1 Abọọñ, nsoo inam nọ afo ada nsan-nsan?

Nsoo inam nọ afo adịp idem mfo ke ini mfịna?

2 Ke ntañidem amọ awo ibak atʌkkọ awo uweene,

e-eduọññọke edọñọ ndiọi uduak a-anye aduakka anọ ammọ.

3 Anye aduaak inua abaña udọñ esịd amọ;

anye adiọñ mme adiọọkitọñ anyʌñ anam se idiọọk ye Abọọñ.

4 Ke ntañidem amọ awo ibak iyemme Abasi;

ke afịd akikere amọ ufañ ibaaha inọ Abasi.

5 Usʌñ amọ anie uforo afịd ini;

anye asịn mbed mfo;

asak afịd mme asua amọ nsaha.

6 Anye abo idem amọ ate, "Ñkpọ ndomokeed idintəkkoke miin."

Anye anwọñọ ate, "Awo ndomokeed idiikanna innam miin idiọọkñkpọ."

7 Inua amọ ayọhọ ye nsu ye ndịkke;

mfịna ye ibak esịne ke idak edeme amọ.

8 Anye anaa ke itie udịbe a-akpereke mme esịd idʌñ;

asịne do awoot mbon ake imiidueghe.

Anyen ammọ asʌk ayep mbon se anye ayem idat uwem;

9 Anye adịbe abet nte ekpe ke itie nnaa ammọ.

Anye adịbe abet adimʌm mbon se imiinieghe unwam;

anye amʌm ammọ anyʌñ adʌt ammọ asịn ke iyịre amọ.

10 Ammọ esobo, eduọññọ;

ammọ eduọññọ ke idak adudu amọ.

11 Anye abo idem amọ, "Abasi idiikịtte tutu amama;

anye afʌk iso amọ inyʌññọ ikịt tutu amama."

12 Dakka da, Abọọñ! Benne ubọk mfo, O Abasi.

Kuufre mbon ake imiinieghe unwam.

13 Nsoo ido ntak awo ibak asịnne Abasi ke ndek?

Nsoo inam anye abo,

"Anye idiñkoodo miin yak ndinam ibad"?

14 Ado afo, Abasi, amekịt mfịna mbon ñkpọnnam;

afo ameda ase ukuud ammọ anyʌñ aben ayọ.

Mbon ake imiinieghe unwam eyaak idem ammọ esịn ke ukpeme mfo;

afo ado unwam nditọakpa.

15 Buuñ ubọk awo ibak;

koot anam idiọọk yak adinam ibad ibak amọ

ake awo ndomokeed imiikpikidiọọñọke.

16 Abọọñ ado adidem ke nsi-nsi nsi-nsi;

mme idịd eyaetak ke isọñ amọ.

17 Afo, Abọọñ, kop se ido udọñ mbon ñkpọnnam;

afo asọọñọ amọ idem, anyʌñ akpañ utọñ anọ ntuaña ammọ,

18 akpeme nditọakpa ye mbon se efiik,

mbaak mme ñkaña awo

edisịn mme awo ndịk ke idem aba.