1 Abọọñ ado unwana mmi ye adinyaaña mmi,

anie ke ami ndiifeghe?

Abọọñ ado itie udịbe uwem mmi,

anie ke ami ndiibaak?

2 Ke ini mbon ibak esañake eñkpere

adita abʌkidem mmi,

ado mme asua mmi ye mbon utọk mmi

ediifiọnnọ iduọ.

3 Akpekọm mbon ekọñ eñkanna miin ekʌk,

esịd mmi idiifegheke ndịk;

akpekọm ekọñ atịppe ke itie mmi,

ami ndiisʌk nnenie nsọọñọnda.

4 Ñkpọ keed ke ami mbeeñe Abọọñ,

kpa ado kpọd ke ñyem:

nte yak ndʌñ ke ufọk Abọọñ

ke afịd ayio uwem mmi,

nọ nse uyai Abọọñ

ñnyʌñ ñyem anye ke tembịd amọ.

5 Sia ke usen nnananyen

anye ayamfʌk ke itie idʌñ amọ;

anye ayandịp ke idak adisana atayad amọ

anyʌñ andịppe adot ke anyọñ akwa itiad.

6 Do ndin ke iwuod mmi adiikọñ

ikan ake mme asua eñkannake miin ekʌk;

ke adisana atayad amọ ami ñyaanam uwa ye ñkpo idaara;

ñyaakwọ ñnyʌñ nnam idaara nnọ Abọọñ.

7 Kop uyio mmi ke ini ukoodo, Abọọñ;

ntua miin mbọm nyʌñ ñyie miin.

8 Esịd mmi atañ ubaña fiin ate, "Yem iso amọ!"

Ami ñyaayem iso mfo, Abọọñ.

9 Kundịp miin iso mfo,

kuudat iyadesịd umbịne usio ke iso mfo;

afo akesʌk ado andiñnyaaña miin.

Kuñkpọñ miin, kuunyʌñ untop miin uduọọk,

Abasi Andiñnyaaña miin.

10 Akpesʌkado nte ete ye eka mmi eñkpọññọ miin,

Abọọñ ayamben akama.

11 Ñkpeep miin usʌñ mfo, Abọọñ;

ndat miin saña ke usʌñ se ifọn

mbaak mbon se imfiik miin.

12 Kuñyaak miin unọ udọñ mme asua mmi,

sia mme atie ntiense nsu edakka eda adinam ikọ ye ami,

etañ ndiọi ikọ embaña miin.

13 Ami nsʌk nnenie nsọọñọnda ke ami:

Ami ñyaakịt mfọn Abọọñ

ke isọñ mme aduuwem.

14 Bet Abọọñ

sọñ idem nyʌñ sọñ esịd

nyʌñ bet Abọọñ.