1 Inọ Abọọñ ekọọm, sia anye afọn;

ima amọ aba ke nsi-nsi.

2 Yak Isrel ebo:

"Ima amọ ado ke nsi-nsi."

3 Yak ufọk Erọn ebo:

"Ima amọ aba ke nsi-nsi."

4 Yak mbon se ibaak Abọọñ ebo:

"Ima amọ aba ke nsi-nsi."

5 Ke ini ñkpọ asọññọ, ami ntua nseeme nnọ Abọọñ;

anye amben miin akaa itie a-anwañake.

6 Abọọñ mmọdo ye ami; ami ndiikoppo ndịk.

Nsoo ke ñkaña awo akeme innam miin?

7 Abọọñ mmọdo ye ami; anye ado andiñnwam miin.

Ami nse mme asua ke anyen adikan.

8 Afọn awo adidịbe ke Abọọñ

akan adinie mbuọdidem ke mme awo.

9 Afọn awo adidịbe ke Abọọñ

akan adinie mbuọdidem ke mme mbọọñ.

10 Afịd idịd emaeñkanna miin ekʌk,

ado ke anyịñ Abọọñ ami mmaakpịkke ammọ nduọọk.

11 Ammọ emaeñkanna miin ekʌk ke afịd mbeñ,

ado ke anyịñ Abọọñ ami mmaakpịkke ammọ nduọọk.

12 Amọ emaeñkanna miin ekʌk nte akwọọk,

ado ikañ amaata ammọ usọp-usọp nte ñnyanyaha ke ikọd;

ke anyịñ Abọọñ ami mmaakpịkke amọ nduọọk.

13 Emaennək miin ekaa edem ndin ñkpaakeduọ,

ado Abọọñ amañnwam miin.

14 Abọọñ ado adudu ye inweek mmi;

anye akappa ado adinyaaña mmi.

15 Ñkpo idaara ye adikan

eba ke mme atayad ndinen awo:

Ubọk nnasia Abọọñ anam mme ikpọ ñkpọ!

16 Edịppe ubọk nnasia Abọọñ ke anyọñ;

ubọk nnasia Abọọñ anam mme ikpọ ñkpọ!

17 Ami ndiikpaaha ado ñyaadu uwem,

ñnyʌñ mbʌk se Abọọñ anam.

18 Abọọñ anekke antʌnọ miin,

ado anye iñyakka miin inọ ñkpa.

19 Beere inuaatob mme ndinen awo nnọ miin;

Ami ñyaadʌk ndi ñnyʌñ nnọ Abọọñ ekọọm.

20 Inuaatob Abọọñ ado ami

ake mme ndinen awo esañake edʌk.

21 Ami ñyaunọ fiin ekọọm sia afo amembọọrọ miin;

afo amekappa ado adinyaaña mmi.

22 Itiad ake mme abọbufọk ekesịnne

akappa ado itiad inuuk;

23 Abọọñ anam ami,

ndin anye ado utịbe ñkpọ ke anyen ñnyịn.

24 Abọọñ anam ami ke usen mfịn ami;

yak ñnyịn idaara mfịn inyʌñ inem esịd.

25 Abọọñ, inyaaña ñnyịn!

Abọọñ, nam ñnyịn ikịt mfọnọñkpọ!

26 Afọfọn anọ anye a-adiighe ke anyịñ Abọọñ.

Ñnyịn imito ke ufọk Abọọñ idiọñ ndufo.

27 Abọọñ ado Abasi,

ñko anye anam unwana amọ ayamma inọ ñnyịn.

Ikama mme ñkọk eto ke ubọk, ikeene isaña ke isañ idaara

tutu ewuọ mme nnʌk akpokoro uwa.

28 Afo ado Abasi mmi, ami ñyaanyʌñ utooro fiin;

afo ado Abasi mmi, ami ñyaanyʌñ ukpono fiin.

29 Inọ Abọọñ ekọọm, sia anye afọn;

ima amọ aba ke nsi-nsi.