1 Abọọñ, ñnyaaña miin sio ke ubọk mme anam idiọọkñkpọ;

ñkpeme miin ke ubọk mbon afai,

2 e-ekereke ndoom ke esịd ammọ

e-enyʌññọ esiin ekọñ afịd ini.

3 Ammọ enam edeme ammọ asọbọ nte ake udʌkikọd;

ifod ibọm aba ke mme ñkpọkinua ammọ.

4 Abọọñ, nnịm miin ke ifuuro mbaak ubọk mbon ibak;

ñkpeme miin mbaak mbon afai,

ake eyemme adinuuk ukod mmi nọ ayekke.

5 Mbon afai edịp afia ennọ miin;

ammọ edette udʌk iyịre enịm ennọ

enyʌñ ekọọk mme afia enịm ke usʌñ ake ami nsañake.

6 Ami mmebo, Abọọñ, "Afo ado Abasi mmi"

Abọọñ, kop akam ake ami ntuaha ñyem mbọm.

7 Abọọñ Andikara, akpọsọñ ufak mmi,

afo amfʌk miin iwuod ke usen anwan.

8 Abọọñ, kuuyak mbon ibak enam uduak ammọ;

kuuyak akikere ammọ awuọ ada.

9 Mbon eñkannake miin ekʌk edịppe iwuod ke asian;

yak ibak ñkpọkinua ammọ akanna afʌk ammọ.

10 Yak ñkañ asakka ikañ aduọ atọ ammọ;

yak etop ammọ esịn ke ikañ

esịn ke udem, ake ammọ imiididakkake ida aba.

11 Yak mbon inuaikọ ekuunie iwuuk ke isọñ;

yak mfịna ayem mbon afai.

12 Ami mmediọọñọ ke Abọọñ akpe unen anọ mbon uweene

anyʌñ anam se inen ye mbon unana.

13 Ke akpanikọ ndinen awo eyaetooro anyịñ mfo,

ñko nti awo eyaedʌñ ke iso mfo.