ଜିସାଇୟ୍ଦି ୱାନି ମାରିନ୍ଦି ସିନା
1 ମାରି, ସଦାପ୍ରବୁ ନାଙ୍ଗିଁ ଇର୍ହାନ୍, "ନିନ୍ ଉନ୍ଡ୍ରି ପେରି ରାସ୍ନି ପାଟା ଅସି ପେରି ନେସ୍ନି ଅଇକର୍ଦାନ୍ ଆୟା ମୁସୁକୁ ଇୟା ମାଟା ରାସ୍ଆ, ମହେର ଶାଲଲହାଶ୍ ବସ୍ ଡଙ୍ଗାଁକିତିକା ଦାପ୍ରେ ୱାଜିନାତ୍, ଡଙ୍ଗାଁ କିତି ଜିନିସ୍ ଦାପ୍ରେ ବୁଲାଜିନାତ୍ । 2 ମାରି, ନାନ୍ ପ୍ରାମାଣାମ୍ଦି ଉଣ୍ତିଙ୍ଗ୍ ଊରୀୟ ଜାଜକ ମାରି ଜିବୋରିଖୀୟଦି ମାରିନ୍ ଜିକରିୟଦିଙ୍ଗ୍ ନିଜେଦି ବିସ୍ବାସ୍ତି ସାକି କିନା ।"
3 ଇୟାୱେନ୍କା ନାନ୍ ବବିସତ୍ ମାଟା ୱେର୍ନି ତାନି ୱାଲେ ଇଲୁ ଆସ୍ତିଙ୍ଗ୍, ୱାଦ୍ ଗାର୍ବୁଦୁ ତେବାଜି ଅରେନ୍ କୋଡ଼ ଜନମ୍ କିତାତ୍ । ଆର୍ତିଙ୍ଗ୍ ସଦାପ୍ରବୁ ନାଙ୍ଗି ଇର୍ହାନ୍, "ୱାନି ଦରୁ ମହେର ଶାଲଲହାଶ୍ ବସ୍ ଇଡ୍ଦୁ । 4 ଇରିଙ୍ଗ୍ କୋଡ଼ ନା ବୁବା ମାରି ନା ୟାୟା ଇଜି କୁକୁନି ଉଣ୍ତିଙ୍ଗ୍ ବୁଦି ପୋଇନି ଆଗ୍ଡ଼ି ଦମେସକଦି ଧନ ମାରି ସମରିୟାଦି ଡଙ୍ଗାକିତି ଅସୁର ରାଜାଦି ଆଗ୍ଡ଼ି ଆଗ୍ଡ଼ି ପିଣ୍ତାଇ ଆଜି ଅଆୟ୍ ଆନାତ୍ ।"
ଅସୁର ରାଜାଦି ଜୁଦ୍
5 ଇୟାୱେନ୍କା ସଦାପ୍ରବୁ ନାଙ୍ଗି ମାରିଡ଼େସି ଇର୍ହାନ୍, 6 "ଇୟା ଲୋକୁ ସିଲୋହଦି ଦିରେ ଦିରେ ସୋଲ୍ସିମାନି ଏରୁ ଡ଼ିସ୍ସି ରତ୍ସିନ ମାରି ରମଲିୟଦି ମାରିନ୍ତି ଲାକ୍ତୁ ୱେଡ଼ିକା କିଜିନାର୍; 7 ଇୟାଉଣ୍ଡିଙ୍ଗ୍ ସୁଡ଼ୁଦୁ, ପ୍ରବୁ ଇଲେଇ ପରାତ୍ ଗାଡାଦି ନାଣ୍ଡ୍, ଇସାବ୍ସିଲି ଏରୁ ୱାଜା ଅସୁରଦି ରାଜାଦିଙ୍ଗ୍ ମାରି ୱାନି ୱିଜୁ ସାକ୍ତିଦିଙ୍ଗ୍ ୱାରି ମୁସୁକୁ ତାସିନାନ୍; ଆବେଟ୍ ୱାନ୍ ନିଜେଦି ୱିଜୁ ଏରୁ ମୁସୁକୁ ନିଙ୍ଗିଁଜି ନିଜେଦି ବାନ୍ଦୁ ମୁସୁକୁ ସିଜି ବୁଲାଜି ସନାନ୍; 8 ମାରି, ଏରୁ ନାଣ୍ଡ୍ ୱାଜା ଆଗ୍ଡ଼ି ପିରିଜି ଜିହୁଦା ସାନ୍ଦି ସନାତ୍; ୱାନ୍ ଉସ୍ଡ଼ାଜି ନିଙ୍ଗ୍ଜି ୱିଜୁ ତରିନ୍ ଆନେ; ଆୟା ଏରୁ କକ୍ଲା ସାନ୍ଦି ନିଙ୍ଗ୍ନାତ୍; ମାରି, ଏ ଇମ୍ମାନୁୟେଲ, ୱାନି ରେକା ସାକ୍ନି ମାଣାନ୍ ମି ଦେସ୍ତି ରକିୟା କିନାନ୍ ।"
9 ଏ କୁଟୁମ୍ ୱିଜୁ, ମିର୍ ଆଉଲି ଆତିଙ୍ଗ୍, ବା ମିର୍ ନାସ୍ଟୁ ଆନିଦେର୍; ମାରି, ଏ ଆକ ଦେସ୍ତି ଲୋକୁ ୱିଜେରେ, ମିର୍ ୱେଣ୍ଡ୍ରୁ; ମିର୍ ବେଲୁଟୁ ଆଟୁୱା ତରାତିଙ୍ଗ୍, ବା ନାଷ୍ଟୁ ଆନିଦେର୍ । 10 ମିର୍ ଉଣ୍ତ୍ରେମାନୁ ଆଜି ଉପାୟ୍ କିଦୁ, ଆକା ବା ଆଏଣ୍ତ୍ ଆନାତ୍; ମାଟା ଇଣ୍ତ୍ରୁ, ଆକା ବା ତିର୍ ଆଏତ୍; ଏଣ୍ତେସ୍ ମାପୁରୁ ମା ୱାଲେ ମାନାନ୍ ।
ମାପୁରୁଦି ଆଦେସ୍
11 ଇରିଙ୍ଗ୍ ସଦାପ୍ରବୁ ଡାଟ୍ତି କିୟୁଦୁ ଆସ୍ସି ନାଙ୍ଗିଁ ଇୟାୱାଜା ଇର୍ହାନ୍ ମାରି ନାନ୍ ଏଣ୍ଡେସ୍ ଇୟା ଲୋକା ସାରିଦୁ ବୁଲାଏ, ଇୟାଉଣ୍ଡିଙ୍ଗ୍ ନାଙ୍ଗିଁ ଆଦେସ୍ ସିଜି ଇର୍ହାନ୍, 12 ଇୟା ଲୋକୁ ଆମା ୱିଜୁ ବିସୟ୍ଦିଙ୍ଗ୍ ଉପାୟ୍ ଇଜି ଇନାର୍; ମିର୍ ଆୟା ୱିଜୁଦିଙ୍ଗ୍ ଉପାୟ୍ ଇଜି ଇନ୍ଇ; ମାରିବା ୱାରି ତିଲାନି ବିସୟ୍ଦିଙ୍ଗ୍ ମିର୍ ତିଲାମାଟ୍, ମାରି ଆୟା ବିସୟ୍ତାନ୍ ମିସାମାଟ୍ । 13 ପେରିସାକ୍ତିଦି ପ୍ରବୁଙ୍ଗୁ ନେ ମିର୍ ପବିତ୍ର ୱାଜା ମାନାନିଦେର୍, ମାରି, ୱାନ୍ ମି ତିଲାନି ବାଡ଼ି ଆପିନ୍ ମାରି ୱାନ୍ ମି ତିଲାନିକାନ୍ ଆପିନ୍ । 14 ଆବେନୁ ୱାନ୍ ଆୟା ପବିତ୍ର ରମ୍ନି ୱାଜା ଆନାନ୍, ମାତର୍ ଇସ୍ରାଏଲଦି ରୁଣ୍ତି କୁଟୁମ୍ ଉଣ୍ତିଙ୍ଗ୍ ଏର୍ପିସିସାନି କାଲୁ ମାରି ବାଦାଦି ପିଡ଼ିପି ଆନାତ୍, ଜିରୁସାଲମତି ଲୋକା ଉଣ୍ତିଙ୍ଗ୍ ଉରି ୱାଜା ଆନାର୍ । 15 ମାରି, ନାଣ୍ଡ୍ ଲୋକୁ ତାକାନାର୍ ମାରି ନାସ୍ଟୁ ଆନାର୍ ମାରି ଉରିଦୁ ସେର୍ଜି ଦାରାସିନାର୍ ।
16 ମିର୍ ଇୟା ପ୍ରାମାଣାମ୍ଦି ବାକ୍ୟ ତର୍ତୁ, ନା ସିସୁରି ଲୋଇ ନିୟମ୍ଦି ଟାପ୍ କିଆ । 17 ମାରି, ଆମାକାନ୍ ଯାକୁବ-କୁଟୁମ୍ଦି ମାଣାନ୍ ନିଜେଦି ମୋକମ୍ ପାଡ଼ାକ୍ନାନ୍, ନାନ୍ ଆୟା ସଦାପ୍ରବୁଦିଙ୍ଗ୍ କାପ୍କିନା ମାରି ୱାନି ଉଣ୍ତିଙ୍ଗ୍ ବେସ୍ସି ମାନା । 18 ସୁଡ଼ୁଦୁ, ନାନ୍ ମାରି ସଦାପ୍ରବୁଦି ମାଣାନ୍ ନାଙ୍ଗିଁ ସିତି କଡ଼ରିଙ୍ଗ୍ ସିୟୋନ ଗରନ୍ତୁ ବାସାନିକାର୍ ପେରିସାକ୍ତି ସଦାପ୍ରବୁଦି ମାଣାନ୍ ଇସ୍ରାଏଲତୁ ସିନା ମାରି କାବା ଆନି ସିନା ୱାଜା ଆନାତ୍ ।
19 ମାରି, ଏସ୍ତିୱାଲେ ୱାର୍ ମିଙ୍ଗିଁ ଇନାର୍, ଆମା ଦିସାରି ମାରି ଗୁଣିଆର୍ ଗୁଣୁ ଗୁଣୁ ମାରି ପୁସ୍ ପୁସ୍ କିଜି ଇନାର୍, ୱାରିଙ୍ଗ୍ ରେବାଦୁ; ମିର୍ ଇଣ୍ଡ୍ରୁ ଲୋକୁ ଇନିକା ନିଜେଦି ମାପୁରୁଙ୍ଗୁଁ ରେବାଏର୍ ନୋ ? ୱାର୍ ଇନିକା ଜିବନ୍ମାନିୱାରି ତରିଟାନ୍ ସାତି ୱାରିଙ୍ଗ୍ ରେବାନାର୍ ?
20 ନିୟମ୍ ମାରି ପାର୍ମାଣ୍ ବାକ୍ୟଦୁ ପୋଇଦୁ । ଜଦି ୱାର୍ ଇୟା ବାକ୍ୟଦି ଇସାବ୍ଦାନ୍ ମାଟା ଇନ୍ଏର୍, ଆଦେଙ୍ଗ୍ ସତ୍ନେ ୱାରି ଉଣ୍ତିଙ୍ଗ୍ ଜାୟ୍ ସିଲେତ୍ ।
କାସ୍ଟୁଦି ୱେଡ଼ା
21 ମାରି, ୱାର୍ ନାଣ୍ଡ କାସ୍ଟୁ ମାରି ବାଙ୍ଗାଁ ଆଜି ଦେସ୍ତାନ୍ ସିଜି ବୁଲାନାର୍, ମାରି ବାଙ୍ଗାଁ ଆତିଙ୍ଗାଁ, ୱାର୍ ରିସା ଆଜି ନିଜେଦି ରାଜାଦି ମାଣାନ୍ ମାରି ନିଜେଦି ମାପୁରୁଦି ମାଣାନ୍ ଆନାଦୁରିଆ ସିଜି ମୁସ୍କୁ ତରିନ୍ ନିଜେ ନିଜେଦି ମୋକମ୍ କିନାର୍; 22 ମାରି, ୱାର୍ ବୁମିଦୁ ସୁଡ଼ୁନାର୍, ମାରି ସୁଡ଼ୁଦୁ, କାସ୍ଟୁ ମାରି ସିକାଟି, ସୋନି ଉଣ୍ତିଙ୍ଗ୍ ସିକାଟି; ମାରି, ୱାର୍ ସିର୍ ସିକାଟିଦିଙ୍ଗ୍ ସାମ୍ନା କିନାର୍ ।
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)