅଡ଼୍‍ଜୁ ମିସାଜି ସାରାନେ; ୱାନିକା ପିଲେକ୍‌ ୱିଜୁ ଉଡ୍ରେବାନୁ ଗୁର୍‌ନେ; ମାରି, ପାର୍ଟାନରେସ୍‌ କଡି ୱାଜା ସାରା ତିନାତ୍‌ । 8 ମାରି, ପାଲୁ ଉଣି କୋଡ଼ ୱିସାମ୍‌ତି ସାରାସୁଦି ମୁସୁକୁ କାର୍‌ଜିନାନ୍‌ ମାରି ପାଲୁ ଡ଼ିସ୍‌ତି କୋଡ଼ ସାରାସୁଦି ବର ଲୋଇ କିୟୁ ଇଡ୍‌ନାନ୍‌ । 9 ୱାର୍‌ ମା ପବିତ୍ର ଗରନୁଦି ଏମେ ବାଡ଼ିଦୁ ନାସ୍ଟୁ କି ସାପିସ୍‌ କିଏର୍‌; ଇରିଙ୍ଗ୍‌ ସାମ୍‌ଦୁର ଏଣ୍ଡେସ୍‌ ଏରୁଦାନ୍‌ ବର୍ତି ଆତାମାନାତ୍‌, ଦୁନିଆ ଆୟାୱାଜା ସଦାପ୍ରବୁ ବିସୟ୍‌ଦି ବୁଦିଦାନ୍‌ ବର୍ତି ଆନାତ୍‌ ।

10 ମାରି, ଆୟା ନାଣ୍ତିଙ୍ଗ୍‌ କୁଡ଼ାଦି ଜେଣ୍ତା ୱାଜା ତିୟାର୍‌ ଆନାତ୍‌ ଜେ ଜିସିଦି ମଦଲତୁ, ୱିଜୁ ଦେସ୍‌ତି ଲୋକୁ ୱାନିଙ୍ଗ୍‌ ରେବାନାର୍‌; ମାରି, ୱାନି ରୋମନି ବାଡି ଗୌରବ୍‍ ଆନାତ୍‌ । 11 ମାରି, ଆୟା ନାଣ୍ତିଙ୍ଗ୍‌ ମାପୁରୁ ନିଜେଦି ଲୋକାଦି ତେବାତିମାନି ୱାରିଙ୍ଗ୍‌ ଅସୁରଦାନ୍‌, ମିସରତାନ୍‌ ମାରି ପଥ୍ରୋସତାନ୍‌, କୁସତାନ୍‌, ଏଲମ୍‌ତାନ୍‌, ସିନିୟଦାନ୍‌ ମାରି ହମାତଦାନ୍‌ ମାରି ସାମ୍‌ଦୁର୍‌ତି ନାଡ଼ିମି ମାନି ଲୋକାଙ୍ଗ୍‌ ମୁକୁଡ଼ା କିଜି ତାନି ଉଣ୍ତିଙ୍ଗ୍‌ ମାରିଉଣ୍ଡ୍ରି ଜାରି ନିଜେ ଡ଼େସି ୱାନାନ୍‌ । 12 ମାରି, ୱାନ୍‌ କୁଟୁମ୍‌ଦି ଉଣ୍ତିଙ୍ଗ୍‌ ଜେଣ୍ତା ନିକ୍‌ନାନ୍‌ ମାରି ପୃଥିବିଦି ନାଲ୍‌ଗି କୋନେଙ୍ଗାଣାନ୍‌ ଇସ୍ରାଏଲଦି ଇନିଙ୍ଗା ଆନିଙ୍ଗାଁ ଆତିଲୋକାଙ୍ଗ୍‌ ଉଣ୍ତା କିନାନ୍‌ ମାରି ଜିହୁଦାଦି ଛିନ୍‌ ବିନ୍‌ ଆତି ଲୋକାଙ୍ଗ୍‌ ଉଣ୍ଡା କିନାନ୍‌ । 13 ମାରି, ଇପ୍ରୟିମଦି ରିସା ଆକ ଆନାତ୍‌ ମାରି ଜିହୁଦାଦିଙ୍ଗ୍‌ କାସ୍ଟୁ ସିନି ଲୋକୁ ନାସ୍ଟୁ ଆନାର୍‌; ଇପ୍ରୟିମ ଯିହୁଦାଦିଙ୍ଗ୍‌ ରିସା ଆଏନ୍‌ ମାରି ଜିହୁଦା ଇପ୍ରୟିମଦିଙ୍ଗ୍‌ ବା କାସ୍ଟୁ ସିଏନ୍‌ । 14 ମାରି, ୱାର୍‌ ୱେଡ଼ା ଆର୍‌ନି ତରିନ୍‌ ପଲେସ୍ଟିୟରି ଗୁଜାମି ମୁସୁକୁ ଡାଟ୍‌ନାର୍‌; ୱାର୍‌ ଉଣ୍ଡ୍ରେମାନୁ ଆଜି ୱେଡ଼ା ସନି ତରିଟି ଦେସ୍‌ତି ଲୋକାଦି ଜିନ୍‌ସୁ ଡଙ୍ଗାଁ କିନାର୍‌; ୱାର୍‌ ଇଦୋମ ମାରି ମୋୟାବ ମୁସୁକୁ କିୟୁ ସାକ୍‌ନାର୍‌ ମାରି ଅମ୍ମୋନଦି ଲୋକୁ ୱାରି ମାଟା ମାନାନାର୍‌ । 15 ମାରି, ସଦାପ୍ରବୁ ମିସ୍ରିୟ ସାମ୍‌ଦୁର୍‌ତି ଏରୁ ୱିଜୁ ୱାରିସ୍ କିନାନ୍‌ ମାରି ନିଜେଦି ୱେସ୍‌ନି ଗାଲି ଦାନ୍‌ ପରାତ୍‌ ଗାଡାଦି ମୁସୁକୁ ନିଜେଦି କିୟୁ ପେର୍‍ନାନ୍‌, ମାରି ଦାନିଙ୍ଗ୍‌ ଡାକ୍‌ସି ସାତ୍‌ ଗୋଟା ସନିକା କିନାନ୍‌ ମାରି ଲୋକାଙ୍ଗ୍‌ ୱାର୍‌ତି ବାଡିଦି ଆୟା ଲୋଇ ସିଜି ବୁଲା କିନାନ୍‌ । 16 ମାରି, ଇସ୍ରାଏଲ ମିସର ଦେସ୍‌ତାନ୍‌ ସୋସି ୱାନି ୱେଡ଼ାଦୁ ଏଣ୍ଡେସ୍‌ଗି ଆୟା ଉଣ୍ତିଙ୍ଗ୍‌ ଆତା ମାର୍ହାତ୍‌, ଆୟାୱାଜା ୱାନି ତେବାତିମାନି ଲୋକା ଉଣ୍ତିଙ୍ଗ୍‌, ମାରି, ଅସୁର ଦେସ୍‌ତାନ୍‌ ତେବାତିମାନି ଲୋକା ଉଣ୍ତିଙ୍ଗ୍‌ ଉନ୍‌ଡ୍ରି ପେରି ରାସ୍ତା ଆନାତ୍‌ ।