1 ଆୟା ସମୟତୁ ହିଜକିୟ ନାଣ୍ଡ ରଗ୍‌ ଆଜି ସାତିୱାଜା ଆତାମାର୍ହାନ୍‌ । ଆବେନୁ ଆମସଦି ମାରିନ୍‌ ଜିସାଇୟ ବବିସତ୍‌ବକ୍ତା ୱାନି ଲାକ୍‌ତୁ ୱାଜି ଇର୍ହାନ୍‌, "ସଦାପ୍ରବୁ ଇୟା ମାଟା ଇଜିନାନ୍‌, ନିନ୍‌ ନିଜେଦି ଇଲୁ ବିସୟ୍‌ଦାନ୍‌ ସିନ୍ତା କିଆ; ଇର୍ରିଙ୍ଗ୍‌ ନିନ୍‌ ସାନି, ଜିଦେଙ୍ଗ୍‌ ଆଟ୍‌ଇ ।"

2 ଇବେନୁ ହିଜକିୟ ଗଡା ତରନ୍‌ ମକମ୍‌ କିଜି ସଦାପ୍ରବୁଦି ଲାକ୍‌ତୁ ପାର୍‌ତନା କିଜି ଇର୍ହାନ୍‌, 3 "ଏ ସଦାପ୍ରବୁ, ନାନ୍‌ ମାଡ଼ିସ୍‌ କିଜିନା, ନାନ୍‌ ଏଣ୍ଡେସ୍‌ୱାଜା ସତ୍‌ଦାନ୍‌ ମାରି ନେଗି ଜିବନ୍‌ତାନ୍‌ ନି ଆଗ୍‌ଡ଼ି ବୁଲାତା ମାନା ମାରି ନି ଆଗ୍‌ଡ଼ିରାନ୍‌ ନେଗି ପାଣି କିତାମାନା, ଇକା ଇଲେଇ ଏତ୍‌କିଆ ।" ମାରି, ହିଜକିୟ ନାଣ୍ଡ୍‌ ଆଡ଼ାବାତାନ୍‌ ।

4 ନାସ୍ତିୱାଲେ ଜିସାଇୟଦି ଲାକ୍‌ତୁ ସଦାପ୍ରବୁଦି ମାଟା ଇତାତ୍‌ । 5 ନିନ୍‌ ସୋଲ୍‌ସି ହିଜକିୟଦିଙ୍ଗ୍‌ ଇନ୍‌ଆ, ସଦାପ୍ରବୁ, ମି ଡକ୍‌ରାଦାଦାରି ଦାଉଦଦି ମାପୁରୁ ଇୟା ମାଟା ଇଜିନାନ୍‌, "ମାପ୍‌ ମି ପାର୍‌ତନା ୱେର୍ହା ମାନାପ୍‌, ମି କାଣେର୍‌ ସୁଡ଼ୁତାପ୍‌, ସୁଡ଼ୁଦୁ, ମାପ୍‌ ମି ବୟସ୍‌ ପନ୍ଦ୍ର ବାର୍ସେକ୍‌ ନାଣ୍ତ୍‌ କିନାନ୍‌ । 6 ମାରି, ମାପ୍‌ ମିଙ୍ଗିଁ ମାରି ଇୟା ଗାଡ଼୍‌ତିଙ୍ଗ୍‌ ଅସୁରିୟ ରାଜା କିୟୁଦାନ୍‌ ରକିୟା କିନାପ୍‌ ମାରି ମାପ୍‌ ଇୟା ଗାଡ଼୍‌ତି ତରିନ୍‌ ଆନା ।"

7 ମାରି, ସଦାପ୍ରବୁ ନିଜେଦି ଇର୍ହି ମାଟା ଜେ ପୁରା କିନାନ୍‌, "ମି ଉଣ୍ତିଙ୍ଗ୍‌ ସଦାପ୍ରବୁଦି ମାଣାନ୍‌ ଇୟା ସିନା ଆନାତ୍‌; 8 ସୁଡ଼ୁଦୁ, ମାପ୍‌ ଆହସ୍‌ଦି ଗନ୍‌ଟା ୱେଡ଼ାଦି ନିଡ଼ା ଏସା ଆଗ୍‌ଡ଼ି ସର୍ହାମାନାତ୍‌, ଆକା ଦାସ୍‌ ପାଦ୍‌ ୱେନ୍‌କା ଡ଼େପ୍‌ସି ତାନାପ୍‌ ।" ଆବେଟ୍‌ ଗନ୍‌ଟା ୱେଡ଼ା ଆମା ଦାସ୍‌ ପାଦ୍‌ ଆଗ୍‌ଡ଼ି ସର୍ହାମାର୍ହାତ୍‌, ୱେନ୍‌କା ନାସନେ ଡ଼େସି ୱାତାତ୍‌ ।

9 ଜିହୁଦାଦି ରାଜା ହିଜକିୟ ନବ୍‌ ଆଜି ନିଜେଦି ନବ୍‌ତାନ୍‌ ନେଗେଣ୍ଡ୍‌ ଆତି ୱେନ୍‌କା ଇକା ରାସ୍‌ତାନ୍‌, ଜେ, 10 ନାନୁ ଇର୍ହା, "ନାନୁ ନିଜେ ଜିତିମାନି ବାର୍ସୁଦି ନାଣିମି ବେଡ଼ାଦୁ ପାତାଲ୍‌ତି ସେର୍‌ଲାଦୁ ଡ଼ୁଗ୍‌ନା; ନାନୁ ନିଜେ ଜିନି ବାର୍ସେକ୍‌ ପୋଇନିକା ଡ଼ିସ୍‌ତା । 11 ନାନୁ ଇର୍ହା, ନାନ୍‌ ସଦାପ୍ରବୁଙ୍ଗ୍‌, ଜିବନ୍‌ତି ଲୋକା ଦେସ୍‌ତୁ ସଦାପ୍ରବୁଦିଙ୍ଗ୍‌ ସୁଡ଼ୁଏନି; ନାନୁ ଦେସ୍‌ତୁମାନି ଲୋକା ୱାଲେ ଲୋକାଙ୍ଗ୍‌ ମାରି ସୁଡ଼ୁଏନି । 12 ନା ବୟସ୍‌ ଆକ ଆତାମାନାତ୍‌ ମାରି ମେଣ୍ଡେଙ୍ଗ୍‌ ସାରାକିନି ଗାଉଡ଼ୁଦି ଗୁଡ଼ା ୱାଜା ନା ମାଣାନ୍‌ ସୋର୍ହାମାନାତ୍‌; ନାନ୍‌ ନୁଲୁ ୱାଜା ନିଜେଦି ଜିବନ୍‌ ପିଡ଼ିକ୍‌ତାମାନା; ୱାନ୍‌ ନାଙ୍ଗି ନୁଲୁଦାନ୍‌ କଇନାନ୍‌; ଉନ୍‌ଡ୍ରେ ୱେଡ଼େ ନି ନାଡ଼ା ଦାନ୍‌ ୱାନ୍‌ ନାଙ୍ଗି ସାପିସ୍‌ କିନାନ୍‌ । 13 ନାନୁ ନାଡ଼ା ୱିଗ୍‌ଜି କାସ୍ଟୁଦାନ୍‌ ଆଡ଼୍‌ବାତା; ଏଣ୍ତେସ୍‌ ପାର୍ଟାନରେସ୍‌, ଆୟାୱାଜା ୱାନ୍‌ ନା ପେଡ଼େକୁ ୱିଜୁ ଗୁଣ୍ତୁଗୁଣ୍ଡା କିଜିନାନ୍‌; ଉନ୍‌ଡ୍ରେ ୱେଡ଼େ ନି ନାଡ଼ାଦୁନେ ନିନୁ ନାଙ୍ଗିଁ ସାପିସ୍‌ କିନି । 14 ଏଣ୍ତେସ୍‌ ଡଡ଼ି ପଟି ମାରି ବକି ଆୱିଲି ଆନେ, ଆୟାୱାଜା ନାନ୍‌ ଚିଁ ଚିଁ ଆଉଲି କିତା ; ନାନ୍‌ ପାଉରାଦି ୱାଜା ଆଡ଼୍‌ବାତା; ମୁସୁକୁ ସୁଡ଼ୁଜି ସୁଡ଼ୁଜି ନା କାଣୁକୁ ସିକାଟି ଆଜିନେ; ଏ ସଦାପ୍ରବୁ, ନାନ୍‌ କାଣ୍ଡିଆ କାବ୍‌ରାଦିକାନ୍‌ ଆତାମାନା, ନିନୁ ନା ସାକା ଆଆ । 15 ନାନ୍‌ ଇନିକା ଇନା ? ୱାନ୍‌ ତୋ ନାଙ୍ଗିଁ ଇର୍ହାମାନାନ୍‌, ନିଜେ ଆକା ପୁରା କିତାମାନାନ୍‌; ନାନୁ ନିଜେଦି ଜିବନ୍‌ତି ଦୁଃକ୍‌ତି ଉଣ୍ତିଙ୍ଗ୍‌ ନିଜେଦି ୱିଜୁ ବାର୍ସେକ୍‌ ଦିରେ ଦିରେ ବୁଲାନା । 16 ଏ ପ୍ରବୁ, ଇୟାୱିଜୁ ମାଣାନ୍‌ ଲୋକୁ ଜିଜିନାର୍‌, ମାରି ଆବେନୁ ନେ ପୁରାଦାନ୍‌ ନା ଆତ୍ମାଦି ଜିବନ୍‌ ମାନାତ୍‌, ଇୟାଉଣ୍ଡିଙ୍ଗ୍‌ ନିନ୍‌ ନାଙ୍ଗି ନେଗେଣ୍ଡ୍‌ କିଜି ଜିପିସ୍‌ କିଆ । 17 ସୁଡ଼ୁଆ, ନାନ୍‌ ନିଜେଦି ସାନ୍ତି ଉଣ୍ତିଙ୍ଗ୍‌ ନାଣ୍ଡ ଦୁଃକ୍‌ ପୟ୍‌ତା; ମାତର ନିନ୍‌ ନା ଜିବନ୍‌ ଉଣ୍ତିଙ୍ଗ୍‌ ଜିବନ୍‌ନୋଜି ସାନିମାଣାନ୍‌ ୱାନିଙ୍ଗ୍ ରକିୟା କିତି; ଇର୍ରିଙ୍ଗ୍‌ ନିନ୍‌ ନିଜେଦି ୱେନ୍‌କା ତୋରିଟାନ୍‌ ନା ପାପ୍ ୱିଜୁ ୱେନେକା ପୋକ୍‍ତିମାନି । 18 ଏଣ୍ତେସ୍‌ ପାତାଲ୍‌ପୁର୍‌ ନି ୱେଡ଼ିକା କିଦେଙ୍ଗ୍‌ ଆଟ୍‌ଏତ୍‌, ସାନିକା ନି ପାଟା ପାର୍‌ଦେଙ୍ଗ୍‌ ଆଟ୍‌ଏତ୍‌; ଗୁଟାଦୁ ମୁସାତିକାର୍‌ ନି ସତ୍‌ଦି ଉଣ୍ତିଙ୍ଗ୍‌ ଆସା କିଦେଙ୍ଗ୍ ଆଟ୍‌ଏର୍‌ । 19 ଏଣ୍ଡେସ୍‌ ନେରୁ ନାନ୍‌ କିଜିନା, ଆୟାୱାଜା ଜିବନ୍‌ତି ଲୋକୁ, କେବଲ ଜିବନ୍‌ତି ଲୋକୁନେ ନି ୱେଡ଼ିକା କିନାର୍‌; ବୁବା କଡ଼୍‌ରିଙ୍ଗ୍‌ ମି ସତ୍‌ମାଟା ୱେର୍‌ନାନ୍‌ । 20 ପ୍ରବୁ ନା ରକିୟା କିଦେଙ୍ଗ୍‌ ବଦା; ଇୟାଉଣ୍ଡିଙ୍ଗ୍ ମାପୁ ଜିବନ୍‌ ମାନି ସାନ୍ଦି ପ୍ରବୁଦି ଇଣ୍ଡ୍ର ବାଜା ଏସ୍‌ସି ନା ପ୍ରବୁଦି ପାଟା ପାର୍‌ନାପ୍‌ ।"

21 ଜିସାଇୟ ଇର୍ହାମାର୍ହାନ୍‌, "ୱାର୍‌ ତଗାଦାନ୍‌ ତିଆର୍‌ କିତି ଗୁଣ୍ଡା ଅସି କୁରୁ ମୁସୁକୁ ଉସିର୍‌, ଆବେନୁ ୱାନ୍‌ ନେଗେଣ୍ତ୍‌ ଆନାନ୍‌ ।" 22 ହିଜକିୟ ବା ଇର୍ହାମାର୍ହାନ୍‌, "ନାନ୍‌ ଜେ ପ୍ରବୁଦି ଇଣ୍ଡ୍ର ସନା, ଇବେଣି ସିନା ଇନିକା ?"